ސްރީލަންކާއަށް މިހާރު ކުރަމުންދާ ވިއްސާރައާ ގުޅިގެން، ގިނަ އަދަދެއްގެ ފްލައިޓްތައް ކެންސަލް ކުރަން ޖެހުމުގެ ސަބަބުން ކޮލަމްބޯ އެއާޕޯޓްގައި ގިނަ އަދަދެއްގެ ދިވެހިން ތާށިވެއްޖެ އެވެ.

ބަންޑާރަނައިކެ އިންޓަނޭޝަނަލް އެއާޕޯޓުން މާލެ އާއި ގަމަށް މިއަދު އަންނަން ހަމަޖެހިފައިވާ ސްރީލަންކަން އެއާލައިންސް ފްލައިޓްތައް ވަނީ ކެންސަލްވެފަ އެވެ.

ފްލައިޓްތައް ކެންސަލްވިކަން އެނގުނީ ގިނަ ބަޔަކު އެއާޕޯޓަށް ދިޔަފަހުންނެވެ. ލަންކާ އެއާޕޯޓްގައި ތާށިވެފައިވާ މީހުންގެ ތެރޭގައި ރާއްޖެ އަންނަ ގިނަ އަދަދެއްގެ ޓޫރިސްޓުން ވެސް ހިމެނެ އެވެ.

ލަންކާ ސަރަހައްދުގައި މިދިޔަ ބުރާސްފަތި ދުވަހު އުފެދުނު 'ޑިޓްވާ' ތޫފާނުގައި އެ ގައުމުން މިހާތަނަށް 64 މީހުން މަރުވެ، 34 މީހަކު ގެއްލިފައިވާ ކަމަށް ރިޕޯޓްތައް ބުނެ އެވެ. އެ ގައުމުގެ ސަރުކާރުން ދަނީ ތޫފާނުގައި ގެއްލުންވި ފަރާތްތަކަށް އެހީތެރިކަން ފޯރުކޮށްދިނުމާއި ގެއްލުނު މީހުން ހޯދުމުގެ މަސައްކަތް ކުރަމުންނެވެ.

ލަންކާއަކީ ގިނަ އަދަދަކަށް ދިވެހިން ދިރިއުޅެ އަދި ޒިޔާރަތް ކުރާ ގައުމަކަށްވާއިރު، ލަންކާގައި ހުންނަ ދިވެހި ހައިކޮމިޝަނުން ވަނީ ދިވެހިން ސަމާލުވެ ރައްކާތެރިވުމަށް އިލްތިމާސްކޮށްފަ އެވެ.