ދަ ޑިމޮކްރެޓްސް އިން ވަކިވެ އެ ޕާޓީގެ ރައީސްގެ މަގާމުގައި ހުންނެވި ހަސަން ލަތީފާއި ނައިބު ރައީސް މުހައްމަދު ޝިފާޒް އެމްޑީޕީއަށް ސޮއިކޮށް ޕާޓީއާ ފޯމް ހަވާލުކޮށްފި އެވެ

ހަސަން ލަތީފާއި ޝިފާޒްގެ ފޯމް ހަވާލުކުރެއްވުމާއި ގުޅިގެން އެމްޑީޕީން ވަނީ އެ ދެބޭފުޅުންނަށް މަރުހަބާ ދަންނަވާފަ އެވެ.

"މި ޕާޓީގެ ކުރީގެ ޗެއަރޕާސަން ހަސަން ލަތީފް އާއި ކުރީގެ ނައިބު ރައީސް މުހައްމަދު ޝިފާޒު އަލުން މި ޕާޓީއާ ގުޅިވަޑައިގަތުމުން މަރުހަބާ ދަންނަވަން" އެމްޑީޕީން ކުރި އެކްސް ޕޯސްޓެއްގައި ބުނެފައިވެ އެވެ.

ކުރީގެ ރައީސް މުހައްމަދު ނަޝީދު އިސްކޮށް ހުންނަވާ އުފެއްދެވި ދަ ޑިމޮކްރެޓްސް ރޫޅި އިސްސަފުގައި ތިއްބެވި ގިނަ ބޭފުޅުންތަކެއް ވަނީ އެމްޑީޕީއަށް އެނބުރި ގޮސްފަ އެވެ. އެގޮތުން ނިމިދިޔަ ރިޔާސީ އިންތިޚާބުގައި އެ ޕާޓީގެ ރަނިން މޭޓުގެ ގޮތުގައި ވާދަކުރެއްވި ހުސެއިން އަމްރު އާއި ކުރީގެ މެންބަރު އަލީ އާޒިމް ވެސް ވަނީ އެމްޑީޕީއަށް ސޮއި ކުރައްވައިފަ އެވެ.

ހޮނިހިރު ދުވަހު ހަސަން ލަތީފް ޑިމޮކްރެޓްސްގެ ރައީސްގެ މަގާމުން އިސްތިއުފާ ދެއްވި އިރު އޭނާ ޕާޓީގެ ރައީސްގެ މަގާމުން ވަކިކޮށް ދިނުމަށް އެދި ޕެޓިޝަނެއްވެސް ހުށަހަޅާފައިވެ އެވެ. ޕެޓިޝަންގައި ބުނެފައިވަނީ އެމްޑީޕީއާ އެކު މަސައްކަތް ކުރައްވަން ވިސްނަވާކަމަށް ޕާޓީގެ ގިނަ މެންބަރުންތަކެއް ގާތު ވިދާޅުވުމަށްފަހުވެސް ޑިމޮކްރެޓްސްގެ ރައީސްގެ މަގާމުން އިސްތިއުފާ ނުދެއްވާ ހުންނަވާތީ ކަމަށެވެ.