ރެއިން ފެށިގެން މާލެ އަށް ކުރަމުންދާ ވިއްސާރައިގައި ފެން ބޮޑުވުމުގެ ސަބަބުން 7 ގޭބިސީ އެއްގެ 44 މީހަކަށް ވަގުތީ ބޯހިޔާވަހިކަން ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ހަމަޖައްސައި ދީފި އެވެ.

އެ އޮތޯރިޓީން ބުނީ އެ އެންމެނަށް ވަގުތީ ބޯހިޔާވަހިކަމާއި ކެއިން ބުއިމުގެ އިންތިޒާމް ހަމަޖައްސައިދީފައިވަނީ 1 ދުވަހަށް ކަމަށެވެ.

"މިފަރާތްތައް ބަދަލުކުރެވުނީ މި ގެތަކުގެ ފާޚާނާތަކުން ނަޖިސް ލީކުވުމާއި ކައްކާ ކައިބޮއެ ހެދުމަށް ބުރޫ އަރާ އާންމު ދިރިއުޅުމަށް ހުރަސްއެޅިފައިވާ ހާލަތަށް ގޮސްފައިވާތީ" އެންޑީއެމްއޭ އިން ބުންޏެވެ.

ރޭ މެންދަމު މާލެއަށް ވެހުނު ވާރޭގައި ބޮޑު ސަރަހައްދެއްގައި ފެން ބޮޑުވެ ބައެއް ގެތަކަށާއި ފިހާރަތަކަށް ފެން ވަދެފައިވެ އެވެ.

އެމްއެންޑީއެފުން ބުނީ އެމްއެންޑީއެފްގެ މާލޭ އޭރިއާ ކޮމާންޑުން ކުރިއަށްގެންދާ އޮޕަރޭޝަންގައި މިހާތަނަށް 104 ގެއަކަށް އެހީތެރިކަން ފޯރުކޮށްދީ، 528 ވެލި ބަސްތާ ޖަހާދީފައިވާ ކަމަށެވެ.

ފެން ހިންދުމަށް އެމްއެންޑީއެފްގެ ފަޔާ އެންޑް ރެސްކިޔު ސާވިސްއިން، މާލޭގެ 7 ސަރަހައްދެއްގައި 17 ޕަންޕު ބަހައްޓައިގެން ދަނީ މަސައްކަތްކުރަމުންނެވެ. މި މަސައްކަތުގައި މިހާތަނަށް 18201 ޓަނުގެ ފެން ހިންދާފައިވާ ކަމަށް އެމްއެންޑީއެފުން ބުންޏެވެ.