އޯޓިޒަމް ހުންނަ ކުދިންނަށް އަޅާލުމާއި ލޯބި ދިނުމަކީ ޤައުމީ ވާޖިބެއް ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.

ބައިނަލްއަގުވާމީގޮތުން ފާހަގަކުރާ އޯޓިޒަމް ދުވަހާ ގުޅިގެން ސޯޝަލް މީޑިއާގައި ރައީސް މުއިއްޒު ކުރެއްވި ޕޯސްޓެއްގައި ވިދާޅުވީ ކޮންމެ ދިވެހި ދަރިއަކީ ގައުމަށް މުހިންމު، އަދި އަގުހުރި ދަރިއެއް ކަމަށެވެ. އަދި އޯޓިޒަމް ތަހައްމަލުކުރާ ކޮންމެ ކުއްޖަކީ ވެސް ގައުމަށް މަންފާކޮށްދޭނެ އެތައް ހުނަރެއް ހުރި މޮޅު ކުދިންތަކެއް ކަމަށް އެމަނިކުފާނު ވިދާޅުވި އެވެ.

ރައީސް ވިދާޅުވީ އޯޓިޒަމް ތަހައްމަލު ކުރާ ކޮންމެ ކުއްޖަކަށްވެސް އަޅާލުމާއި ލޯބި ދޭންޖެހޭ ކަމަށާއި އެއީ ގައުމީ ވާޖިބެއް ކަމަށެވެ.

ބައިނަލްއަގުވާމީ ފެންވަރުގައި އޯޓިޒަމް ދުވަސް ފާހަގަކުރަނީ އޯޓިޒަމް ހުންނަ ފަރާތްތަކުގެ ޙައްގުތަކާއި އޯޓިޒަމާ ގުޅޭގޮތުން ހޭލުންތެރިކަން އިތުރުކުރުމަށެވެ. އެންމެ ފުރަތަމަ މި ދުވަސް ފާހަގަކުރަން ފެށީ 2 އޭޕްރިލް 2007ގަ އެވެ.

އޯޓިޒަމް ހުންނަ ފަރާތްތަކަކީ މުޖުތަމަޢުގައި މުހިންމު ދައުރެއް އަދާކުރާ، އެެއްވެސް ތަފާތުކުރުމެއް ނެތި މުޖުތަމަޢުގެ ހުރިހާ ކަމެއްގައި ވެސް ބައިވެރިވުމުގެ ފުރުޞަތު ލިބެން ޖެހޭ ބައެކެ އެވެ.

އޯޓިޒަމާއި ގުޅޭގޮތުން ހޭލުންތެރިކުރުވުމުގެ ދުވަހުގެ މިއަހަރުގެ ޝިޢާރަކީ، "އެޑްވާންސިން ނިއުރޯޑައިވަސިޓީ އެންޑް ދަ ޔޫއެން ސަސްޓެއިނަބަލް ޑިވެލޮޕްމަންޓް ގޯލްސް" މި ޝިއާރެވެ. މިއީ ސިޔާސަތުތައް ކަނޑައެޅުމުގައި އޯޓިޒަމް ހުންނަ ފަރާތްތަކުގެ ބައިވެރިވުން އޮންނާނެހެން ތަރައްޤީގެ މަސައްކަތްތައް ރޭވުމަށް ބާރު އެޅުމަށް އަލިއަޅުވާލާ ޝިއާރެކެވެ.

އޯޓިޒަމް އެސޯސިއޭޝަން އޮފް މޯލްޑިވްސްއިން ބުނިގޮތުގައި މިވަގުތު އެތަނުން 168 ކުއްޖަކު އަންނަނީ ޚިދުމަތް ހޯދަމުންނެވެ.