ކުރީ ސަރުކާރުން ހުޅުމާލެ ދެ ވަނަ ފިޔަވަހީގައި ތަރައްގީކުރި ހިޔާ ފްލެޓްތަކުގެ އެގްރިމެންޓް އެންމެނަށް ފެންނާނެހެން ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) ވެބްސައިޓްގައި އާންމުކުރަން ނިންމައިފި އެވެ.

މެނޭޖިން ޑިރެކްޓަރު ސުހެއިލް އަހްމަދު ވިދާޅުވީ އެއްބަސްވުން ވެބްސައިޓަށް އަޕްލޯޑް ކުރުމުން ސޮއިކުރަން ގޮސް އެއްބަސްވުން ކިޔުމުގެ ބަދަލުގައި ގޮސް ހަމައެކަނި ޖެހޭނީ ފައިނަލްކޮށްލައި، ސޮއި ކޮށްލަން ކަމަށެވެ. އަދި މިހާރު ކުންފުނިން ދަނީ އެއްބަސްވުންތައް ތައްޔާރު ކުރުމުގެ މަސައްކަތް ކުރަމުން ކަމަށް އޭނާ ވިދާޅުވި އެވެ.

އޭނާ ވިދާޅުވީ ގުރު ނަގައި ނުނިމި ހުރި ކެޓެގަރީތަކުގެ ގުރުނެގުން މާދަމާ ފަށާނެ ކަމަށެވެ.

ސުހެއިލް ވިދާޅުވީ މާދަމާ އިން ފެށިގެން 10 ދުވަހުގެ ތެރޭ ގުރުނަގައި ނިމޭނެ ކަމަށާއި ގުރު ނަގައި ނިމޭއިރަށް އެއްބަސްވުން ސޮއި ކުރުން އޮންނާނެ އެވެ. ލައިވް ކޮށްގެން ގުރު ނެގުން ކުރިއަށް ގެންދާއިރު ދުވާލަކު ގުރުނެގޭނެ ކަމަށް ލަފާ ކުރެވެނީ 600 ފްލެޓަށެވެ.

އިތުރަށް ސުހެއިލް ވިދާޅުވީ ފްލެޓްގެ ތަޅުދަނޑި ހަވާލު ކުރުމާއެކު މަސައްކަތް ނިންމަން ތިން މަސް ދުވަހުގެ މުއްދަތު ދޭނެ ކަމަށެވެ. ނުނިމި ހުރީ ތަށިމުށި ޖެހުމާއި ފާހާނާތަކުގެ ދޮރާއި ލައިޓާއި ފަންކާ ހަރު ކުރުން ކަމަށް ވެސް އޭނާ ވިދާޅުވި އެވެ.