އެމެރިކާގައި ބޭނުންކުރުން ހުއްޓުވި ސޯޝަލް މީޑިއާގެ އެންމެ މަޝްހޫރު އެޕްލިކޭޝަން ޓިކްޓޮކް ގަތުމަށް އެމެރިކާގެ ތިން މަހުޖަނަކު ޝައުގުވެރިކަން ފާޅުކޮށްފި އެވެ.

ޓިކްޓޮކް ގަތުމަށް ޝައުގުވެރިކަން ފާޅުކޮށްފަައިވަނީ، މަހުޖަނުން މިސްޓާ ބީސްޓް، އިލޯން މަސްކް އަދި ޝާކް ޓެންކް ކެވިން އޯ ލިއެރީ އެވެ.

މިސްޓާ ބީސްޓް (އަސްލު ނަަން: ޖިމީ ޑޮނާލްޑްސަން) އަކީ ޔޫޓިއުބް ވީޑިއޯ ހަދައިގެން މަހުޖަނަކަށް ވެފައިވާ މީހެކެވެ. އޭނާ ވަނީ ޓިކްޓޮކް ގަންނަން ޝައުގުވެރިވާ ކަމަށް ސޯޝަލް މީޑިއާގައި ހިއްސާކޮށްފަ އެވެ.

ކުރީގެ ޓްވިޓާ އަދި މިހާރުގެ ނަމުންނަމަ "އެކްސް"ގެ ވެރިމީހާ އިލޯން މަސްކް ވެސް ޓިކްޓޮކް ގަތުމަށް މަޝްވަރާކުރާ ކަމަށް ނޫސްތަކުން ވަނީ ރިޕޯޓްކޮށްފަ އެވެ. އަދި ޝާކް ޓޭންކްގެ އިންވެސްޓަރެއް ކަމަށްވާ ކެވިން އޯ ލިއެރީ ހިމެނޭ ޓީމެއް ވަނީ ޓިކްޓޮކް ގަތުމަށް އެ ކުންފުންޏަށް ބިޑެއް ހުށަހަޅާފަ އެވެ.

އެމެރިކާގައި ފާސްކޮށްފައިވާ ގާނޫނަކާ ގުޅިގެން ޖެނުއަރީ 19 ވަނަ ދުވަހު ޓިކްޓޮކް އެމެރިކާގައި ބޭނުންކުރުން ހުއްޓުވި އެވެ. ނަމަވެސް 24 ގަޑިއިރުވެސް ނުވަނީސް ޑޮނަލްޑް ޓްރަމްޕް ވެރިކަމާ ހަވާލުވެ، ނެރުނު އެގްޒެކްޓިވް އޯޑަރެއްގެ ދަށުން އަލުން ޓިކްޓޮކްގެ ހިދުމަތް ވަނީ ދޭން ފަށައިފަ އެވެ. ޓިކްޓޮކުން އަލުން ހިދުމަތް ދޭން ނިންމީ ޓިކްޓޮކަށް ކުރިމަތިވެފައިވާ މައްސަލަ 20 ޖެނުއަރީގައި ވެރިކަމާ ހަވާލުވި ރައީސް ޓްރަންޕް ހައްލުކޮށްދެއްވާނެ ކަމުގެ އުންމީދުގަ އެވެ. އެގޮތުން 75 ދުވަހުގެ ތެރޭގައި ޓިކްޓޮކަކީ އެމެރިކާގެ ގައުމީ ސަލާމަތަށް ހުރި ނުރައްކަލެއް ނޫން ކަމަށް ސާބިތުކޮށް ދޭން ޖެހެ އެވެ.

ބެލެވޭ ގޮތުގައި، މި މައްސަލަ ހައްލުވާނީ އެމެރިކާގެ ކުންފުންޏަކަށް ޓިކްޓޮކް ވިއްކާލައިގެންނެވެ.