ހޮލީވުޑްގެ ތަރި ޖަސްޓިން ބެލްޑޯނީ އޭނާއާއެކު "އިޓް އެންޑްސް ވިތު އަސް"ގައި މަސައްކަތްކުރި ބްލޭކް ލައިވްލީގެ ކިބައިން މައާފަށް އެދޭ ވޮއިސް މެއިލްއެއް އާއްމުވެއްޖެ އެވެ.

އިންޓަނެޓުގައި މިހާރު ދައުރުވަމުންދާ އެ ވޮއިސް ނޯޓުގައި ޖަސްޓިން ބުނެފައިވަނީ އޭނާއަކީ އެންމެ ފުރިހަމަ މީހެއް ނޫން ކަމަށާއި އޭނާގެ ކިބައިގައި އައިބު ކަންތައްތަކެއް ހުރި ކަމަށެވެ.

އެއާއެކު ބްލޭކްއާއެކު އެ ފިލްމުގައި މަސައްކަތް ކުރުމުގެ ފުރުސަތު ލިބުނީތީ އުފާކުރާ ކަމަށް ވެސް ޖަސްޓިން އެ ވޮއިސް މެއިލްގައި ބުނެފައިވެ އެވެ.

ޖަސްޓިން މައާފަށް އެދޭ ވޮއިސް ނޯޓެއް އާއްމު ވެފައި މިވަނީ އެ ދެތަރިންގެ މެދުގައި ގާނޫނީ ހަނގުރާމައެއް ކުރިއަށްދާ ދަނޑިވަޅެއްގަ އެވެ.

މިދިޔަ ޑިސެމްބަރު މަހު ބްލޭކް ޖަސްޓިންއާ ދެކޮޅަށް ޖިންސީ ފުރައްސާރައިގެ މައްސަލައެއް ހުށައަޅާފައިވާއިރު އޭގެ ރައްދުގައި ޖަސްޓިން ވަނީ ބްލޭކްއަށް އަބުރަށް އަރައިގަތުމުގެ ދައުވާ ކޮށްފަ އެވެ.

ދައުރުވަމުން އަންނަ ވޮއިސް މެއިލްގެ ހަގީގަތަށް ބަލާއިރު އެއީ މިފަހުގެ ވޮއިސް މެއިލްއެއް ނޫންކަން ވަނީ އެނގިފަ އެވެ. އެއީ "އިޓް އެންޑްސް އިތު އަސް"ގެ ޝޫޓިންގެ ތެރެއިން އެ ދެމީހުންގެ ތެރޭގައި ދެބަސްވުމެއް ހިނގުމުން ޖަސްޓިން ފޮނުވި ނޯޓެކެވެ.

އެހެން ކަމުން އެ ދެތަރިންގެ ގާނޫނީ ހަނގުރާމައަށް އަދިވެސް އެއްވެސް ބަދަލެއް އައިސްފައިނުވާ ކަން އެކަމުން ދޭހަވާ ކަމަށް ހަބަރުތައް ބުނެ އެވެ.