މެދުއިރުމަތީގެ ހަމަޖެހުން ނާޒުކު ފައްތަރެއްގައި އޮތް ކަމަށް އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވާފައި ވަނިކޮށް، އީރާނަށް ގޯނާކުރާ ކޮންމެ ފަރާތަކަށް "ފިލާވަޅެއް ދަސްކޮށްދޭން" އެގައުމުގެ އަސްކަރިއްޔާ އޮތީ ތައްޔާރަށް ކަމަށް އީރާނުގެ މަޖިލީހުގެ ރައީސް މުހައްމަދު ބާގިރު ގާލީބާފް ހޯމަ ދުވަހު ވިދާޅުވެއްޖެ އެވެ.

"އަހަރެމެންގެ ހަތިޔާރު އެޅި ސިފައިން ތިބީ ކޮންމެ ހަމަލާއަކަށް ރައްދުދީ، ރަނގަޅު ފިލާވަޅެއް ދޭން ތައްޔާރަށް،" ސޯޝަލް މީޑިއާ ޕްލެޓްފޯމް އެކްސް ގައި ކުރެއްވި ޕޯސްޓެއްގައި ގާލީބާފް ވިދާޅުވި އެވެ. ނުބައި ރޭވުންތަކާއި ނުބައި ނިންމުންތަކުގެ ނަތީޖާ އަބަދުވެސް ގޯސްވާނެ ކަން މުޅި ދުނިޔެއަށް ވެސް މިއަދު އެނގޭނެ ކަމަށް އޭނާ ވިދާޅުވި އެވެ.

އެމެރިކާއިން ހުށަހެޅި ސުލްހައިގެ ހުށަހެޅުމަށް އީރާނުން ދިން ޖަވާބަކީ "މޮޔަ" ޖަވާބެއް ކަމަށް ވިދާޅުވެ، އީރާނާއެކު އޮތް ހަމަލާ ބަދަލުކުރުން ހުއްޓާލުމުގެ އެއްބަސްވުން މިހާރު އޮތީ "ނޭވާހޮޅިއަށް އެޅިފައި" ކަމަށް ރައީސް ޑޮނަލްޑް ޓްރަމްޕް ހޯމަ ދުވަހު ވަނީ ވިދާޅުވެފަ އެވެ.

އީރާނުގެ ޖަވާބު ޓްރަމްޕް ވަގުތުން ބޭރުކޮށްލުމާ ގުޅިގެން، 10 ހަފުތާއަށް ދެމިގެން ގޮސްފައިވާ މި ހަމަނުޖެހުން އިތުރަށް ދިގުލައިގެން ގޮސް، ހޮރްމޫޒް ކަނޑުއޮޅިން ކުރާ މުދާ އުފުލުމުގެ ދަތުރުފަތުރަށް ބޮޑެތި ހުރަސްތަކެއް ކުރިމަތިވެދާނެ ކަމުގެ ބިރު ވަނީ ބޮޑުވެފަ އެވެ.

މަދު ހަފުތާތަކަކަށް ދެމިގެންދިޔަ ހަމަލާ ބަދަލުކުރުން ހުއްޓާލުމުގެ މުއްދަތަށްފަހު، ދެން ދެވިދާނެ ހަމަލާތަކާ ބެހޭގޮތުން މަޝްވަރާ ކުރުމަށްޓަކައި ގައުމީ ސަލާމަތާ ބެހޭ ޓީމާއެކު މަތީ ފަންތީގެ ބައްދަލުވުމެއް ބޭއްވުމަށް ވެސް ރައީސް ޓްރަމްޕް ވަނީ ނިންމަވާފަ އެވެ. މިދިޔަ ހަފުތާތަކުގައި އެމެރިކާ އާއި އީރާނާ ދެމެދު ބަދަލުކުރާ ހަމަލާތައް ވަނީ މެދުކެނޑިފަ އެވެ.