ހިތުގެ ބަލިތަކަށް މަގުފަހިވުމުގައި ކޮލެސްޓްރޯލް މަތިވުން، ލޭ މައްޗަށް ދިއުން، އަދި ނުރަނގަޅު ސިއްހީ އާދަތަކަކީ އާންމުކަންކަން ގޮތުގައި ބެލެވިފައި އޮންނަ ކަންކަމެވެ.

ނަމަވެސް ފަހުގެ ދިރާސާތަކުން ދައްކާ ގޮތުން ވައި ނުސާފުވުމަކީވެސް ހާޓް އެޓޭކް ޖެހުމަށް މަގުފަހި ކުރުވާ ކަމެކެވެ. އިޓަލީގެ ޔުނިވަސިޓީ އޮފް ޕޮލިޓެކްނިކޯ ޑި މިލާނޯގެ ސައެންސްވެރިންގެ ދިރާސާތައް އާންމުކުރާ ގްލޯބަލް ޗެލެންޖަސް ކިޔާ ޖާނަލްގައި ޝާއިއުކޮށްފައިވާ ދިރާސާއެއްގައި ބުނެފައިވާ ގޮތުން ވައި ނުސާފުވުމުގެ ސަބަބުން ހާޓް އެޓޭކް ޖެހުމުގެ ނުރައްކާ ބޮޑުކަން ވަނީ ކަށަވަރު ކުރެވިފަ އެވެ.

މި ދިރާސާ ހަދާފައި ވަނީ 2016 ވަނަ އަހަރާއި 2019 ވަނަ އަހަރާ ދެމެދު ހޮސްޕިޓަލަށް ނުގެންދެވެނީސް ހާޓް އެޓޭކް ޖެހުނު 3،7613 މީހެއްގެ ސިއްހީ ހާލަތު ދިރާސާކޮށްގެންނެވެ. މިއިން ކޮންމެ މީހެއްގެ ހާލަތު ވަކިން ދިރާސާކުރުމުގައި، އެ މީހުންނަށް ހާޓް އެޓޭކް ޖެހުމުގައި ވައި ނުސާފުވުމުގެ ދައުރު އޮތް މިންވަރު ބެލުމަށް، ވައިގެ ތެރޭގައި ކުނިބުނި އެކުލެވޭ މިންވަރު ވެސް ދިރާސާކޮށްފައިވެ އެވެ.

ވައި ނުސާފުވާ މިންވަރާއި ހާޓް އެޓޭކް ޖެހުމާ ދެމެދު ގުޅުމެއް ވާކަން ނުވަތަ ނުވާކަން ދެނެގަތުމަށް، މި ދިރާސާގައި ބޭނުންކުރީ ސްޕާޓިއޯ-ޓެމްޕޯރަލް ސްޓެޓިސްޓިކަލްގެ ޒަމާނީ މޮޑެލްތަކެވެ.

އެ ދިރާސާއިން ފާހަގަކުރެވުނީ ނުސާފު ވައިގައި ހިމެނޭ ނައިޓްރިޖަން ޑައިއޮކްސައިޑާއި، ހާޓް އެޓޭކް ޖެހުމާ ވަރަށް ބޮޑު ގުޅުމެއް އޮތް ކަމަށެވެ. ވައިގެ ތެރޭގައި ނައިޓްރިޖަން ޑައިއޮކްސައިޑް އެކުލެވޭ މިންވަރު އިތުރުވާ ނަމަ، ކުރިއަށް އޮތް 96 ގަޑިއިރުގެ ތެރޭގައި ހާޓް އެޓޭކް ޖެހުމުގެ ނުރައްކާ ހަތް ޕަސެންޓް އިތުރުވާނެ ކަމަށް ދިރާސާކުރި ސައިންސްވެރިން ވަނީ ބުނެފަ އެވެ.

ދިރާސާގައި ބުނެފައިވާ ގޮތުން ވައި ނުސާފުވުމުން ހާޓް އެޓޭކް ޖެހޭ މިންވަރު އިތުރުވާކަން ފާހަގަ ކުރެވެނީ ބޮޑަށް ތަރައްގީވެ، ވައި ނުސާފުވާ ފަދަ ދުން ބޭރުކުރާ ސަރަހައްދުތަކުގަ އެވެ. މީގެ އިތުރުން އެފަދަ ދުމުގެ އަސަރުކުރާ ސަރަހައްދުތަކަށް ވެސް މި ނުރައްކާ އޮތް ކަމަށް ސައިންސްވެރިން ވަނީ ބުނެފަ އެވެ.

ވައި ނުސާފުވުމުން ހާޓް އެޓޭކް ޖެހުމުގެ ނުރައްކާ، ހޫނު ދުވަސްވަރު ވަކިން ބޮޑުކަން ވެސް މި ދިރާސާގައި ފާހަގަކޮށްފައިވެ އެވެ.

ދުނިޔޭގެ ސިއްހަތު ޖަމިއްޔާއިން ބުނެފައިވާ ގޮތުގައި ގައިން ގަޔަށް ނާރާ ބަލިތައް ފެތުރުމަށް މެދުވެރިވާ ތިމާވެށީގެ މައްސަލަތަކުގެ ތެރެއިން ދެ ވަނައަށް އެންމެ ގިނައިން ބަލިތައް ޖައްސަނީ ތަޣައްޔަރުވެފައިވާ ވަޔެވެ. ވައި ނުސާފުމުގެ ސަބަބުން ސިއްހީ މައްސަލަތައް ދިމާވެ ދުނިޔޭގެ އެކި ކަންކޮޅުތަކުން އަހަރެއްގެ މައްޗަށް އެތައް ބަޔަކު މަރުވެ އެވެ.

ރާއްޖޭގައި ވެސް މިހާރަކަށް އައިސް ވައި ނުސާފުވާ މައްސަލަ ދަނީ ކުރިމަތި ވަމުންނެވެ. އެގޮތުން އާންމު ގޮތެއްގައި އަވަށްޓެރި އިންޑިއާއިން ޖައްވަށް ބޭރުކުރާ އިންޑަސްޓްރިއަލް ދުމުގެ އަސަރު ރާއްޖެއަށް ވަރަށް ބޮޑަށް ދަނީ ކުރަމުންނެވެ. އައިކުއޭ އެއާގެ ރެކޯޑްތައް ދައްކާ ގޮތުގައި، މިދިޔަ މަހެއްހާ ދުވަހު ރާއްޖޭގެ ޖައްވު ވަނީ ނުރައްކާތެރި މިންވަރަށް ބޮޑަށް ނުސާފުވެފަ އެވެ. މިދިޔަ މަހެއްހާ ދުވަހު މާލެ ސަރަހައްދުގެ ވައިގެ ކޮލެޓީ އެވްރެޖުކޮށް ހުރީ 63 - 172 އާ ދެމެދުގަ އެވެ.