ލަންޑަން (27 މާޗް)- ކޮވިޑް-19ގެ އާ ވޭރިއެންޓާ ދެކޮޅަށް ހަދާ ބޫސްޓާ ޝޮޓްތައް 70 އަހަރުން މަތީ މީހުންނަށް އަންނަ ސެޕްޓެމްބަރު މަހު ޖަހަން ފަށާ ގޮތަށް ހަމަޖައްސައިފި އެވެ.

އިނގިރޭސިވިލާރުގެ ވެކްސިންސް މިނިސްޓަރު ނަދީމް ޒަހަވީ ވިދާޅުވި ގޮތުގައި ކޮވިޑްގެ އާ ވޭރިއެންޓާ ދެކޮޅަށް ހަދާ ބޫސްޓާ ޝޮޓްތައް 70 އަހަރުން މަތީ މީހުންނަށް ޖަހަން ތައްޔާރުވާނީ ސެޕްޓެމްބަރު މަހުގެ ނިޔަލަށެވެ.

ޑެއިލީ ޓެލެގްރާފް ނޫހަށް ނަދީމް ވިދާޅުވެފައިވަނީ ސަރުކާރުން ދަނީ އޯޓަމްއަށް ތަފާތު 8 ވައްތަރެއްގެ ވެކްސިން ޝޮޓް ލިބޭނެކަމަށް އުންމީދު ކުރަމުން ކަމަށެވެ. އަދި މީގެ ތެރޭގައި އާވޭރިއެންޓާ ދެކޮޅަށް މަސައްކަތް ކުރާނެ ޝޮޓްތަކެއް އުޅޭނެ ކަމަށް އުންމީދުކުރާ ކަމަށް ވެސް އޭނާ ވިދާޅުވެފައިވެ އެވެ.

މިޝޮޓްތައް އެންމެ ފުރަތަމަ ޖަހާނީ ފްރަންޓްލައިންގެ ހެލްތު ވޯކަރުންނާއި އުމުރުން ދުވަސްވީ މީހުންނާއި ސީރިއަސް ބަލިމަޑު ކަމެއްގައި އޫޅޭ ކޮވިޑް ޖެހުމުގެ ފުރުސަތު ބޮޑު މީހުންގެ ގަޔަށް ކަމުގައި ވެސް ނަދީމް ވިދާޅުވެފައިވެ އެވެ.

އިނގިރޭސިވިލާތުގައި މިހާތަނަށް 30 މިލިއަނެއްހާ މީހުންނަށް ވެކްސިންގެ ފުރަތަމަ ޑޯޒް ޖަހާފައިވެ އެވެ. އަދި މިހާތަނަށް 126،000 މީހުން ކޮވިޑްގެ ބަލީގައި މަރުވެފައިވާ ކަމަށް އެ ގައުމުން ރިޕޯޓުކުރެ އެވެ. -- ރޮއިޓާސް