ބިލުތަކަށް ފައިސާ ނުދައްކާތީ ލަންކާ ހޮސްޕިޓަލްސް އިން އާސަންދަ ކަނޑާލައިފި

ގިނަ އަދަދެއްގެ ދިވެހިން ހިދުމަތް ހޯދާ ސްރީ ލަންކާގެ، ލަންކާ ހޮސްޕިޓަލްސް އިން އާސަންދައިގެ ދަށުން ހިދުމަތް ދިނުން ހުއްޓާލައިފި އެވެ.

ކޮލަމްބޯގައި ހުންނަ ލަންކާ ހޮސްޕިޓަލްސް އަށް ބޭސްފަރުވާ ހޯދުމަށް ދާ މީހުންނަށް އާސަންދަ ޚިދުމަތް ދިނުން މެދުކަނޑާލާފައި ވާއިރު، މިކަމާ ގުޅިގެން އާސަންދައިގެ މެނޭޖިން ޑިރެކްޓަރު އައިމިނަތު ޒީނިޔާ ވިދާޅުވީ ގިނަ ދިވެހިން ބޭސްފަރުވާގެ ޚިދުމަތް ހޯދަމުންގެންދާ ލަންކާ ހޮސްޕިޓަލްސް އިން ބިލުތަކަށް ފައިސާ ނުދައްކާތީ އާސަންދައިގެ ޚިދުމަތް ވަގުތީ ގޮތުން މެދުކަނޑާލާފައިވާ ކަމަށެވެ.

ޒީނިއާ ވިދާޅުވީ ފައިސާ ނުދައްކާ ގިނަ އަދަދެއްގެ އައުޓްސްޓޭންޑިންގ ބިލްތަކެއް ފޮނުވާފައި އެބަހުރި ކަމަށާއި އެކަމަށް ހައްލެއް ހޯދުމަށް މިހާރުވެސް މަސައްކަތް ކުރައްވަމުން ގެންދަވާ ކަމަށެވެ. ނަމަވެސް މިކަމަށް ނަގާނެ ވަކި މުއްދަތެއް އެނގިނުލައްވާ ކަމަށް ވެސް އޭނާ ވިދާޅުވި އެވެ.

"އެމީހުން މިވަގުތު ކްރެޑިޓް އަށް ޚިދުމަތް ނުދޭނެ ކަމަށް ވިދާޅުވެ އަންގާފައި އެބައޮތް.. ދެން އަޅުގަނޑުމެން މި މަސައްކަތް ކުރަނީ ވީހާވެސް އަވަހަކަށް އެކަން ހައްލު ކުރެވޭތޯ. މިހާރުވެސް މި ގެންދަނީ އެ މައްސައްކަތް ކުރަމުން،" ޒީނިޔާ ވިދާޅުވި އެވެ.

ބައެއް މީޑިއާތަކުން ރިޕޯޓްކޮށްފައިވާ ގޮތުގައި އެތައް މިލިއަން ރުފިޔާއެއްގެ ބިލްތަކެއް އެ ހޮސްޕިޓަލަށް ދައްކަން ޖެހިފައި އެބަ ހުއްޓެވެ.

އަވައްޓެރި ސްރީ ލަންކާ އަކީ ދިވެހިން އެންމެ ގިނަ އަދަދެއްގެ އުޅޭ އެއް ގައުމެވެ.

ލަންކާއަކީ ދިވެހިން ބޭސްފަރުވާގެ ޚިދުމަތް ހޯދުމަށް އެންމެ ގިނައި ދާ އެއް ގައުމެވެ. އެގޮތުން ބޭސްފަރުވާ ހޯދުމަށް އެ ގައުމުގައި ދިގު މުއްދަތަކަށް ދިރިއުޅޭ ދިވެހިން ވެސް ވަރަށް ގިނަ އެވެ.

ލަންކާގެ ހޮސްޕިޓަލަކުން އާސަންދަ ދިނުން ހުއްޓާލާފައިވާއިރު، މީގެ ކުރިން ދިވެހިންގެ ތެރެއިން ގިނަ ބަޔަކު ބޭސްފަރުވާ ހޯދަންދާ އިންޑިއާގެ މަނިޕާލް ހޮސްޕިޓަލުން ވެސް އާސަންދަ ދިނުން ވަނީ ހުއްޓާލާފަ އެވެ. އެކަމާ ގުޅިގެން އޭރު އާސަންދައިން ބުނެފައި ވަނީ އިންޑިއާގެ މަނިޕާލް ހޮސްޕިޓަލާ އެކު އޭރު އެއްބަސްވެފައިވާ އަގުތައް އެ ކުންފުނިން މުރާޖައާ ކުރަމުންދާތީވެ، އާސަންދަ ސްކީމުގެ ދަށުން އެ ހޮސްޕިޓަލަށް ބަލިމީހުން ފޮނުވުން މިވަގުތަށް ހުއްޓާލީ ކަމަށެވެ.

ލަންކާގެ ހޮސްޕިޓަލަކުން އާސަންދަ ދިނުން ހުއްޓާލާފައިވާއިރު، ޔޫއޭއީ އާއި ތައިލެންޑުގެ ހޮސްޕިޓަލްތަކުން އާސަންދަ ހޯދައިދެއްވާނެ ކަމަށް ރައީސް ޑރ. މުހައްމަދު މުއިއްޒު ވަނީ މީގެ ކުރިން ވިދާޅުވެފަ އެވެ. އޭގެ ފަހުން މިއަދާއި ހަމައަށް ވެސް އެ ދެ ގައުމުން ސިއްހީ ހިދުމަތް ހޯދާ ފަރާތްތަކަށް އާސަންދަ ލިބުމުގައި ދަތިތަކެއް ހުރި ކަމަށްވެ އެވެ.

މި ސަރުކާރު ވެރިކަމަށް އައި ފަހުން އާސަންދައިގެ ހިންގުން ވަނީ ވަރަށް ބޮޑަށް ދޯދިޔާވެފަ އެވެ. އެގޮތުން ކުރިން އާސަންދައިގެ ދަށުން ލިބުނު ގިނަ ބޭސް މިހާރު ނުލިބޭކަމުގެ ޝަކުވާ ވެސް ވަނީ ބޮޑުވެފަ އެވެ. އޭގެ ތެރޭގައި ކެންސަރު އަދި ހަކުރު ބައްޔަށް ފަރުވާ ކުރާ މީހުން ދާއިމަށް ކާން ޖެހޭ ބައެއް ބޭސްތައް ހިމެނެ އެވެ.

މީގެ އިތުރުން ދިވެހިން ކުރިން ބޭނުން ކުރަމުން އައި ވަރަށް ގިނަ ބޭސްތަކެއް މިހާރު އާސަންދައިގެ ދަށުން ނުލިބޭ ކަމުގެ ޝަކުވާ ވަނީ ބޮޑުވެފައެވެ.