މިއަހަރުގެ ޖޫން މަހު އެމެރިކާ، ކެނެޑާ އަދި މެކްސިކޯގައި ބާއްވަން ހަމަޖެހިފައިވާ ފީފާ ވޯލްޑް ކަޕްގެ ރަސްމީ ލަވަ "ދާއި ދާއި" ނެރެފި އެވެ.

ކޮލަމްބިއާއަށް ނިސްބަތްވާ މަޝްހޫރު ޕޮޕް އައިކަން ޝަކީރާ ކިޔައިދީފައިވާ މި ލަވައާއެކު އޭނާ މިވަނީ ވޯލްޑް ކަޕް ތާރީހުގައި ހެޓްރިކެއް ހަދާފަ އެވެ. މިއީ ވޯލްޑް ކަޕްގެ ތާރީޚުގައިވެސް ޝަކީރާ ހުށަހަޅައިދޭ ތިންވަނަ ރަސްމީ ލަވަ އެވެ.

ލަވައިގެ މާނައާއި މިއުޒިކް

"ދާއި ދާއި" މި ބަހަކީ އިޓަލީ ބަހުން "ހިނގާ ދާށޭ" ނުވަތަ "ކުރިއަށް ދާށޭ" މި މާނައިގައި ބޭނުންކުރާ ބަހެކެވެ. މި ލަވަ ތައްޔާރުކޮށްފައިވަނީ މުބާރާތް ބާއްވާ އުތުރު އެމެރިކާގެ ތަފާތު ސަގާފަތްތައް ރަމްޒުކޮށްދޭ ގޮތަށެވެ. މީގައި ލެޓިން ރިދަމްތަކާއި، މޮޑަން ޕޮޕް އަދި އުތުރު އެމެރިކާގެ ބައެއް ސަގާފީ މިއުޒިކްގެ އަސަރުތައް އެކުލެވިގެންވެ އެވެ.

ޝަކީރާގެ ވޯލްޑް ކަޕް ތާރީޚަށް ބަލާއިރު އޭނާއަކީ ފުޓްބޯޅަ ސަޕޯޓަރުންގެ މެދުގައި "ވޯލްޑް ކަޕްގެ ރާނީ"ގެ ގޮތުގައި ބުނެވިދާނެ އެވެ. އޭނާ ވަނީ މީގެ ކުރިން ދުނިޔޭގެ އެންމެ މަގުބޫލު ވޯލްޑް ކަޕް ލަވަތައް ކިޔައިދީފަ އެވެ.

  • ވަކާ ވަކާ (ދެކުނު އެފްރިކާ، 2010)
  • ލާލާލާ (ބްރެޒިލް، 2014)
  • ދާއި ދާއި (އެމެރިކާ، މެކްސިކޯ އަދި ކެނެޑާ، 2026)

"ދާއި ދާއި" އަކީ 12 އަހަރުގެ މެދުކެނޑުމަކަށްފަހު ޝަކީރާ ވޯލްޑް ކަޕަށް އެނބުރި އައި ލަވަ އެވެ.

ލަވަ ނެރުމަށްފަހު ދިން ބަޔާނެއްގައި ޝަކީރާ ބުނެފައިވަނީ، މި ލަވައަކީ ދުނިޔޭގެ އެކި ކަންކޮޅުތަކުގެ މީހުން އެއްބައިވަންތަކުރުވުމާއި، އުއްމީދާއި، އަދި ކުޅިވަރުގެ ރޫހު ދިރުވައިދޭނެ ލަވައެއް ކަމަށެވެ. "މިއީ ހަމައެކަނި ލަވައެއް ނޫން، މިއީ އަހަރުމެން އެންމެން ގުޅުވައިދޭ ވިންދެއް،" އޭނާ ބުންޏެވެ.

ލަވަ ނެރުނުތާ މަދު ގަޑިއިރުތަކެއްގެ ތެރޭގައި ސޯޝަލް މީޑިއާގައި ވަނީ ވަރަށް ބޮޑު ތަރުހީބެއް ލިބިފަ އެވެ. ގިނަ ބަޔަކު ގަބޫލުކުރާ ގޮތުގައި ޝަކީރާ ނެތި ވޯލްޑް ކަޕެއް ފުރިހަމައެއް ނުވާނެ އެވެ. މި ލަވައިގެ މިއުޒިކް ވީޑިއޯގައި ދުނިޔޭގެ އެކި ގައުމުތަކުގެ ފުޓްބޯޅަ ތަރިންވެސް ފެނިގެންދެ އެވެ.

މިއަހަރުގެ ޖޫން މަހު ފަށާ ވޯލްޑް ކަޕްގެ ހުރިހާ ދަނޑުތަކެއްގައިވެސް ދެން އެންމެ ގަދައަށް އިވޭނެ އަޑަކީ ޝަކީރާގެ މި "ދާއި ދާއި" ގެ އަޑުކަން ޔަގީނެވެ. ކޮބާ، ކިހިނެއްވާނީ؟ މިއަހަރުގެ ވޯލްޑް ކަޕްގައި މި ލަވަޔާއެކު ފޯރި ނަގަން ތައްޔާރު ހެއްޔެވެ؟