މީޑިއާގެ މިނިވަންކަން ނެތިކޮށްލާ ގޮތަށް ރައްޔިތުންގެ މަޖިލީހަށް ހުށަހަޅާފައިވާ ބިލު އޮތީ ތަންފީޒު ކުރެވޭ ގޮތަކަށް ނޫން ކަމަށާއި ރަނގަޅު ދިރާސާއެއް އަދި މަޝްވަރާކުރުމެއް ނެތި ހުށަހަޅާފައިވާ އެ ބިލަށް ތާއިދު ނުކުރާކަން ބްރޯޑްކާސްޓިން ކޮމިޝަން (ބްރޯޑްކޮމް) އިން މިއަދު ހާމަކޮށްފި އެވެ.

ތުޅާދޫ ދާއިރާގެ މެންބަރު އަބްދުލް ހަންނާނު އަބޫބަކުރު ހުށަހަޅުއްވާފާއިވާ ބިލާ މެދު ނޫސްވެރިންނާއި މީޑިއާ ކައުންސިލާއި މޯލްޑިވްސް ޖާނަލިސްޓްސް އެސޯސިއޭޝަނާއި ބޭރުގެ ގިނަ ޖަމިއްޔާތަކަކުން ކަންބޮޑުވުން ފާޅުކޮށްފައި ވަނިކޮށް، ބިލް މަޖިލީހުން ވަނީ ބަލައިގެންފަ އެވެ.

ދައުރުން ބޭރު ޖަލްސާއެއް ބޭއްވުމަށް ފަހު ބިލު ބަލައިގަނެ، ކޮމިޓީ މަރުހަލާގެ މަސައްކަތް ވެސް ވަނީ މިހާރު ފަށައިފަ އެވެ. އެގޮތުން މިއަދު ވަނީ މަޖިލީހުގެ މިނިވަން މުއައްސަސާތަކުގެ ކޮމިޓީއަށް މޯލްޑިވްސް ބްރޯޑްކާސްޓިން ކޮމިޝަން ހާޒިރުކޮށްފަ އެވެ. އެ ބައްދަލުވުމުގައި އެ ކޮމިޝަނުން ވަނީ ބިލާ މެދު ދެކޭ ގޮތް ފުރަތަމަ ފަހަރަށް ހާމަކޮށްފަ އެވެ.

ކޮމިޝަންގެ ރައީސް ސަފާ ޝަފީގު ވިދާޅުވީ މިފަދަ ބިލެއް މަޖިލީހަށް ހުށަހަޅާއިރު، ކަމާގުޅޭ ފަރާތްތަކާ މަޝްވަރާނުކޮށް، އެއްވެސް ދިރާސާއެއް ކުރުމެއް ނެތި ހުށަހަޅާފައިވާތީ ކަންބޮޑުވާ ކަމަށެވެ. އެ ކޮމިޝަނުން ވެސް މިކަމުގައި މަޝްވަރާކުރަން ތިން ސިޓީއެއް ފޮނުވާފައިވާނެ ކަމަށާއި ނަމަވެސް، ބިލް ޑްރާފްޓްކުރުމުގައި އެ ކޮމިޝަންގެ ހިޔާލު އެއްވެސް މިންވަރަކަށް ހޯދާފައިނުވާ ކަމަށް ވިދާޅުވި އެވެ.

އޭނާ ވިދާޅުވީ މީޑިއާތައް ރެގިއުލޭޓްކޮށް ފިޔަވަޅު އެޅޭ ގޮތްތައް ގާނޫނެއްގައި ކަނޑައަޅާއިރު، ގައުމީ ފެންވަރުގެ ދިރާސާއެއް ކުރެވެން ޖެހޭނެ ކަމަށެވެ. ބިލު އޮތީ ހުރިހާ ބާވަތެއްގެ މީޑިއާއަކަށް ވެސް ހިނގާ ގޮތަށް ކަމަށްވާތީ، މިކަމުގައި އެންމެ ރަނގަޅު ގޮތަކީ ކޮބައިކަން ބެލުމަށް ދިރާސާއެއް ހެދުމަކީ ނުހަނު މުހިންމު ކަމެއްގެ ގޮތުގައި ސަފާ ފާހަގަކުރެއްވި އެވެ.

ސަފާ ވިދާޅުވީ ހިޔާލުފާޅުކުރުމުގެ މިނިވަންކަމާ މީޑިއާ ގުޅިފައި ވާތީ، އެކަމާ ގުޅޭ މާއްދާތަކެއް ލިޔާއިރު ރާއްޖޭން އެއްބަސްވެފައިވާ ބައިނަލްއަގުވާމީ މުއާހަދާތަކާ ފުށުއަރާ މިންވަރު ވެސް ބަލަންޖެހޭނެ ކަމަށެވެ.

ކުއްލި ގޮތަކަށް އެއްވެސް މިންވަރަކަށް ދިރާސާނުކޮށް، އެއްވެސް މިންވަރަކަށް ކަންކަން ނުބަލައި ބިލެއް ގެނައުމުން އެފަދަ މުއާހަދާތަކާ ހިލާފާވުމުގެ ފުރުސަތު ވެސް އޮންނާނެ ކަމަށް އޭނާ ވިދާޅުވި އެވެ.

