ރާއްޖެއިން އެފްރިކާ ސަރަހައްދުގެ ބައެއް ގައުމުތަކާއި، އާއްމުކޮށް ދިވެހިން ދަތުރުކޮށް ނޫޅޭ ބައެއް ގައުމުތަކަށް ވިސާއާ ނުލައި ދަތުރުކުރެވޭ ގޮތަށް، ކުރީގެ ސަރުކާރުން ސޮއިކުރި އެވެ. މިފަދަ ބައެއް އެއްބަސްވުންތަކާ ގުޅިގެން ނޫސްތަކުގެ ކޮމެންޓްލައިންތަކަށާއި ސޯޝަލް މީޑިއާއަށް ދޫކޮށްލި ޚިޔާލުތަކުގެ ތެރޭގައި "ތިއީ ދިވެހިން ދާ ތަނެއްތަ؟"، "ތި ތަނަށް ވިސާ ފްރީ ކުރިއަށް އަހަރެމެންނަށް ކީއް"، މިފަދަ ޚިޔާލުތައް އަ އެވެ. އޭރުގެ ފޮރިން މިނިސްޓްރީން ބުނަމުން ދިޔައީ ސަރުކާރުގެ ސިޔާސަތަކީ ދިވެހިންނަށް ހުރިހާ ސަރަހައްދަކަށް ވެސް ފަސޭހައިން ދަތުރުކުރެވޭނެ މަގު ފަހިކޮށްދިނުން ކަމަށާއި، ދިވެހި ޕާސްޕޯޓްގެ އަގު މަތިކުރުން ކަމަށެވެ.

އޭގެ ނަތީޖާ މިއަދުވެސް އެދަނީ ފެންނަމުންނެވެ. މުޅި ސަރަހައްދުގެ އެންމެ ބާރުގަދަ ޕާސްޕޯޓަށް ދިވެހި ޕާސްޕޯޓުވެ، އެކަމުގެ އުފާ މިއަދުގެ ސަރުކާރުން ވެސް ފާޅުކުރާއިރު، މިއީ އެމްޑީޕީގެ ސަރުކާރުގެ މަސައްކަތުގެ ނަތީޖާ އެވެ.

ޕާސްޕޯޓްތަކުގެ ބާރުގަދަ މިންވަރެއް ބަލާ އިންޑެކްސް ތައްޔާރުކުރާ ހެންލީ އެންޑް ޕާޓްނާސްގެ ހެންލީ ޕާސްޕޯޓް އިންޑެކްސްގައި ރާއްޖެ މިވަގުތު އޮތީ 53 ވަނައިގަ އެވެ. އެއީ 94 ގައުމަށް ވިސާއާއި ނުލައި ނުވަތަ އޮންއެރައިވަލް ވިސާ ލިބޭތީ އެވެ. ވިސާ އެގްޒެމްޝަން އެއްބަސްވުންތައް ހެދިއިރު، މިއީ ޕާސްޕޯޓްގެ ބާރުގަދަކުރުމަށް ކުރާ ކަމެއްކަމަށް އޭރު ފޮރިން މިނިސްޓަރު އަބްދުﷲ ޝާހިދު ވިދާޅުވި ވާހަކައަކީ މި އެވެ.

ރާއްޖެއާ އެންމެ ކައިރިން ދެން ވާދަކުރަނީ ބާރުގަދަ އިންޑިއާ އެވެ. ދުނިޔޭގެ އެކި ގައުމުތަކަށް އެހީދީ، އިސްތިރާޖީ ގުޅުންތައް ބާއްވަމުން އަންނަ އިންޑިއާއަށް ވެސް ޕާސްޕޯޓް އިންޑެކްސްގައި ލިބުނީ 85 ވަނަ އެވެ. އެގައުމުގެ ޕާސްޕޯޓްގައި ވިސާ ފްރީކޮށް ދަތުރުކުރެވެނީ 57 ގައުމަށެވެ. މިއީ ރާއްޖެއާއި އަޅާ ބަލާއިރު ވަރަށް ބޮޑުތަނުން ފަހަތެވެ. އިންޑިއާއާ އެންމެ ކައިރިން ވާދަކުރަނީ ބޫޓާނެވެ. ބޫޓާން އޮތީ 90 ވަނައިގަ އެވެ. އެ ގައުމުގެ ޕާސްޕޯޓަށް 52 ގައުމަށް ވިސާއާ ނުލައި ދަތުރުކުރު ކުރެވުނެވެ.

