އާދީއްތަ ދުވަހުގެ މެންދުރު ފަހުން ފެށިގެން މެލޭޝިޔާއިން ގެއްލިގެން ހޯދަމުން އަންނަ އަހްމަދު އުސައިދު އިބްރާހީމް އެންމެ ފަހުން ފެނުނީ މެލޭޝިޔާގެ އެމްބަސީން ނުކުމެގެން ދަނިކޮށް ކަމަށް އާއިލާއިން ބުނެފި އެވެ.

އުސައިދަކީ ގާނޫނީ ވަކީލު އިބްރާހީމް އަފީފްގެ ދަރިއެކެވެ.

އަފީފް މިރޭ ފޭސްބުކުގައި ކުރެއްވި ޕޯސްޓެއްގައި ވިދާޅުވީ މި މަހުގެ ދެ ވަނަ ދުވަހުގެ 15:15 ގެ ފަހުން ސަންވޭ ޖިއޯ އިން ނުކުމެގެން ދިޔަގޮތަށް އެއްވެސް ހަބަރެއްނުވެގެން ، އެރޭ 10:00 ގައި އެކަން ފުލުހުންނަށާއި މެލޭޝިއާ އެމްބަސީއަށް ވެސް އެންގި ކަމަށެވެ.

"މައްސަލަ ފައިލް ކުރި ހިސާބުން ފެށިގެން ، ޕޮލިހުންނާއި ހައި ކޮމިޝަންގެ ބޭފުޅުން އުސައިދު ހޯދުމުގެ މަސައްކަތް ފެށި، އަދި އެކިއެކި ގްރޫޕްތަކުގައްޔާއި، ހެޔޮއެދޭ ފަރާތްތަކުން އުސައިދު ފެނޭތޯ ކުރެވެންހުރި ހުރިހާމަސައްކަތެއް ހުއްޓުމެއްނެތި ކުރަމުން ގެންދިޔަކަން ވަރަށް ޝުކުރުވެރިކަމާއެކު ފާހަގަކުރަން، އެގޮތުން ކުރެވުނު މަސައްކަތުން ސީސީ ކެމެރާ ފްޓޭޖް ތަކުން ލިބުނު މައުލޫމާތުންނާއި، ބައެއްމީހުންގެ ފަރާތުން ލިބުނު މައުލޫމާތުން، ހަމަ އެދުވަހު 16:00 އެހާކަށްހާއިރު، އުސައިދު ރާއްޖޭގެ އެމްބަސީއަށް ދިޔަކަން އެނގުނު" އަފީފް ވިދާޅުވިއެވެ.

ނަމަވެސް އެދުވަހަކީ ބަންދު ދުވަހަކަށްވާތީ އެމްބަސީގެ މީހަކާ ބައްދަލުވާގޮތެއްނުވުމުން، އެތާނގައި ގަޑިއެއްހާއިރު މަޑުކޮށްފައި ނުކުމެގެންދިޔައިރު އުސައިދުގެ ވޮލެޓާއި ސްޓޫޑެންޓް ކާޑު ވަނީ ބޭއްވިފައި ކަމަށް އަފީފް ވިދާޅުވި އެވެ. އިއްޔެ އެމްބަސީ ހުޅުވުމާއެކު، އެތަނުގެ ކެމެރާތައް ބަލާ ޗެކްކުރިއިރު އެހިސާބުން އުސައިދު ސަލާމަތުން ހުރިކަން އެނގިފައިވާކަމަށް އޭނާ ކިޔައިދިނެވެ.

"الحمد لله. މިއަދު 4 ވަނަދުވަހު 11 ޖެހިއިރު ހައިކޮމިޝަނުންވަނީ އުސައިދުގެ ވޮލެޓާއި ސްޓޫޑެންޓް ކާޑު ޕޮލިސް މެދުވެރިކޮށް އަޅުގަނޑުމެންނާ ހަވާލުކޮށްފައެވެ. ނަމަވެސް އުސައިދު އަޅުގަނޑުމެންނާ އަދި ބައްދަލެއް ނުވެއެވެ. އިރާދަކުރެއްވިޔާ ވަރަށްއަވަހަށް އުސައިދުގެ ޚަބަރެއް ވާނެއެވެ. انساءالله" އަފީފް ވިދާޅުވި އެވެ.

އަފީފް ވިދާޅުވީ ސީސީޓީވީ ކެމެރާތަކުންް ފެނުނުއިރު، އުސައިދު ހުރީ ރަތްކުލައިގެ ޓީޝާޓެއް ލައިގެން ކަމަށެވެ.