މަޝްހޫރު ސޯޝަލް މީޑިއާ ކުންފުނި މެޓާއިން އެ ކުންފުނީގެ އެޕްލިކޭޝަންތައް ކަމަށްވާ ފޭސްބުކްއާއި އިންސްޓަގްރާމްއަށް އެމެރިކާގެ ކޮންޓެންޓް ކްރިއޭޓަރުން އިތުރު ކުރަން ބޯނަސް ޕްރޮގްރާމްއެއް ފަށައިފި އެވެ.

އިނާމެއްގެ ގޮތުގައި 5000 އެމެރިކާ ޑޮލަރު ހުށައަޅާފައިވާ އެ ޕްރޮގްރާމްއަށް ވަންނަ ފުރަތަމަ 30 ދުވަހުގެ ތެރޭގައި ފޭސްބުކްއަށް 20 ރީލް އަދި އިންސްޓަގްރާމަށް 10 ރީލް އަޕްލޯޑު ކުރަން ޖެހޭނެ ކަމަށް ޕްރޮގްރާމްގެ ގަވާއިދުގައިވެ އެވެ.

އޭގެ އިތުރުން ޕްރޮގްރާމްގައި ބައިވެރިވާ ހުރިހާ ކޮންޓެންޓް ކްރިއޭޓަރުންނަކީ ވެސް އެހެން ސޯޝަލް މީޑިއާ ޕްލެޓްފޯމެއްގައި މަޝްހޫރު ފަރާތަކަށް ވާންވާނެ ކަމަށް ވެސް މެޓާއިން ބުނެފައިވެ އެވެ.

މި ޕްރޮގްރާމްގެ ދަށުން ފޭސްބުކްއާއި އިންސްޓަގްރާމަށް އަޕްލޯޑުކުރާ ރީލްތަކަކީ މީގެ ކުރިން އެހެން ޕްލެޓްފޯމެއްގައި އާއްމުކޮށްފައިނުވާ އޮރިޖިނަލް ކޮންޓެންޓްތަކަކަށް ވާންޖެހޭނެ ކަމަށް ވެސް މެޓާއިން ބުނެ އެވެ.

ސީދާ ޓިކްޓޮކްގެ ނަން މެޓާއިން ބުނެފައި ނުވި ނަމަވެސް ބޮޑަށް ބެލެވޭ ގޮތުގައި މެޓާގެ މި ޕްރޮގްރާމަކީ އެމެރިކާގައި ޓިކްޓޮކަށް ގިނަ ގޮންޖެހުންތަކެއް ކުރިމަތިވެފައިވާ މި ދަނޑިވަޅުގައި ޓިކްޓޮކްއާ ވާދަކުރަން ތައާރަފްކުރި ޕްރޮގްރާމް އެކެވެ.

އެމެރިކާގެ ކުރީގެ ރައީސް ބައިޑަންގެ ސަރުކާރުގެ އެންމެ ފަހު ދުވަސްކޮޅު އެގައުމުގައި ޓިކްޓޮކް މަނާކުރަން ނިންމައި އެ ނިންމުން ކުޑަ ވަގުތުކޮޅަކަށް ތަންފީޒު ވެސް ކުރި އެވެ.

އެހެން ނަމަވެސް އަލަށް އިންތިހާބުވި ރައީސް ޑޮނަލްޑް ޓްރަމްޕް ވަނީ އެ ނިންމުން އަނބުރާ ގެނެސް އެމެރިކާގައި ޓިކްޓޮކް މަނާކުރުން 75 ދުވަހަށް ފަސްކޮށްފަ އެވެ.