ބަންޑާރަ މިސްކިތަކީ އާސާރީ ތަރިކައިގެ ތެރޭ ހިމެނޭ ތަނެއް ނޫން ކަމަށާއި، އެހެންކަމުން އެތަނުގައި އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރަން ބޭނުންވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އަޅަން ބޭނުންވާ އެހީތެރިކަން، ދީލަތި ފަރާތަކުން ހަމަޖައްސައިދީފައިވާ ކަން ހާމަކުރައްވަމުން މިނިސްޓަރ ވިދާޅުވީ ބަންޑާރަ މިސްކިތް ހުންނަ ތަނުގައި ޒަމާނީ މިސްކިތެއް އެޅުމުގެ މަސައްކަތް ރޯދައިގެ ފަހުން ފަށުމަށް ނިންމާފައިވާ ކަމަށެވެ.

މިނިސްޓަރުގެ އެކަން ހާމަކުރެއްވުމާއެކު ގިނަ ބަޔަކު ވަނީ އެކަމާ ނުރުހުންފާޅުކޮށް ވާހަދައްކާފަ އެވެ. އެގޮތުން ބަންޑާރަ މިސްކިތަކީ 100 އަހަރުވެފައިވާ ދުވަސްވީ އާސާރީ ބިނާއެއް ކަމަށް ގިނަ ބަޔަކު ބުންޏެވެ. އަދި އެހާ ދުވަސްވީ ބިނާއެއް ހިމާޔަތްކުރަންޖެހޭނެ ކަަމަށާއި، ސަރުކާރުގެ ނިންމުން ބަދަލުކުރަން ގިނަ ބަޔަކު ސޯޝަލް މީޑިއާގައި ވަނީ ގޮވާލައިފަ އެވެ.

ކަން އެހެން އޮއްވައި އެކްސްގައި ކުރެއްވި ޕޯސްޓެއްގައި ޝަހީމް ރޭ ވިދާޅުވީ، ބަންޑާރަ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމަނާފައި އޮންނަ މިސްކިތެއް ނޫން ކަމަށެވެ. އެހެންކަމުން އެތަނުގައި ބޮޑު މިސްކިތެއް ބިނާކުރަން ގަސްތުކުރީ ކަމަށް މިނިސްޓަރު ވިދާޅުވި އެވެ.

އެހެން ނަމަވެސް މިނިސްޓްރީން ކަންކަން ކުރާނީ ރައްޔިތުންގެ އަޑުއެހުމަށް ފަހު އެއާ އެއްގޮތަށް ކަމަށާއި، އެތަނުގައި އާ މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރާން ބޭނުންވާ ކަމަށް ޝަހީމް ވިދާޅުވި އެވެ.

ބަންޑާރަ މިސްކިތަކީ އެއީ، ވޯރާ ވިޔަފާރިވެރިން ބިނާކުރި ވަރަށް ޒަމާންވީ މިސްކިތެކެވެ. އެތަނަށް އެކި ޒަމާނުގައި ބަދަލުތައް ގެނެސްފައިވެ އެވެ. އެގޮތުން އެ މިސްކިތަށް، ކުރީގެ ރައީސް އިބްރާހީމް ނާސިރާއި މައުމޫން އަބްދުލްގައްޔޫމްގެ ވެރިކަމުގައި ބޮޑެތި ބަދަލުތަކެއް ގެނަ އެވެ.

ތާރީހަށް ލޯބިކުރައްވާ އެތައް ބަޔަކު ދަނީ އެ މިސްކިތް ތަޅާނުލައި، ހިމާޔަތްކުރުމަށް ގޮވާލަމުންނެވެ. އަދި "ސޭވް ބަންޑާރަ މިސްކިތް" ނަމުގައި ގިނަ ބަޔަކު ދަނީ ސޯޝަލް މީޑިއާ ކެމްޕެއިނެއް ވެސް ކުރަމުންނެވެ.