މުޅި ރާއްޖެއަށް އަމާޒުކޮށްގެން ފުލުހުންގެ ޚިދުމަތުން ކުރިއަށް ގެންދަން ނިންމި "ވޯކް އެންޑް ޓޯކް" ހަރަކާތް ރަސްމީކޮށް ފަށައިފި އެވެ.

މި ހަރަކާތް ރަސްމީކޮށް ފެށީ މިއަދު، އެއް ވަގުތެއްގަ އެވެ. މި ހަރަކާތް ރާއްޖޭގެ ފުލުހުންގެ ޔުނިޓްތައް ހުންނަ ރަށްތަކުގައި ފަށާފައިވާއިރު، މިއީ ރައްޔިތުންނާ ގާތުން ރައްޔިތުންނާ ބައްދަލުކުރުމުގެ ގޮތުން އެ ހިދުމަތުން ފެށި ހަރަކާތެކެވެ.

މި ހަރަކާތް ފެށުމުގެ ގޮތުން ދާހިލީ ވަޒީރު އަލީ އިހުސާން އަދި ފުލުހުންގެ ވެރިންނާއި ޔުނިޓްތަކުގެ ވެރިން ބައިވެރިވެ ވަޑައިގެންނެވި އެވެ.

ފުލުހުންގެ އިދާރާއިން ބުނީ މިއީ ފުލުހުންނާއި ރައްޔިތުން އެއް މާހައުލެއްގައި ބައްދަލުވެ، ދެފަރާތުގެ މެދުގައި އޮންނަ ގުޅުން އިތުރަށް ބަދަހިކުރުމުގެ ގޮތުން ފެށި ހަރަކާތެއް ކަމަށެވެ.

މި ހަރަކާތުގެ ތެރެއިން ފުލުހުން ވަނީ ރައްޔިތުންނާ ބައްދަލުކޮށް ރައްކާތެރިކަމުގެ ގޮތުން ކުރެވޭނެ ކަންކަމާއި، ތަފާތު އެކި ކަހަލަ ކުށްތަކުން ރައްކާތެރިވެތިބުމަށް މަސައްކަތް ކުރާނެގޮތުގެ މައުލޫމާތު ހިއްސާކޮށްފަ އެވެ.

މިއީ ފުލުހުންނާއި ރައްޔިތުންގެ މެދުގައި އިތުބާރު އުފައްދައި، ދެފުށް ފެންނަ ގޮތެއްގައި ގުޅިގެން މަސައްކަތްކުރުމަށް ފުލުހުން ކުރަމުންދާ ސިލްސިލާ މަސައްކަތްތަކުގެ ތެރެއިން ކުރިއަށްދިޔަ ހަރަކާތެކެވެ. "ވޯކް އެންޑް ޓޯކް" މި ހަރަކާތް މިދިޔަ ފެބުރުއަރީމަހު ވެސް ކުރިއަށް ގެންގޮސްފަ އެވެ.