މިދިޔަ ނޮވެމްބަރު މަހު ރިލީޒް ކުރެވުނު ހޮލީވުޑްގެ ފިލްމު "މަރީއާ"ގެ ލީޑު ރޯލު ލިބުނީ ދޮގު ހަދައިގެން ކަމަށް އެންޖެލީނާ ޖޯލީ އެއްބަސްވެއްޖެ އެވެ.

މިފަހުން އޮތް ސްޕްރިންގް ފެސްޓިވަލްގެ ތެރެއިން ދިން އިންޓަވިއުއެއްގައި އެންޖެލީނާ ބުނީ އޭނާއަށް ލަވަ ކިޔަން އެނގޭތޯ ޑައިރެކްޓަރު ސުވާލު ކުރުމުން އާއެކޭ ބުނި ކަމަށެވެ.

"އަހަންނަށް އެއްވެސް ވަރަކަށް ލަވަކިޔާކަށް ނޭނގޭ. އަހަރެން ކައިރީގައި މީހުން ބުނެފައިވެސް ވޭ އަހަރެންގެ އެ ހުނަރު ނެތޭ" އެންޖެލީނާ ބުންޏެވެ.

"މަރިއާ"އަކީ 1970ގެ އަހަރުތަކުގައި މަޝްހޫރުވި އޮޕެރާ ލަވަކިޔުންތެރިއެއް ކަމަށްވާ މަރިއާ ކަލަސްގެ ހަޔާތުގެ މައްޗަށް ބިނާކޮށް ހަދާފައިވާ ފިލްމެކެވެ.

އެ ފިލްމަށް ކުރިއަށް އޮތް ގޯލްޑަން ގްލޯބް އެވޯޑްސްގެ ނޮމިނޭޝަންއެއް ލިބިފައިވާއިރު މިއަހަރުގެ އޮސްކާގައި ވެސް އެ ފިލްމުގެ ނަން ވިދާލާނެ ކަމަށް ލަފާކުރެވެ އެވެ.

އެންޖެލީނާ އިތުރަށް ބުނީ އެ ދާއިރާގައި ކާމިޔާބު ލިބޭނީ ކުރިމަގާމެދު މާ ބޮޑަށް ނުވިސްނައި މިވަގުތު ލިބިފައިވާ ފުރުސަތުތަކަށް އިސްކަން ދީގެން ކަމަށެވެ.