މިއަހަރުގެ އިންޓަނޭޝަނަލް އިންޑިއަން ފިލްމު ފެސްޓިވަލް އެވޯޑްސް (އައިފާ އެވޯޑްސް)ގައި ބޮލީވުޑްގެ ތަރި ކަރީނާ ކަޕޫރުގެ ހާއްސަ ހުށައެޅުމެއް ފެނިގެންދާނެ ކަމަށް ހަބަރުތައް ބުނެފި އެވެ.

އަހަރުތަކަކަށްފަހު އައިފާގެ ސްޓޭޖުން ކަރީނާ ފެނިގެންދާއިރު އޭނާގެ ހުށައެޅުން ހާއްސަ ކޮށްފައިވަނީ ބޮލީވުޑްގެ އެންމެ މަޝްހޫރު އެއް ޝަހްސިއްޔަތު އަދި ކަރީނާގެ ކާފަ ރާޖް ކަޕޫރަށެވެ.

ރާޖް ކަޕޫރަށް ހާއްސަކޮށްގެން ކަރީނާ ދޭ އެ ޓްރިބިއުޓްގައި ރާޖްގެ ފިލްމީ ކެރިއަރުގެ މުހިއްމު އުސްއަލިތައް ފެނިގެންދާނެ ކަމަށް ރިޕޯޓުތައް ބުނެ އެވެ.

މި ހުށައެޅުމާ ބެހޭގޮތުން ކަރީނާ ބުނީ އެ ހުށައެޅުމަކީ އޭނާގެ ހިތުގައި ހާއްސަ ޖާގައެއް ދެވިފައިވާ ހުށައެޅުމަކަށް ވާނެ ކަމަށާއި އެ ދުވަހަށް ކެތްމަދުވެފައިވާ ކަމަށެވެ.

"އައިފާއާއި އަހަރެންގެ ފިލްމީ ހަޔާތާ ވެސް ވަނީ ވަރަށް ބޮޑަށް ގުޅިފައި. އަހަރުމެން މި ފާހަގަ ކުރަނީ އަހަރުމެންގެ ރިހި ޔޫބީލް،" ކަރީނާ ބުންޏެވެ.

ކަޕޫރު އާއިލާއާއަކީ ބޮލވުޑްގައި އެންމެ ނުފޫޒުގަދަ އެ އާއިލާއަކުން އެންމެ ގިނަ ތަރިން އުފެދިފައިވާ އާއިލާއަށްވާއިރު ރާޖް ކަޕޫރަކީ އެ އާއިލާއިން ފެނުނު ފުރަތަމަ މެގަ ސްޓާރެވެ.

މިއަހަރުގެ އައިފާ އެވޯޑްސް ބާއްވަން ހަމަޖެހިފައިވަނީ މާޗް މަހުގެ 3 އަދި 4 ވަނަ ދުވަހު އިންޑިއާގެ އާސާރީ ރަށެއް ކަމަށްވާ ޖެއިޕޫރުގަ އެވެ.