އެސްއެސްސީ އިމްތިހާނުގެ މާއްދާއެއްގެ ގޮތުގައި ގުރުއާން ހިމެނުމަށް އެޑިއުކޭޝަން މިނިސްޓްރީއިން ނިންމައިފި އެވެ.

މިކަން ހާމަކުރައްވާފައި ވަނީ ދިރާސީ އާ އަހަރުގެ ކިޔެވުން ފެށުމާ ގުޅިގެން އެޑިއުކޭޝަން މިނިސްޓަރު ޑރ. އިސްމާޢީލް ޝަފީއު ދެއްވި ޚިތޯބުގަ އެވެ.

މިނިސްޓަރު ވިދާޅުވީ މިކަމުގެ މަގުސަދަކީ ކީރިތި ގުރުއާނުގެ އިލްމަށް ދަރިވަރުންގެ ހިތްތަކުގައި ލޯބިޖައްސުވައި، ގުރުއާނުގެ އިލްމަށް ދަރިވަރުން ޝައުގުވެރިކުރުވުން ކަމަށެވެ. އެހެންކަމުން، 2027 ވަނަ އަހަރުގެ ސާނަވީ އިމްތިހާނުގައި ގުރުއާން މާއްދާ ރަސްމީކޮށް ހިމަނައި ރާއްޖޭގެ ދަރިވަރުންނަށް އެ އިމްތިހާނު ދިނުމަށް ހަމަޖެހިފައިވާ ކަމަށް ވެސް ޝަފީއު ވިދާޅުވި އެވެ.

މި ފެށުނު ދިރާސީ އަހަރު، އެންމެ ބޮޑު އިސްކަމެއް ދޭނީ ދަރިވަރުންގެ ކިބައިގައި ރިވެތި އަޚުލާގު އަށަގެންނެވުމަށް ކަމަށާއި، ރާއްޖޭގެ ސްކޫލު މަދަރުސާތަކުގައި ތައުލީމު ހާސިލުކުރަމުންދާ ކޮންމެ ދަރިވަރަކީ ވެސް، ރިވެތި އާދަތަކާއި ސިފަތަކުން ޖަރީވެފައިވާ، އެކަކު އަނެކަކަށް އިހުތިރާމް ކުރާ ދަރިވަރުން ތަކަކަށް ހެދުމަށް، ތަރުބަވީ ހާއްސަ ޕްރޮގްރާމެއް، މި ދިރާސީ އަހަރުގެ ތެރޭގައި ފަށައިގެން ކުރިއަށް ގެންދާނެ ކަމަށް ވެސް އޭނާ ވިދާޅުވި އެވެ.

ކޮންމެ ދަރިވަރަކީ އަމިއްލަ އުނގެނުމަށް ޒިންމާވާ ދަރިވަރަކަށް ވުމަށް ނަސޭހަތްތެރިވެ އިސްލާމް ދީނަށް ލޯބިކުރާ، މައިން ބަފައިންނަށް ކިޔަމަންތެރިވާ، އެކަކު އަނެކަކަށް އިހްތިރާމްކުރާ، އުނގެނުމަށް ލިބިފައިވާ ރަނުގެ ފުރުސަތުގެ ބޭނުން އެންމެ ހެޔޮގޮތުގައި ހިފުމަށް މިނިސްޓަރު ވަނީ ނަސޭހަތްތެރި ވެސް ވެފަ އެވެ.

ޝަފީއު އިތުރަށް ވިދާޅުވީ ރާއްޖޭގެ ރަސްމީ ތަޢުލީމީ ނިޒާމަށް އިންގިލާބީ ހެޔޮ ބަދަލުތަކެއް ގެނައުމުގެ ބޮޑެތި މަސައްކަތްތަކެއް މިއަހަރުގެ ތެރޭގައި ވެސް، ކުރިއަށް ގެންދިޔުމަށް ރާވާފައިވާ ކަމަށެވެ.

ދޮޅު މަހުގެ ޗުއްޓީއަކަށް ފަހު 80،715 ދަރިވަރުންނާއެކު ދިރާސީ އާ އަހަރުގެ ކިޔެވުން ފަށީ އަންގާރަ ދުވަހު އެވެ.