ޖައްވުގައި ތާށިވި ދެ އެސްޓްރޮނޮޓުން ނުވަ މަސްފަހުން އެނބުރި ދުނިޔެއަށް

ނުވަ މަސްދުވަހު ޖައްވުގައި ހޭދަކުރުމަށްފަހު، ނާސާގެ ޖައްވީ އުޅަނދުގައި ތާށިވި ބަޗް ވިލްމޯރް އަދި ސުނީތާ ވިލިއަމްސް އެނބުރި ބިމަށް އަތުވެއްޖެ އެވެ.

އެމީހުން ގޮވައިގެން ދަތުރުކުރި ސްޕޭސްއެކްސް ކެޕްސިއުލް ވަނީ ބާރު ސްޕީޑެއްގައި ދުނިޔޭގެ ފަށަލައަށް ވަދެ، ހަތަރު ޕެރަޝޫޓް ހުޅުވުމާއެކު ފްލޮރިޑާގެ އައްސޭރިފަށުގައި މަޑުމަޑުން ފެނަށް ތިރިކޮށްފަ އެވެ.

މުޅި ދުނިޔޭގެ ސަމާލުކަން ލިބުނު މި އެނބުރި އައުމުގައި، އުޅަނދު ތިރިކުރި ވަގުތު ޑޮލްފިންތަކެއް ވަނީ އެ އުޅަނދުގެ ވަށައިގެން ދައުރުވެފަ އެވެ.

ރިކަވަރީ ބޯޓަކުން އެ އުޅަނދު ފެނުން ނެގުމަށްފަހު، އެސްޓްރޮނޮޓުން ވަނީ ހިނިތުންވެ އަތުން އިޝާރާތްކުރަމުން، އެހެން ފަޅުވެރިންގެ އެހީތެރިކަމާއެކު ދޮރުން ނުކުމެފަ އެވެ.

މިއީ އަށް ދުވަހަށް ރޭވިފައިވާ މިޝަނެއްގެ ނިމުމެވެ.

ބަޗް އަދި ސުނީ ބައިނަލްއަޤްވާމީ ޖައްވީ ސްޓޭޝަނަށް ދަތުރުކުރުމަށް ބޭނުންކުރި އުޅަނދަށް ޓެކްނިކަލް މައްސަލަތަކެއް ދިމާވުމާ ގުޅިގެން މި މިޝަން ވަނީ ދިގުދެމިގެން ގޮސްފަ އެވެ.

އެ ދެމީހުން ތާށިވެފައި ވަނީ މިދިޔަ ޖޫން މަހު އެމީހުން ޖައްވަށް ދަތުރު ކުރި އުޅަނދުގައި މައްސަލަޖެހި އެމީހުން ނުލާ އެ އުޅަނދު ދުނިޔެއަށް ގެނައުމުންނެވެ.

މައްސަލަ ޖެހުނީ ސުނީތާއާއި ބަޗް ދަތުރުކުރި ބޮއެންގްގެ އުޅަނދެއްގައި ކަމަށްވާއިރު ނާސާއިން ފަހުން ވަނީ އެ މީހުން ގެނެއުމަށް އުޅަނދު ތައްޔާރު ކުރަން ސްޕޭސް އެކްސްއާ ހަވާލު ކޮށްފަ އެވެ.

އެމީހުން އެނބުރި އައުމުގެ ދަތުރަށް ނެގީ 17 ގަޑިއިރެވެ.

ގިނަ ދުވަސްތަކެއް ޖައްވުގައި ހޭދަކުރަން ޖެހުމުން އެމީހުންނަށް ހަރަކާތްތެރިވުމަށް ދަތިތަކެއް ކުރިމަތިވާނެތީ ފުރަތަމަ ވަނީ ސިއްހީ ފަރުވާއަށް ގެންގޮސްފަ އެވެ. އޭގެފަހުން އާއިލާތަކާއި އަލުން ބައްދަލުކުރާނެ ކަމަށް މީޑިއާ ރިޕޯޓްތައް ބުނެ އެވެ.

އެމީހުން ވަނީ ޖައްވުގައި އެތައް ތަޖުރިބާތަކެއް ކޮށް، ބޭރު ޖައްވަށް ނުކުމެ މަސައްކަތްކޮށްފަ އެވެ. މީގެ ތެރޭގައި ސުނީ ވަނީ ޖައްވީ މަރުކަޒުން ބޭރުގައި އެންމެ ގިނަ ވަގުތު ހޭދަކުރި އަންހެނާގެ ރެކޯޑު ޤާއިމުކޮށްފަ އެވެ.

ޖައްވުގައި ގިނަ ދުވަސްތަކެއް ހޭދަކުރުމުން ހަށިގަނޑަށް އަސަރުކުރެ އެވެ. އެ ގޮތުން ކަށީގެ ބަރުދަން މަދުވެ، މަސްތައް ނެތިގެންދެ އެވެ. ލޭ ދައުރުވުމަށްވެސް އަސަރުކުރެ އެވެ. އަދި ހަށިގަނޑުގެ ދިޔާތަކެތި ބަދަލުވުމުގެ ސަބަބުން ލޮލުގެ ފެނުމަށްވެސް އަސަރުކުރެ އެވެ.

އެތާ ތިބެގެން ދިން އިންޓަވިއުތަކުގައި، ބަޗް އަދި ސުނީ ބުނެފައި ވަނީ އެމީހުން ރޭވިފައިވާ ވަގުތަށްވުރެ ދިގު މުއްދަތަކަށް ތިބުމަށް ރަނގަޅަށް ތައްޔާރުވެފައި ތިބިކަމަށެވެ. އެހެންނަމަވެސް އެމީހުން އެނބުރި އައުމުން ކުރަން ބޭނުންވާ ކަންތައްތަކެއް ހުރި ކަމަށެވެ.