ޝާހިދުގެ ޚާރިޖީ ވަޒީރުކަމުގައި 20 އަށްވުރެ ގިނަ ގައުމުތަކާއެކު ވިސާގެ ލުއިފަސޭހަކަމުގެ އެއްބަސްވުންތަކުގައި ސޮއިކުރެވުނެވެ. އެ ގައުމުތަކުގެ ތެރޭގައި ޔޫއޭއީ، ތައިލެންޑް، ރަޝިޔާ، މޮރޮކޯ، ޗައިނާ، ކަޒަކިސްތާން، ކިރްގިސްތާން، ކެމްބޯޑިއާ، ބުރުންޑީ، ރުވާންޑާ، ގެމްބިއާ، ސީޝެލްސް، ސައުދީ އަރަބިއްޔާ، މޮންގޯލިއާ، ސައޯ ޓޯމޭ، އެންޑޯރާ، ގަޔާނާ، ޓޯގޯ އަދި ހޮންޑިއުރަސް ހިމެނެ އެވެ. ދިވެހިން އާއްމުކޮށް ދަތުރުކޮށް އުޅުނު ތައިލެންޑްއާއި ޔޫއޭއީ އަށް ވިސާ ނެތި ފަސޭހަކަމާއެކު ދަތުރުކުރެވެން ފެށުމުން ޑުބާއީއަށް ނުވަތަ ބެންކޮކަށް "ވެކޭ އަށް" ދާން ފެށީ ކިތައް ދިވެހިންކަން ސޯޝަލް މީޑިއާ ބަލާލުމުން އަންދާޒާ ކޮށްލެވޭނެ އެވެ.

ދުރު ހިސާބުތައް ކަމަށްވާ ރަޝިޔާ، މޮރޮކޯ އަށް ދިވެހިން ޗުއްޓީއަށް ދިޔުން އިތުރުވި އެވެ. ރަޝިޔާގައި މެޑިސިން ހަދަން ތިބެން ދަރިވަރުންގެ ގާތަށް އާއިލާތައް ޗުއްޓީއަށް ދާން ފެށި އެވެ. ވިޔަފާރިތައް ބަލާލާ، ޝޮޕިންކޮށްލަން ޝަންހާއީއަށާއި ގުއާންޖޯ ފަދަ ޗައިނާގެ ސިޓީތަކަށް ދިވެހިން ދިޔުން ކުއްލިއަކަށް އިތުރުވެއްޖެ އެވެ. އެ ކުދިންގެ ގްރެޖުއޭޝަނަށް މުޅި އާއިލާ ދާން ފެށީ އެވެ. މިހާރު ޗުއްޓީ ހަދާލަން ސައޫދީ އަރަބިއްޔާއަށް ވެސް ދާންވީ އެވެ. ޖަމާއަތެއްގެ އެހީގައި ނުގޮސް އުމްރާކޮށްލައިގެން އަންނަންވީ އެވެ.

މިހިރީ ހައްތަހާވެސް މި ގައުމުތަކަށް ވިސާގެ ލުއިކަން ހޯދައިދިނުމުން ލިބުނު ފައިދާތަކެވެ.

ޖަޕާނާއެކު ސޮއިކުރެވުނީ ޑިޕްލޮމެޓިކް އަދި އޮފިޝަލް ޕާސްޕޯޓަށް ވިސާނެތި ދަތުރުކުރެވޭ ގޮތަށެވެ. އޭރު ފޮރިން މިނިސްޓްރީން ބުނީ، ދެން މަސައްކަތްކުރާނީ އޯޑިނަރީ ޕާސްޕޯޓަށް ވިސާނެތި ޖަޕާނަށް ދަތުރުކުރުމުގެ އިންތިޒާމު ހަމަޖެއްސުމަށް ކަމަށެވެ. ޖަޕާން ނޫން އެހެން ހުރިހާ ގައުމުތަކަށް ވިސާގެ ލުއި ފަސޭހަކަން ލިބުނީ ހުރިހާ ޕާސްޕޯޓަކަށެވެ. އާއްމު ދިވެހި ރައްޔިތުންނަށެވެ.

