ގިނަ ގައުމުތަކުގައި އާއް އެންމެ ގިނައިން ބޭނުން ކުރެވޭ އަރަބިކާ ކޮފީގެ އަގު ދުނިޔޭގެ ބާޒާރުގައި ރެކޯޑު މިންވަރަކަށް ބޮޑުވެއްޖެ އެވެ.

ދުނިޔޭގެ ބާޒާރުގައި ކޮފީ ޕައުންޑެއްގެ އަގު 3.6 ޑޮލަރަށް އުފުލިފައިވާއިރު ކުރިއަށް އޮތް ތަނުގައި އެ އަގު އެއަށްވުރެ ވެސް ބޮޑުވުމުގެ ފުރުސަތު އެބައޮތް ކަމަށް މާހިރުން ބުނެ އެވެ.

އަރަބިކާ ކޮފީގެ އަގު އިންތިހާއަށް މައްޗަށް ގޮސްފައި މިވަނީ އެ ކޮފީ އެންމެ ގިނައިން އުފައްދާ ބްރެޒިލްގެ އުފެއްދުންތެރިކަން ދަށްވެ ބާޒާރުގައި ކޮފީ ލިބުން ދަތިވުމުންނެވެ.

ހަބަރުތައް ބުނާ ގޮތުގައި ބްރެޒިލްގައި މިވަގުތު ހުރި ކޮފީ ސްޓޮކްގެ 80 ޕަސެންޓް ވިކިފައިވާއިރު އެގައުމަށް އައި ހޫނު މޫސުމުގެ ސަބަބުން ކޮފީގެ އުފެއްދުންތެރިކަން ވަނީ ވަރަށް ބޮޑަށް ދަށްވެފަ އެވެ.

މިދިޔަ އަހަރަށްވުރެ މިއަހަރު ބްރެޒިލްގެ މޫސުން ރަނގަޅުވެ އުފެއްދުންތެރިކަން ރަނގަޅުވާނެ ކަމަށް ލަފާކުރެވުނު ނަމަވެސް މީގެ ކުރީގެ އަހަރުތަކާ އަޅާބަލާއިރު 4.4 ޕަސެންޓްގެ ދަށްވުމެއް އުޅޭނެ ކަމަށް ބެލެވެ އެވެ.

އަރަބިކާ ކޮފީއަކީ ރޯސްޓް ކޮށްގެންނާއި ގްރައުންޑް ކޮފީގެ ގޮތުގައި ވެސް ދުނިޔޭގެ އެކި ހިސާބުތަކުގައި ބޭނުން ކުރެވޭ ކޮފީގެ ބާވަތެކެވެ.