މިސްރާއި ޖޯޑަން ފަދަ އަރަބި އެހެން ގައުމުތަކުން ފަލަސްތީނުގެ ރެފިއުޖީން އެތެރެކޮށްގެން، ޣާއްޒާ ސަރަހައްދު އެއްކޮށް "ސާފުކޮށްލަން" ޖެހޭ ކަމަށް އެމެރިކާގެ ރައީސް ޑޮޮނަލްޑް ޓްރަމްޕް ވިދާޅުވެއްޖެ އެވެ.

އެއާ ފޯސް ވަންގައި ދިން ރިޕޯޓަރުންނާއި ވާހަަކަފުޅު ދައްކަވަމުން ޓްރަމްޕް ވިދާޅުވީ އެމެރިކާއިން އިޒްރޭލަށް ފޮނުވަން ހަމަޖެހިފައިވާ 2،000 ޕައުންޑުގެ ބޮޑު މިހާރު ފޮނުވުމުގެ މަސައްކަތް އަލުން ފަށާފައިވާ ކަމަށެވެ.

ސުލްހައިގެ އެއްބަސްވުމަކަށް އައިސްފައިވާ ވަގުތެއްގައި މި ބޮންތައް ފޮނުވީ ކީއްވެގެންތޯ ސުވާލުކުރުމުން ޓްރަމްޕް ވިދާޅުވީ "އެއީ އެމީހުން ގަނެފައިވާ" ބޮން ތަކެއްކަމަށް ވާތީ ކަމަށެވެ.

އެމެރިކާގެ ކުރީގެ ލީޑަރުންނެކޭ އެއްގޮތަށް ޓްރަމްޕްއަކީ ވެސް އިޒްރޭލަށް ތާއީދުކުރާ މީހެކެވެ. އޭނާވަނީ މިސްރުން ގާތްގަނޑަކަށް މިލިއަނެއްގައި ރެފިއުޖީން ނެގުމުން "މިކަން ނިމުނީ" ކަމަށް ވިދާޅުވެފަ އެވެ.

ޓްރަމްޕް ވަނީ ޖޯޑަންއިން ގިނަ އަދަދެއްގެ ރެފިއުޖީން ނަގާފައިވާތީ ޖޯޑަންގެ ރަސްގެފާނު އަބްދުﷲ އަށް ޝުކުރުއަދާ ކޮށްފަ އެވެ. އަދި މިއަށްވުރެ ވެސް ގިނައިން ރެފިއުޖީން ނަގާނެ ކަމަށް އުއްމީދު ކުރާ ކަމަށް އޭނާ ވިދާޅުވެފަ އެވެ.

އިޒްރޭލުުން ފަލަސްތީނުގައި ހިންގަމުންދިޔަ ޤަތުލުއާންމު ހުއްޓާލައި ސުލްހައިގެ އެއްބަސްވުމަކަށް އައިސްފައި ވަނީ މި މަހު އެވެ.