ގެވެށި އަނިޔާ ނުވަތަ ވަކި ވަކިޖިންސަކަށް ނިސްބަތްވީތީ ކުރެވޭ އަނިޔާއަށް އަމާޒުކޮށް އޮސްޓްރޭލިޔާ މޯލްޑިވްސް ފްރެންޑްޝިޕް އެސޯސިއޭޝް (އަމްފާ) ގެ ފަރާތުން އެސްއެސްމީޑިޔާއާއި ގުޅިގެން އުފައްދާ ޓީވީ ސިލްސިލާ "ހިމޭން އަޑު" ގެ ފުރަތަމަ އެޕިސޯޑު ރޭގަ އެސްއެސްޓީވީ އިން ދައްކައިފި އެވެ.

ވަރަށް މުހިންމު މައުލޫމާތު ތަކެއް ބެލުންތެރިންނަށް ގެނެސްދިން ރޭގެ ޕްރޮގްރާމްގައި ބައިވެރިވެ ވަޑައިގެންނެވީ ޔޫއެންއެފްޕީއޭ ހެޑް އޮފް އޮފީސް ޝާދިޔާ އިބްރާހިމްއާއި މަދަނީ ޖަމިއްޔާއެއްކަމަށްވާ ހޯޕް ފޯ ވިމެންގެ ޗެއާޕާރސަން އަހުމަދު އަންވަރެވެ.

ރޭގެ ޕްރޮގްރާމްގައި ގެވެށި އަނިޔާ ނުވަތަ ވަކި ވަކިޖިންސަކަށް ނިސްބަތްވީތީ ކުރެވޭ އަނިޔާ މާނަ ކޮށްދިނެވެ. އަދި ޕްރޮގްރާމްގައި ގެވެށި އަނިޔާ ނުވަތަ ވަކިޖިންސަކަށް ނިސްބަތްވީތީ ކުރެވޭ އަނިޔާތަކަކީ އިންސާނީ ޙައްޤުތަކާއި ގުޅިފައިވާ ކަންކަންކަމުގައި ފާހަގަކުރި އެވެ. އަދި މިއަނިޔާތަކުގެ ޝިކާރައަކަށްވެފައިވަނީ ހަމައެކަނި އަންހެނުން ނޫންކަމާއި ފިރިހެނުންނާއި ދެ ޖިންސުގެ ކުޑަކުދިންވެސް މި އަނިޔާތައް ތަހައްމަލު ކުރަމުންދިޔަ ކަމުގައިވިޔަސް، ނިސްބަތުން އަންހެނުންނަށް އަނިޔާ ލިބޭ މިންވަރު ބޮޑުކަން ތަފާސްހިސާބުތަކުން ދައްކާކަމަށް ފްރޮގްރާމަގައި ފާހަގަކުރި އެވެ. އަދި މީގެ އިތުރުން، މިއަދުގެ ދިވެހި މުޖުތަމަޢުގައި، އޮންލައިންކޮށް، ޓެކްނޮލޮޖީ ބޭނުންކޮށްގެން ދެވޭ އަނިޔާ އިތުރުވަމުންދާ ކަމަށްވެސް ފާހަގަ ކުރި އެވެ.

ހިމޭންއަޑުގެ ސިލްސިލާ އެސްއެސްޓީވީއިން ދައްކާނީ ކޮންމެ ބުދަދުވަހެއްގެ ރޭގަޑު 10ގަ އެވެ.

ހިމޭންއަޑުގެ ސިލްސިލާ ފެށުނީ ބެލުންތެރިންނަށް ކުރި އިލްތިމާސުގެ މެސެޖަކުންނެވެ. އެ އިލްތިމާސްގެ މެސެޖުގައި ޕްރޮގްރާމްގައި ގެވެށި އަނިޔާގެ ވާހަކަ ދެކެވޭނެކަމަށާއި އޭގެ ތެރޭގައި ޖިސްމާނީ، ނަފްސާނީ އަދި ޖިންސީ އަނިޔާގެ ވާހަކަ ހިމެނޭނެކަން ފާހަގަކޮށްފައިވެއެވެ. އަދި ބެލުން ތެރިންނަށް ނުތަނަވަސްކަން އިޙްސާސް ކުރެވިދާނެ ފަދަ ވާހަކަތަކެއް ދެކެވޭނަމަ، ޕްރޮގްރާމް ބެލުމުގައި ސަމާލުވުމަށް ނުވަތަ ޕްރޮގްރާމް ބެލުން މެދުކަނޑާލުމަށް ނަސޭޙަތްތެރިވެފައިވެ އެވެ.

އަމްފާއަކީ އޮސްޓްރޭލިއާ އާއި ދިވެހިރާއްޖެއާއި ދެމެދު އޮންނަ ދޭދޭ ގުޅުން އިތުރަށް ބަދަހި ކުރުމުގެ ވިސްނުމުގައި 2024 ވަނަ އަހަރު ރަޖިސްޓްރީ ކުރެވިފައިވާ މަދަނީ ޖަމްއިއްޔާއެކެވެ.