މޯލްޑިވްސް ބްލަޑް ސާވިސަސްގެ ބްލަޑް ބޭންކްގައި ހުރި ރިޒާވް މަދުވެ އާއްމުންގެ އެހީއަށް އެދިފައިވާއިރު ހިތާމައާއެކު ފާހަގަކުރަން ޖެހޭ ކަމަކީ މިއީ އަހަރުމެން ދިވެހިންގެ ތެރެއިން ގިނަ ބަޔަކު ފަސްޖެހޭ ކަމެއް ކަމެވެ.

ލޭ ހަދިޔާ ކުރުމަކީ އިޖުތިމާއީ ގޮތުންނާއި ދީނީ ގޮތުން ވެސް ކުރުން އެދެވިގެންވާ ކަމަކަށް ވާއިރު ގިނަ މީހުން އެކަމަށް ފަސްޖެހެނީ އެކަމާ މެދު ކުރެވޭ ކުށްހީތަކެއްގެ ސަބަބުންނެވެ.

ދިފާއީ ނިޒާމު ބަލިކަށިވޭ

މިއީ އެންމެ ގިނަ މީހުން ލޭ ހަދިޔާ ކުރަން ބިރުގަންނަ ސަބަބެވެ. އެހެން ނަމަވެސް ސިއްހަތު ރަނގަޅަށް ހުރި މީހެއްގެ ލޭގައި ފުދޭވަރަށް ރެޑް ބްލަޑް ސެލްސް ހުންނައިރު ލޭ ހަދިޔާ ކުރާތާ ހަފްތާއެއްހާ ދުވަސް ތެރޭގައި އާއްމު މިނަށް އާދެ އެވެ.

އިންފެކްޝަންތަކަށް މަގުފަހިވޭ

ލޭ ހަދިޔާ ކުރުމުގައި ބޭނުންކުރެވޭ ހުރިހާ އާލާތަކީ ވެސް ސްޓެރައިލް ކުރެވިގެން ބޭނުންކުރާ އާލާތްތަކެވެ. އެހެން ކަމުން އެކަމުގައި އިންފެކްޝަންގެ ފުރުސަތު ވަރަށް ކުޑަ އެވެ.

ބަރުދަން ލުއި މީހުންނަށް ލޭ ހަދިޔާ ނުކުރެވޭނެ

ލޭ ހަދިޔާ ކުރުމުގައި ބަލަނީ މީހާގެ ބަރުދަނަކަށް ނޫނެވެ. އެހެނެއްކަމަކު އޭނާގެ އާއްމު ސިއްހަތަށާއި އެކަމާ ގުޅުންހުރި ކަންކަމަށް ކަމަށް ޑޮކްޓަރުން ބުނެ އެވެ.

ހޯމޯންތަކަށް ބަދަލު އާދޭ

އަންހެނުން ލޭ ދިނުމަށް ފަސްޖެހޭ މައިގަނޑު އެއް ސަބަބަކީ އެކަމުގެ ސަބަބުން ހޯމޯންތަކަށް އަސަރުކޮށް މައްސަރު ކަންތަކަށް ބުރޫ އަރާފާނެ ކަމުގެ ބިރަށެވެ. އެހެންނަމަވެސް މިއީ ކުށްހީ އެކެވެ.

ގަވާއިދުން ލޭ ހަދިޔާ ކުރާނަމަ އެނީމިއާ ޖެެހޭ

ގަވާއިދުން ލޭ ހަދިޔާ ކުރާނަމަ އެނީމިއާ ޖެހޭ ކަމަށް ގަބޫލު ކުރެވިފައި އޮންނަ އޮތުމަކީ ކަނޑައެޅިގެން ކުށްހީއެއް ކަމަށް ސިއްހީ މާހިރުން ވިދާޅުވެ އެވެ.