ޓީމޫގެ ނަމުގައި ވެސް ސްކޭމްތަކެއް ހިންގަނީ
އެމްޑީޕީގެ ކޮންގްރެސް އޮގަސްޓް 15ގެ ކުރިން ބާއްވަން ފާސްކޮށްފި
ސްކިން ޓެގްސް: ރީތިކަމަށް އެޅޭ ހިޔަންޏެއް؟
ހިތްގައިމު އަޑަކުން ކީރިތި ގުރުއާނުގެ އާޔަތްތައް ކިޔަވަމުންދާއިރު، އެތައް ބަޔެއްގެ ހިތްތަކަށް ހަމަޖެހުމާއި އުފާވެރިކަން ގެނެސްދޭ އަޑެއް އިވެ އެވެ. އެއީ ރ. މަޑުއްވަރީއަށް ނިސްބަތްވާ 26 އަހަރުގެ އައިޝަތު ލަމްހާގެ އަޑެވެ. ގުރުއާނާއި މަދަހައިގެ ދުނިޔޭގައި އޭނާ ވަނީ އެތައް ބަޔެއްގެ ހިތްތަކުގައި ޖާގަ ހޯދާފަ އެވެ.
ލަމްހާގެ ކާމިޔާބީގެ ސިއްރަކީ ކޮބައިތޯއެވެ؟
އެއީ ހަމައެކަނި އޭނާގެ ހުނަރެއް ނޫނެވެ. އެއީ އޭނާގެ ހިތްވަރުގަދަކަމާއި ފަރުވާތެރިކަމެވެ. ކުޑައިރުއްސުރެ މަދަހަ މުބާރާތްތަކުގައި ބައިވެރިވެ، އެތައް ވަނައެއް ހޯދި ލަމްހާ އަކީ މިއަދު އެފަދަ މުބާރާތްތަކުގެ ފަނޑިޔާރުކަން ކުރާ ފަރާތެކެވެ.
ލަމްހާ ބުނާގޮތުގައި ކީރިތި ގުރުއާނަށް އޭނާގެ ހިތުގައި ޝައުގުވެރިކަން އުފެދުނީ ކުޑައިރު، އޭނާގެ މާމަ ގެންގުޅޭ ރޭޑިއޯއިން 'އަލްގާރީ ހުސަރީ'ގެ ކިޔެވުމުގެ އަޑު އިވި، އެ ރާގަށް ލޯބިޖެހި، އެގޮތަށް ކިޔަވަން ދަސްކުރަން ބޭނުންވެގެންނެވެ. މިކަން ހާސިލްކުރުމަށް އެކި އެކި އެދުރުން ކައިރިއަށް ގޮސް، ތަޖުވީދާއި އޭގެ ހަމަތައް ދަސްކުރި އެވެ. އެކަމުން ފެށުނު މަސައްކަތް މިހާތަނަށް ގޮސް ކުރިއެރުން ލިބުމުން އުފާކުރާކަމަށް ލަމްހާ ބުނެފައިވެ އެވެ.
ލަމްހާ ވަނީ ގުރުއާނުގެ ހުކުމްތައް އުނގެނުމަށް އެދުރުންނާއި އެދުރުދައިތައިންގެ އިތުރުން އާއިލާގެ މެންބަރުންނާއި ރަހުމަތްތެރިންގެ އުންމީދީ ބަސްތައް ފާހަގަކޮށްލާފަ އެވެ.
ލަމްހާގެ ހިތްވަރުގަދަކަން ފެންނަނީ ހަމައެކަނި މުބާރާތްތަކުން ނޫނެވެ. ލަމްހާގެ އެންމެ ބޮޑު އުންމީދަކީ ވީހާވެސް ގިނަ ބަޔަކު ގުރުއާނަށް ލޯބިޖެއްސުމެވެ. އެގޮތުން އޭނާ މިހާރު ވަނީ ކުދި ބޮޑު އެތައް ބަޔަކަށް ގުރުއާން ކްލާސްތައް ނަގައިދޭން ފަށާފަ އެވެ.