ބްރޯޑްކާސްޓިން ކޮމިޝަންގެ ރައީސް ވިދާޅުވީ ރާއްޖެއަށް ބޭނުންވަނީ ސެލްފް ރެގިއުލޭޓްރީ ނިޒާމެއްތޯ ނޫނީ ކޯ ރެގިއުލޭޓްރީ ނިޒާމެއްތޯ ވެސް ބަލަން ދިރާސާއެއް ކުރަން ޖެހޭ ކަމަށެވެ. އަދި އެކަން ނުބަލައި ގާނޫނެއް ގެނަޔަސް އެއިން ނަތީޖާއެއް ނުނެރެވޭނެ ކަމަށް ވިދާޅުވި އެވެ.

ބިލު ޑްރާފްޓް ކުރުމުގެ މަރުހަލާގެ ތެރޭގައި ހިޔާލާއި މަޝްވަރާ ބޭނުންވަނީ އެހެންވެކަން އޭނާ ފާހަގަކުރެއްވި އެވެ.

ނޫސްވެރިން "މީޑިއާ ކޮންޓްރޯލް ބިލް"ގެ ގޮތުގައި މުހާތަބު ކުރާ ބިލު އޮތް ގޮތުން އެ ތަންފީޒު ކުރަން ފަސޭހަ ނުވާނެ ކަމަށް ސަފާ ވިދާޅުވި އެވެ. އޭނާ ވިދާޅުވީ މިހާރު ވެސް ބްރޯޑްކާސްޓިން ކޮމިޝަނުގައި މޮނީޓާކުރުމުގެ ވަސީލަތްތަކެއް ނެތް ކަމަށާއި އިންސާނީ ވަސީލަތެއް ވެސް ނެތް ކަމަށެވެ. އެހެންވެ ގާނޫނަކުން ކަންކަން އަދި ކަނޑައެޅިޔަސް، އެކަމަށް ބޭނުންވާ ވަސީލަތްތައް ފޯރުކޮށްނުދީ އެކަން ހާސިލްނުވާނެ ކަމަށް ވިދާޅުވި އެވެ.

ސަފާ ވިދާޅުވީ ހުރިހާ މީޑިއާތަކަށް ހިނގާ ގޮތަށް މި ގާނޫނު ހަދާއިރު ގިނަ އަދަދެއްގެ ގަވާއިދުތަކާއި އުސޫލުތައް ހަދަން ޖެހޭނެ ކަމަށެވެ. ސަބަބަކީ އެއީ އެއް ދުވަހަކުން ނުވަތަ އެއް މަހުން ވެސް އެކަން ނުކުރެވޭނެތީއެވެ.

އޭނާ ވިދާޅުވި ގޮތުގައި، ހުރިހާ ޕްލެޓްފޯމް އެއްކޮށްލައި، އެއް ގާނޫނެއްގެ ދަށަށް ފައްތާއިރު އެއީ އުނދަގޫ ކަމަކަށް ވާނެ އެވެ.

މީގެ އިތުރުން ކޮމިޓީގައި ވާހަކަދައްކަވަމުން ކޮމިޝަން މެންބަރު ސަރާހަތު އިއްޒަތު ވިދާޅުވީ ފިޔަވަޅު އެޅުމުގައި ކަނޑައަޅައިފައިވާ ގޮތްތަކާ މެދު ކަންބޮޑުވާކަމަށް ވިދާޅުވެފަ އެވެ. އެގޮތުން ވަކިވަކި ނޫސްވެރިން ޖޫރިމަނާކުރުމަށް އަދަދުތައް ކަނޑައެޅުމުގައި، ނޫސްވެރިންގެ އާމްދަނީއާ އެ ނޫން ވެސް މުހިންމު ކަންކަމަށް ރިއާޔަތްކުރަން ޖެހޭކަމަށް ވެސް އޭނާ ފާހަގަކުރެއްވިއެވެ.

ހަމައެއާއެކު ކޮމިސަނަކީ ބައިނަލްއަގްވާމީ ޖަމިއްޔާތަކާއި އިދާރާތަކާ ވަރަށް ގާތް ގުޅުމެއް ބާއްވާ ކޮމިސަނަކަށް ވުމާއެކު، ބްރޯޑްކޮމް އާއި މީޑިއާ ކައުންސިލް އެއްކޮށްލައި، ވަކި ކޮމިސަނެއް މި ދަނޑިވަޅުގައި ހަދައިފިނަމަ ބައިނަލްއަގްވާމީ އިދާރާތަކާއެކު ކުރަމުން އަންނަ މަސައްކަތްތައް ހުއްޓިދާނެކަމުގެ ކަންބޮޑުވުން ވެސް ފާޅުކުރެއްވިއެވެ.

ކޮމިޝަންގެ މެންބަރުން، ވަނީ މި ބިލުގެ މަގްސަދަކީ މީޑިއާ ޒިންމާދާރު ކުރުމަށް މަސައްކަތް ކުރުންކަން ގަބޫލުކުރައްވާ ކަމަށް ވިދާޅުވެފައެވެ. ނަމަވެސް މިފަދަ ބޮޑު ބިލެއް އެކުލަވައިލާއިރު، މަސްވަރާއާއި ދިރާސާ މުހިންމު ކަމަށް ވިދާޅުވިއެެވެ. އަދި ހިޔާލު ހޯދަންވާނީ ބިލު ޑްރާފްޓުކޮށް ނިންމައިފައި ނޫންކަމަށް ވެސް ކޮމިޝަނުން ބުންޏެވެ.