އަވައްޓެރި ގައުމުތަކުން އީރާނަށް ހަމަލާއެއް ނުދޭހާ ހިނދަކު އެ ގައުމުތަކަށް ދޭ ހަމަލާތައް މެދުކަނޑައިލުމަށް އީރާނުގެ ވަގުތީ ލީޑަޝިޕް ކައުންސިލުން ފާސްކޮށްފައިވާ ކަމަށް އީރާނުގެ ރައީސް މަސްޢޫދު ޕެޒެޝްކިއަން ވިދާޅުވެއްޖެ އެވެ.

މިކަން ހާމަކުރައްވަމުން ރައީސް ޕެޒެސްކިއަން ވަނީ އީރާނުގެ ހަމަލާތައް އަމާޒުވި އަވަށްޓެރި ގައުމުތަކުގެ ކިބައިން މާފަށް ވެސް އެދިވަޑައިގެންފަ އެވެ.

އީރާނުގެ ރައްދު ހަމަލާތައް އަވައްޓެރި ގައުމުތަކުގައިވާ އެމެރިކާގެ އަސްކަރީ ތަންތަނަށް އަމާޒުކުރި ނަމަވެސް އާންމުންގެ ސަރަހައްދުތަކާއި ހަކަތަ އުފައްދާ ކާރުހާނާތަކާއި އެއާޕޯޓުތަކަށް ވެސް ހަމަލާ އަމާޒުވެ ގަލްފު ސަރަހައްދުގެ މަސްރަހުވަނީ ހަލަބޮލިވެފަ އެވެ.

ނަމަވެސް ޕެޒެޝްކިއަން ވިދާޅުވީ އެމެރިކާ އާއި އިޒްރޭލަށް އީރާނުން ދުވަހަކު ވެސް އަމާން ނުދޭނެ ކަމަށެވެ.

ރައީސް ޕެޒެޝްކިއަން މިހެން ވިދާޅުވެފައި މިވަނީ އެމެރިކާ އާއި އިޒްރޭލުން އީރާނަށް ވަރުގަދަ ހަމަލާތަކެއް ދީ ހަނގުރާމަ ފެށިތާ ހަތް ދުވަސް ވެފައިވާއިރު، އީރާނާ އެކު އެއްވެސް އެއްބަސްވުމެއް ހެދޭނީ "ޝަރުތެއް ނެތި އަމާން ދިނުމުން" ކަމަށް އެމެރިކާގެ ރައީސް ޑޮނަލްޑް ޓްރަމްޕް ހުކުރު ދުވަހު ވިދާޅުވުމާ ގުޅިގެންނެވެ.

މިދިޔަ ހޮނިހިރު ދުވަހު އީރާނަށް ހަމަލާދޭން ފެށި ފަހުން އެ ގައުމުގެ ރޫހީ ލީޑަރު އާޔަތުﷲ އަލީ ޚާމަނާއީ އާއި އިސް އެތައް ބަޔަކު ވަނީ އަވަހާރަކޮށްލައިފަ އެވެ. އީރާނުގެ އަސްކަރީ އެކި މަގާމުތަކާއި އަސްކަރީ މަނަވަރުތަކަށް ކެނޑިނޭޅި ހަމަލާ ދެމުންދާއިރު މަރުވި މީހުންގެ އަދަދު ވަނީ 1300 އަށް ވުރެ އިތުރުވެފަ އެވެ.

ހަމަލާތަކާ ގުޅިގެން މެދުއިރުމަތީގެ ގިނަ ގައުމުތަކުގެ ވައިގެ ސަރަހައްދު ބަންދު ކުރުމަށްފަހު މިހާރު ގެންދަނީ ބައެއް ގައުމުތަކުގައި ކޮންމެވެސް ވަރަކަށް ދަތުރުތައް ކުރަމުންނެވެ. އެގޮތުން ޔޫއޭއީ އާއި ގަތަރުން އަލުން ދަތުރުތައް ފެށުމަށް ވަނީ ތައްޔާރުވެފަ އެވެ.