ލަމްހާގެ މަންމަ އާއި ބައްޕަ ފާހަގަކުރި ގޮތުގައި، ގުރުއާނަށާއި އަދި އެ އުނގަންނައިދޭން ލޯބިކުރާ ކުއްޖަކަށް ލަމްހާ ވީތީ، ފަހުރުވެރިވެ އެވެ.
ގުރުއާން އުނގެނުން ކުރިއެރުވުމަށްޓަކައި ލަމްހާ އެފަދަ ދަރިވަރުންނަށް ދޭ އިރުޝާދަކީ، ފުރަތަމަ ވެސް ނަމާދުކޮށް އެކަމަށްޓަކައި އެދިގެން މާތްﷲ ހަޟްރަތުން ދެންނެވުމެވެ. އަދި އެކަމަށްޓަކައި ނުގުޑާ އަޒުމެއްގައި މަސައްކަތް ކުރުމެވެ. އޭރުން ކާމިޔާބު ލިބޭނެކަމަށް އޭނާ ޔަގީންކަން ދިނެވެ.
ލަމްހާގެ ކުރިއެރުންތަކަކީ އޭނާއަށް ލިބިފައިވާ ރަހުމަތެއް ކަމުގައި އޭނާ ދެކެ އެވެ. އަދި މި ކާމިޔާބީއާ ހަމައަށް ވާސިލްވުމަށްޓަކައި އޭނާގެ އާއިލާއަށާއި، އެހީތެރިވެދިން ފަރާތްތަކަށް އޭނާ ވަނީ ޝުކުރުގެ ބަސްތައް ރައްދުކޮށްފަ އެވެ.
ލަމްހާގެ މި އިލްހާމީ ދަތުރު ދައްކުވައިދެނީ ހިތްވަރާއި ޢަޒުމާއެކު މަސައްކަތް ކުރުމުން ކާމިޔާބީ ހާސިލު ކުރެވޭނެކަމެވެ. އޭނާގެ ހިތްވަރާއި ކެތްތެރިކަމާއި އަޒުމަކީ ހަމަ ޔަގީނުންވެސް ކޮންމެ މީހަކަށް ވެސް ނަމޫނާއެއް ކަމުގައި ދެންނެވިދާނެ އެވެ.
ލަމްހާގެ މި ނަމޫނާއިން ދައްކުވައިދެނީ ހިތްވަރާއި ޢަޒުމް ހުރިނަމަ، ކޮންމެ މީހަކަށްވެސް އެމީހެއްގެ ދާއިރާއިން ކުރިއެރުން ހޯދައި، މުޖުތަމައުއަށް ފައިދާކުރަނިވި ބަދަލުތަކެއް ގެނެވިދާނެކަމެވެ. އުނގަންނައިދިނުމުގެ އިތުރުން ލަމްހާ އަންނަނީ މިހާރު، އަމިއްލަ ވިޔަފާރިއެއް ވެސް ކުރަމުންނެވެ.
އޭނާގެ އަމިއްލަ ރެސިޕީއަކުން ހަދާ މަޖާ އަކީ އެރަށަށް ނަން މަޝްހޫރު މީރު މަޖާއެކެވެ. މި ވިޔަފާރި އަކީ ދުވަހެއް ދުވަހަކަށް ކުރިއަރަމުން އަންނަ، ގިނަ ބައެއްގެ ތައުރީފު ލިބެމުންދާ ވިޔަފާރިއެކެވެ.
ލަމްހާގެ މަޖާގެ ވިޔަފާރި ފެށުނީ ކުޑަކުޑަ ގޮތަކަށް ނަމަވެސް، މިއަދު އެ ވިޔަފާރި ވަނީ ރަށުގެ ސަރަހައްދުން ބޭރަށް ފުޅާވެ، އަތޮޅުގެ އެހެން ރަށްރަށަށްވެސް ފޯރުކޮށްދެވޭ ހިސާބަށް ގޮސްފަ އެވެ.
މިއީ ޔަގީނުންވެސް ޒުވާން އަންހެނުންނަށް ނަމޫނާއެއްގެ ގޮތުގައި ބެލިދާނެ ކާމިޔާބު ވާހަކައެކެވެ.
