ހަނގުރާމައިގެ ސަބަބުން ގަލްފުގެ ހަކަތައިގެ އެކްސްޕޯޓް ކުރިއަށްއޮތް މަދު ހަފުތާތަކެއްގެ ތެރޭގައި ހުއްޓިދާނެކަމުގެ އިންޒާރު ގަތަރުން ދީފި އެވެ.

އީރާނާ ދެކޮޅަށް ކުރާ ހަނގުރާމަ އިތުރަށް ވަރުގަދަވަމުންދާނަމަ، މަދު ހަފުތާތަކެއްގެ ތެރޭގައި ގަލްފު ސަރަހައްދުން ބޭރުކުރާ ހަކަތަ މުޅިން ހުއްޓި، ދުނިޔޭގެ ހަކަތައިގެ ބާޒާރަށް ބޮޑެތި ލޮޅުންތަކެއް އަރާފާނެ ކަމަށް ގަތަރުގެ އެނާޖީ މިނިސްޓަރު ސާދު އަލް-ކައުބީ ވިދާޅުވެއްޖެ އެވެ.

ފައިނޭންޝަލް ޓައިމްސް ނޫހަށް ދެއްވި އިންޓަވިއުއެއްގައި ކައުބީ ވިދާޅުވީ، ހަނގުރާމަ މިގޮތަށް ދިގުލައިގެން ގޮސްފިނަމަ، ދުނިޔޭގެ އިގްތިސާދީ ދުވެއްޔަށް އޭގެ ނޭދެވޭ އަސަރުކުރާނެ ކަމަށެވެ. އަދި ހަކަތައިގެ އަގުތައް އިންތިހާއަށް އުފުލި، ބައެއް އުފެއްދުންތައް ލިބުމުގައި ދަތިތަކާ ކުރިމަތިވާނެ ކަމަށާއި، އޭގެ ސަބަބުން ފެކްޓްރީތަކުގެ ސަޕްލައި ޗެއިނަށް ބޮޑެތި ހުރަސްތަކެއް ކުރިމަތިވާނެ ކަމަށް އޭނާ ފާހަގަކުރެއްވި އެވެ.

އެމެރިކާއާއި އިޒްރޭލުން ދިން ހަމަލާތަކަށް ރައްދު ދިނުމުގެ ގޮތުން އީރާނުން ގަތަރާއި ގަލްފުގެ އަވަށްޓެރި ގައުމުތަކަށް އަމާޒުކޮށް މިސައިލާއި ޑްރޯން ހަމަލާތައް ދޭން ފެށުމާ ގުޅިގެން، ގަތަރުން ވަނީ މިދިޔަ ހޯމަ ދުވަހު ގުދުރަތީ ގޭސް އުފެއްދުން ހުއްޓާލާފަ އެވެ. އީރާނުގެ ހަމަލާތައް ހަކަތައިގެ ވަސީލަތްތަކަށް އަމާޒުވަމުން ދިއުމަކީ ދުނިޔޭގެ ބާޒާރުގައި ގޭހުގެ އަގު އުފުލި، ބައިނަލްއަގުވާމީ މުޖުތަމައު ކަންބޮޑުވުމެއްގެ ތެރެއަށް ވެއްޓިފައިވާ ކަމެކެވެ.

ދުނިޔެއަށް ބޭނުންވާ އެލް.އެން.ޖީގެ ގާތްގަނޑަކަށް %20 ސަޕްލައި ކުރަނީ ގަތަރުންނެވެ. އެހެންކަމުން، އޭޝިއާ އަދި ޔޫރަޕްގެ ބާޒާރުތަކަށް ބޭނުންވާ ހަކަތަ ފޯރުކޮށްދިނުމުގައި ގަތަރަކީ މުހިންމު ދައުރެއް އަދާކުރާ ގައުމެކެވެ.

މިނިސްޓަރު އިތުރަށް ވިދާޅުވީ، ހަނގުރާމަ މިހާރުން މިހާރަށް ހުއްޓުނު ނަމަވެސް، ކުރިން ހުރި ހާލަތަށް ރުޖޫއަވެ، އާންމު އުސޫލުން ތަކެތި ފޯރުކޮށްދިނުމަށް ހަފުތާތަކެއް ނުވަތަ މަސްތަކެއް ނަގާނެ ކަމަށެވެ.

ބްރަސަލްސް އިންސްޓިޓިއުޓް ފޯ ޖިއޯޕޮލިޓިކްސްގެ ތަޖުރިބާކާރު ތައިސް ވެން ޑި ގްރާފް ވިދާޅުވި ގޮތުގައި، ގަލްފުގެ މުހިންމު ކަނޑުއޮޅިއެއް ކަމަށްވާ ހޮރްމުޒް ކަނޑުއޮޅިން ދަތުރުކުރާ ތެޔޮ ޓޭންކަރުތަކުގެ އަދަދު ވަނީ ހަނގުރާމައިގެ ސަބަބުން ވަރަށް ބޮޑަށް ދަށްވެފަ އެވެ. އޭނާ ވިދާޅުވީ، މި މަގުން މުދާ އެކްސްޕޯޓްކުރާ ހުރިހާ ގައުމުތަކަކަށްވެސް އުފެއްދުންތައް ހުއްޓާލަން މަޖުބޫރުވާނެ ކަމަށާއި، އިރާގުން މިހާރުވެސް ބައެއް ތެޔޮ ވަޅުތަކުގެ މަސައްކަތް ހުއްޓާލާފައިވާ ކަމަށެވެ. މީގެ ސަބަބުން ދިގު މުއްދަތަކަށް ނޭދެވޭ އަސަރުތަކެއް ކުރާނެ ކަމުގެ އިންޒާރު އޭނާ ދެއްވި އެވެ.

ހަނގުރާމަ ހުއްޓޭނެ ކަމުގެ އެއްވެސް ނިޝާނެއް އަދި ފެންނާކަށް ނެތެވެ. އެމެރިކާގެ ބައެއް އިސް އޮފިޝަލުން އީރާނަށް ބޮޑެތި ގެއްލުންތަކެއް ދޭނެ ކަމުގެ އިންޒާރު ދެމުންދާއިރު، އެއްގަމު މަގުން ހަމަލާއެއް ދީފާނެ ކަމުގެ ބިރުވެސް އޮތީ ބޮޑުވެފަ އެވެ.

މިކަމާ ގުޅިގެން އީރާނުގެ ރައީސް މަސްއޫދު ޕެޒެޝްކިއަން ވިދާޅުވީ، އީރާނަކީ ސަރަހައްދުގެ ދާއިމީ ސުލްހައަށް ބާރުއަޅާ ގައުމެއް ނަމަވެސް، ގައުމުގެ ކަރާމާތާއި އިސްތިގުލާލު ދިފާއުކުރުމުގައި ފަސްނުޖެހޭނެ ކަމަށެވެ. އަދި ސުލްހައިގެ މަޝްވަރާތައް އަމާޒުކުރަންޖެހޭނީ އީރާނުގެ ރައްޔިތުންނަށް ދަށްކޮށް ހިތައި، މި ހަނގުރާމަ ފެށި ފަރާތްތަކަށް ކަމަށް ވިދާޅުވެ، އޭނާ ވަނީ އެމެރިކާއާއި އިޒްރޭލަށް ނުސީދާކޮށް ރައްދު ދެއްވާފަ އެވެ.