ކ. ތިލަފުށިން ހުޅުމާލެއަށް 10،000 ލީޓަރުގެ ތެލާއެކު ދަތުރުކުރި ތެޔޮ ބޯޓެއް "ކުޑަ ބާނާނާ" ކައިރިއަށް މިއަދު އަޑިއަށް ހިނގައްޖެ އެވެ.

އެމްއެންޑީއެފް އިން ބުނީ ތެޔޮ ހިފައިގެން ދަތުރުކުރި "ސަވާރީ" މޫސުމް ގޯސްވެ އަޑިއަށް ދިއުމާ ގުޅިގެން ކޯސްޓްގާޑު މާލޭ އޭރިއާ ސްކޮޑްރަން އިން އެ ސަރަހައްދުގައި ހަރަކާތްތެރިވަމުން އަންނަ ކަމަށެވެ. އަދި އެ ހާދިސާގެ ރިޕޯޓް ލިބިފައި ވަނީ މިއަދު ހެނދުނު 11 ޖަހާކަންހާއިރު ކަމަށް ވެސް އެމްއެންޑީއެފް އިން ބުންޏެވެ.

"މި ބޯޓު ފެންމަތިކުރުމުގެ މަސައްކަތް ވެރިފަރާތާއި ކޯސްޓްގާޑު ގުޅިގެން އަންނަނީ ކުރަމުން،" އެމްއެންޑީއެފް އިން ބުންޏެވެ.

މި ހާދިސާ ހިނގިއިރު ތިބީ ދިވެއްސަކާއި ދެ ބިދޭސީން ތިއްބެވެ. އެ ބޯޓު އަޑިއަށް ދިއުމާ ގުޅިގެން އެ މީހުން ވަނީ އެ ސަރަހައްދުގައި އޮތް ސަފާރީއަކަށް ނަގާފައި ކަމަށް އެމްއެންޑީއެފް އިން ބުންޏެވެ.

އެމްއެންޑީއެފް އިން ބުނީ މޫސުމް ގޯސްވުމުން ކަނޑުމަތީގައި އެކިއެކި ހާދިސާތައް ހިނގަމުންދާކަމުގެ މައުލޫމާތު ލިބެމުން އަންނަ ކަމަށެވެ.