ރައްޔިތުންގެ މަޖިލީސް މެންބަރުންނަށް މިހާރު ދޭ 20،000 ރުފިޔާގެ ލިވިން އެލަވަންސްގެ ބަދަލުގައި 35،000ރ ދިނުމަށް ހުށަހަޅުއްވާނެ ކަމަށް ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.

މިއަދު އެކްސްގައި ކުރެއްވި ޕޯސްޓެއްގައި އައްބާސް ވިދާޅުވީ ރައްޔިތުން މަޖިލީސް ގެ މެންބަރުންގެ %75 މެންބަރުންނަކީ ރާއްޖެތެރޭގެ މެންބަރުން ކަމަށްވެފައި އެޕާޓްމެންޓު ތަކުގެ ރެންޓު މިހާރު ހުރި ރޭޓަށް ބަލާއިރު މެންބަރުންނަށް ލިވިންގ އެލަވަންސްއަށް މިހާރު ލިބޭ 20،000 ރުފިޔާގެ ބަދަލުގައި 35،000 ރުފިޔާއަށް އަށް ބޮޑުކުރަން ހުށަހަޅުއްވާނެ ކަމަށެވެ.

މީގެ އިތުރުން މެންބަރުންގެ ހެލްތު އިންސުއަރެންސް ޕެކޭޖުގައި މައިންބަފައިން ހިމަނުއްވައި ދިނުމަށް އެދި ހުށަހަޅުއްވާފައި ވާނެކަމަށްވެސް އޭނާ ވިދާޅުވި އެވެ.

އައްބާސް މިހެން ވިދާޅުވެފައި މިވަނީ މަޖިލިސް މެންބަރުންގެ މުސާރައާއި އިނާޔަތްތައް ކުޑަކޮށްދިނުމަށް އެދި އާންމު ރައްޔިތުންގެ ބަޔަކު އޮންލައިން ޕެޓިޝަނެއްގައި ސޮއި ކުރަމުން ދާ ވަގުތެއްގަ އެވެ.

އައްބާސް ވަނީ އެކަމާއި ވަރަށް ބޮޑަށް ނުރުހުން ފާޅުކުރައްވާ ޕޯސްޓް ކުރައްވާފަ އެވެ.

"ސިޔާސީ ބަޔަކު އިސްވެ ތިބެ ރައްޔިތުންގެ މަޖިލީސް މެންބަރުންގެ މުސާރަ ކުޑަކުރުމަށް ބަޔަކު އިސްވެ ތިބެ ޕެޓިޝަނެއްގައި ސޮއި ކުރުވަމުންދަނީ ވަރަށް މަކަރުވެރި ރޭވުމެއްގެ ތެރެއިން! ހަޤީގަތުގައި ރައްޔިތުން ތިއްބެވީ ވަރަށް ދަތި ހާލަތުގައި، އާސަންދަ ލިބުނެއް ކަމަކު ރާއްޖެއިން ބޭރައްގޮސް ތިބުމާ، ކެއުމާ، ޓެކްސީ ހަރަދުތައް ކުރުމަށް އެތައްހާސް ރުފިޔާއެއް ހަރަދު ކުރަން ޖެހުމާ އެކު ނިކަމެތި ރައްޔިތުމީހާ އަށް ކަންކަން މަގުފަހިކޮށް ދެނީ ހަމައެކަނި ރައްޔިތުން މަޖުލީސް ގެ މެންބަރުން" އޭނާ އިއްޔެ ކުރެއްވި ޕޯސްޓެއްގައި ވެ އެވެ.

މަޖިލިސް މެންބަރުންގެ މުސާރަ ކުޑަކުރަނީ ރައްޔިތުން އިތުރަށް ނިކަމެތި ކުރުމަށް ކަމަށް އޭނާ ވިދާޅުވި އެވެ.