ޓްރާންސްޕޯޓް އޮތޯރިޓީން ވަކިކުރި ނުވަ މީހަކަށް ވަޒީފާ ދޭން ވަޒީފާއާ ބެހޭ ޓްރައިބިއުނަލުން މިއަދު ހުކުމް ކޮށްފި އެވެ.

އެ މީހުންގެ ދިފާއުގައި ވަކާލާތު ކޮށްފައި ވަނީ ޕަބްލިކް އިންޓްރެސްޓް ލޯ ސެންޓަރުންނެވެ. އެ ސެންޓަރުން މިރޭ ނެރުނު ބަޔާނެއްގައި ވަނީ އެ ނުވަ މީހުން ވަޒީފާ އިން ވަކިކޮށްފައި ވަނީ މައުޟޫއީ އަދި އިޖުރާއީ އަދުލުވެރިކަން ގާއިމް ނުކޮށް ކަމަށް ޓްރައިބިއުނަލުން ކަނޑައަޅާފައިވާ ކަމަށެވެ. އެހެންކަމުން އެ އެންމެން ކުރިން އަދާކުރަމުން ދިޔަ ވަޒީފާ އިޔާދަކޮށްދިނުމަށާއި ވަޒީފާ އިޔާދަކޮށްދޭ ދުވަހާ ހަމައަށް ލިބެންޖެހޭ މުސާރަ އާއި އިނާޔަތްތައް ދިނުމަށް ވެސް ޓްރައިބިއުނަލުން ވަނީ އަމުރުކޮށްފަ އެވެ.

"މުވައްޒަފުން ވަޒީފާ އިން ވަކިކުރެވޭނީ އެކަށީގެންވާ ސަބަބަކާ ލައިގެން އަދި ވަޒީފާ އިން ވަކިކުރުމުގައި އަމަލު ކުރަންޖެހޭ މައުޟޫއީ އަދުލުވެރިކަމާއި އިޖުރާއީ އަދުލުވެރިކަން ގާއިމްކުރުމަށްފަހު އެވެ. މިކަންކަން ގާއިމް ނުކޮށް މުވައްޒަފުން ވަޒީފާ އިން ވަކިކުރުމަކީ އެ މުވައްޒަފުންނަށް ވެވޭ ބޭއިންސާފެކެވެ،" ޕަބްލިކް އިންޓްރެސްޓް ލޯ ސެންޓަރުން ނެރުނު ބަޔާނުގައިވެ އެވެ.

ޓްރާންސްޕޯޓް އޮތޯރިޓީގެ ގިނަ ބަޔަކު ވަޒީފާ އިން ވަކިކުރި މައްސަލާގައި ގިނަ ބައެއްގެ ފާޑުކިޔުން މިނިސްޓަރު އައިޝަތު ނަހުލާ އަށް ވަނީ އަމާޒުވެފަ އެވެ.