ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ދޫކޮށްލި މައްސަލައިގައި އިސްތިއުނާފަށް ހުށަހަޅާފައިވާ މައްސަލަ ހައިކޯޓުން ބާތިލް ކޮށްފި އެވެ.

ހައިކޯޓުގެ އިންފޮމޭޝަން އޮފިސަރު އަމީން ފައިސަލް ވިދާޅުވީ އަލީ ވަހީދު މިހާރު ދިރިއުޅޭ އެޑްރެހެއް ނޭނގޭތީ މައްސަލައިގެ ދައުވާ ފޯމް މިއަދު ބާތިލުކޮށްފައިވާ ކަމަށެވެ.

ދައުވާ ފޯމް ބާތިލު ކުރީ އަލީ ވަހީދު އުޅޭ އެޑްރެހެއް އެނގުމުން އަލުން މައްސަލަ ހުށަހެޅުމުގެ ފުރުސަތު ޕީޖީއަށް އޮންނަ ގޮތަށް ކަމަށް ވެސް އަމީން ވިދާޅުވި އެވެ.

އަލީ ވަހީދު ރާއްޖެއިން ބޭރަށް ފުރާވަޑައިގަތީ ޖިންސީ ކުށުގެ ގިނަ ދައުވާތަކެއް އުފުލާފައި ވަނިކޮށް މައިބަދައިގެ އޮޕަރޭޝަނެއް ކުރުމަށް ކަމަށް ވިދާޅުވެ އެވެ.

އަލީ ވަހީދު ރާއްޖެއިން ބޭރަށް ފުރާވަޑައިގަތީ އޭނާގެ ޕާސްޕޯޓް ދޫކޮށްލުމަށް ކްރިމިނަލް ކޯޓުން އަމުރު ނެރުމުގެ ކުރިން ކަމަށް ވަނީ ބެލެވިފަ އެވެ.

ޕީޖީ ޝަމީމް ވިދާޅުވެފައި ވަނީ އަލީ ވަހީދުގެ ޕާސްޕޯޓު ދޫކޮށްލުމާ ގުޅޭގޮތުން އަޑުއެހުމެއް ބާއްވައި އަމުރު ނެރުނީ މި މަހުގެ ނުވަ ވަނަ ދުވަހު ކަމަށެވެ.

ނަމަވެސް ކްރިމިނަލް ކޯޓުގެ އަމުރުގައި ތާރީޚެއް ކަމަށް ލިޔެފައި ވަނީ 10 ފެބުރުއަރީ ކަމަށް ޝަމީމް ވިދާޅުވި އެވެ. އެ އަމުރުގައި އެފަދައިން އޮތަސް ނުވަ ވަނަ ދުވަހުގެ ރޭ އަލީ ވަހީދު ވަނީ ރާއްޖެއިން ބޭރަށް ފުރާވަޑައިގެންފަ އެވެ.

ޝަމީމް ވިދާޅުވިގޮތުގައި އަލީ ވަހީދު ފުރުމުގެ ޒިންމާ ނަގައި ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ ޖާމިނު ލިޔުމުގައި އޮތީ ފެބުރުއަރީ ނުވަ ވަނަ ދުވަހު އަމުރު ނެރުނު ކަމަށެވެ.

އަލީ ވަހީދު ފުރައިގެން ދިޔުމުގައި ސަރުކާރުގެ އަތެއްވާ ކަމަށް ގިނަ ބަޔަކު ތުހުމަތު ކުރެއެވެ. އަދި އެކަމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ހިމޭނުން ތިއްބަވާކަމީ އެފަދަ ތުހުމަތުތަކަށް ބާރު ލިބޭ ކަމެއް ކަމަށް ބައެއް ފަރާތްތަކުން ބުނެ އެވެ.

އަލީ ވަހީދުގެ ޕާސްޕޯޓް ދޫކޮށްލަން އަމުރު ނެރުއްވި ގާޒީ ހަސަން ސައީދުގެ މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ) އިން އަންނަނީ ބަލަމުންނެވެ.