ހޮލީވުޑްގެ ކާމިޔާބު ތަރި އޭން ހެތަވޭގެ ކުރިއަށް އޮތް ފިލްމު "ދަ ޑެވިލް ވެއާސް ޕްރާޑާ 2"ގެ ޝޫޓިންއެއްގައި އުޅެނިކޮށް އޭނާ ސިޑިން ވެއްޓިއްޖެ އެވެ.

ބުނެވޭ ގޮތުގައި އޭނާ ސިޑިން ވެއްޓުނީ ފިލްމުގެ މަންޒަރެއް ނަގަން އުޅުމުގެ ތެރޭގައި އޭނާ އަރައިގެން ހުރި އުސް ފައިވާނުގެ ހީލް ހަލާކުވެ އަރިއަޅާލައިގެންނެވެ.

އޭން ވެއްޓި އިށީނދެވުނުއިރު މާ ބޮޑު އަނިޔާއެއް އޭނާއަށް ވެފައެއް ނުވެ އެވެ. އެގޮތުން ވެއްޓުމަށްފަހު ވަގުތުން ތެދުވެ އޭނާ ރަނގަޅު ކަމަށް ބުނެފައިވެ އެވެ.

އޭނާ ވެއްޓުނު މަންޒަރުގެ ފޮޓޯތައް މިހާރު ސޯޝަލް މީޑިއާގައި ދައުރުވަމުން އަންނައިރު އެ ފޮޓޯތަކުން އޭނާއަށް ކޮންމެވެސް ވަރަކަށް ތަދުވިކަން އެނގެ އެވެ.

އެ ފޮޓޯތަކަށް ކޮމެންޓްކުރި ގިނަ ބަޔަކު ވަނީ ސިޑިން ވެއްޓުމަށްފަހު ވެސް އެކަން މާ ބޮޑު ކަމަކަށް ނުހަދައި އަލުން ޝޫޓިން ފެށުމުން އޭނާގެ މަސައްކަތަށް ބަހައްޓާ ފަރުވާތެރިކަން ފާހަގަކޮށް އޭންއަށް ތައުރީފް ކޮށްފަ އެވެ.

ޑޭވިޑް ފްރޭންކަލް ޑައިރެކްޓްކުރާ "ދަ ޑެވިލް ވެއާސް ޕްރާޑާ"ގެ އެ ސީކުއަލް ރިލީޒް ކުރަން ހަމަޖެހިފައިވަނީ އަންނަ އަހަރުގެ މެއި މަހުގެ ތެރޭގަ އެވެ.