އެމެރިކާއާއި އިޒްރޭލުން އީރާނަށް ހަމަލާދީ އެ ގައުމުގެ އެންމެ މަތީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުން ކުރީގެ ރައީސް މައުމޫން އަބްދުލްގައްޔޫމް ކުށްވެރިކުރައްވައިފި އެވެ.

ރައީސް މައުމޫން އެކްސްގައި މިރޭ ކުރެއްވި ޕޯސްޓެއްގައި ވިދާޅުވީ އިހްލާސްތެރި މުސްލިމެއްގެ ހައިސިއްޔަތުން، އީރާނުގެ އެންމެ މަތީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމަށް ހިންގި ރަހުމުކުޑަ އަދި އިހާނެތި އަމަލު ހަރުކަށި އިބާރާތުން ކުށްވެރިކުރައްވާ ކަމަށެވެ.

"މާތްﷲ އެމަނިކުފާނުގެ ފުރާނަފުޅަށް ރަހުމަތްލައްވައި، ސުވަރުގޭގެ ދާއިމީ ނިއުމަތް މިންވަރުކުރައްވާށިއެވެ. އަދި މި ހިތާމައިގެ ވަގުތުގައި އެމަނިކުފާނުގެ އާއިލާއަށާއި އީރާނުގެ ރައްޔިތުންނަށް ކެތްތެރިކަމާއި ސާބިތުކަން ދެއްވާށިއެވެ. އާމީން" ރައީސް މައުމޫން އިނގިރޭސިބަހުން ލިޔުއްވާފައި ވެއެވެ.

ރައީސް މައުމޫން ވަނީ އެމެރިކާއާ އިޒްރޭލުން އީރާނަށް ހަމަލާދޭން ފެށުމުން އެކަމާއި ގުޅޭ ގޮތުން މީގެ ކުރިންވެސް ނުރުހުން ފާޅުކުރައްވާފަ އެވެ. އެގޮތުން އެމެރިކާ އާ އިޒްރޭލާއި ގުޅިގެން އީރާނަށް ދިން ވަރުގަދަ އުދުވާނީ ހަމަލައަށް މެދުއިރުމަތީގެ ހަމަނުޖެހުމޭ ކިޔުމަކީ ވަރަށްބޮޑު ބޭއިންސާފެއް ކަމަށް އެމަނިކުފާނު ވިދާޅުވި އެވެ. އެގޮތުން ހަގީގަތް ބުނަން ކެރެންޖެހޭ ކަމަށްވެސް ރައީސް މައުމޫން ވިދާޅުވި އެވެ.

ރައީސް މައުމޫން ފާހަގަކޮށްލެވެނީ އިސްލާމީ ގައުމުތަކާއި ލީޑަރުންގެ ދިފާއުގައި ވަރަށް ފާޅުގައި ބަސްފުޅު ވިދާޅުވާ ބޭފުޅެއްގެ ގޮތުގަ އެވެ. އެގޮތުން އެންމެ ކުރިންފެށިގެން ފަލަސްތީނުގެ ދިފާއުގައި ވަކާލާތު ކުރައްވާ، ވެރިކަމުގެ ދުވަސްވަރު ފަލަސްތީނާއި ގާތް ގުޅުމެއް ގާއިމު ކުރައްވާފައި ވެއެވެ.

ހާމަނާއީ އަވަހާރަކޮށްލުމާއި ގުޅިގެން ދިވެހި ސަރުކާރުން ހަނު ތިބުމާއި ގުޅިގެން އާއްމުންގެ ފާޑުކިޔުން ވަނީ އަމާޒުވެފަ އެވެ.