ޝާހިދު ކުރެއްވި މަސައްކަތްޕުޅުގެ ނަތީޖާއެއްގެ ގޮތުން، ދެކުނު އޭޝިއާ ސަރަހައްދުގެ ގައުމުތަކުން ޕާސްޕޯޓް އިންޑެކްސްގައި ރާއްޖެ ފަހަތަށް ޖައްސާލުމަށް ދެން ލައްކަ މަސައްކަތްކުރަން ޖެހޭނެ އެވެ.

ރައީސް އިބްރާހިމް މުހައްމަދު ސޯލިހްގެ ސަރުކާރުން ނިމިގެންދިޔައިރު، ޝާހިދު ގެންދެވީ މުހިއްމު އަމާޒަކަށް މަސައްކަތް ކުރަމުންނެވެ. އެއީ ދިވެހިންނަށް ވިސާއާއި ނުލައި ޔޫރަޕްގެ ގައުމުތަކަށް ދަތުރުކުރެވޭނެ އިންތިޒާމު ހަމަޖެއްސުމެވެ. އެކަމާ ބެހޭ އެތައް މަޝްވަރާތަކެއް ރާއްޖެއާއި ވިލާތުގެ އިއްތިހާދާ ދެމެދު ކުރެވުނެވެ. އަދި ވިލާތުގެ އިއްތިހާދުގައި ހިމެނޭ ޝެންގެން އޭރިއާގެ ސަރުކާރުތަކަށް ވަކިވަކިން ޝާހިދު ގެންދެވީ ލޮބީ ކުރައްވަމުންނެވެ. ވިލާތުގެ ގައުމުތަކަށް ޝާހިދު ކުރެއްވި ދަތުރުފުޅުތަކުގެ އެންމެ މުހިއްމު އެއް ބޭނުނަކަށް ވެފައި އޮތީވެސް އެކަން ކަމަށް، އޭރު ޚާރިޖިއްޔާއިން ނެރުނު ނޫސްބަޔާންތައް ބަލާލުމުން ފެންނަން އެބަހުއްޓެވެ.

ރާއްޖޭގައި ތިބެގެން ޝެންގެން ސަރަހައްދުގެ ބައެއް ގައުމުތަކަށް ވިސާއަށް އެޕްލައިކުރެވޭނެ މަރުކަޒެއް ގާއިމްކުރި ދުވަހު، 2019 ވަނަ އަހަރު ޝާހިދު ވިދާޅުވީ، ފުރަތަމަ ވިސާ ހޯދުމުގެ ލުއިފަސޭހަކަން ހޯދީކަމަށާއި، ދެން އޮތީ ވިސާ-ފްރީ ކުރުން ކަމަށެވެ.

އެމްޑީޕީއަށް ދެވަނަ ދައުރެއް ލިބުނުނަމަ ޝާހިދު ކުރެއްވި މަސައްކަތްޕުޅުގެ ނަތީޖާ ފެނުނީސް ކަމަށް، ޔޫރަޕްގެ ގައުމުތަކާއެކު ކުރެވުނު މަސައްކަތްތަކުގެ މައުލޫމާތު އެނގިވަޑައިގަންނަވާ ބޭފުޅަކު ވެސް ވިދާޅުވި އެވެ.

"މި ސަރުކާރުގައިވެސް ޑިޕްލޮމެސީ ރަނގަޅަށް ދަންނަ، ޝާހިދުހެން ގައުމުތަކާ ގުޅުން ބާއްވަން ދަންނަ ބަޔަކު ތިބި ނަމަ، ވިސާ ނެތި ޔޫރަޕަށް ދަތުރުކުރެވޭނެ އިންތިޒާމު މި ސަރުކާރުގެ ވެރިކަމުގައި ވެސް ހަމަޖެހޭ މިންވަރަށް އެ މަސައްކަތް ނިންމަވާފައި ޝާހިދު ޚާރިޖީ ވަޒީރުކަމުގެ ދައުރު ނިންމާލީ،" އެ ބޭފުޅާ ވިދާޅުވި އެވެ.

ދިވެހިން ދަތުރުކުރަންވީ އެވެ. ޝާހިދު އެވަނީ ޕާސްޕޯޓް ބާރުގަދަކޮށްދީފަ އެވެ. އެމްޑީޕީގެ ވެރިކަމެއް ދެން އަންނައިރު، ޕާސްޕޯޓް އިންޑެކްސްއަށް ދެން އަންނަ ބަދަލެއް ބަލާލަމާ ހިނގާށެވެ.