ހަށިގަނޑު ރީތިކޮށް، ބަރުދަން ލުއިކުރުމަކީ މިއަދު ގިނަ ދިވެހިން ވަރަށް ބޮޑު ސަމާލު ކަމެއް ދޭ ކަމެކެވެ. ކެއުން ކޮންޓްރޯލް ކޮށް ، ކޮންމެ ދުވަހަކު ހެނދުނާއި ހަވީރު ހިނގަން ގޮސް، ޖިމްތަކުގައި ބުރަ މަސައްކަތް ކުރާ ދިވެހިން މަދެއް ނޫނެވެ.

ނަމަވެސް، މި ކަންކަމާއެކު ވެސް ބަރުދަން ބަލާ ކައްޓާއިން އެދެވޭ ބަދަލެއް ނުފެނުމަކީ މީގެ ތެރެއިން ގިނަ ބައެއްގެ ވަރަށް ބޮޑު ޝަކުވާ އެކެވެ.

އިންޑިއާގެ ބަނޑުގެ ބަލިތަކާ ބެހޭ ހާއްސަ ޑޮކްޓަރެއް ހާމަ ކުރެއްވި ގޮތުގައި، މި މައްސަލަ ދިމާވަނީ ދިވެހި ރާއްޖެ ހިމެނޭ ދެކުނު އޭޝިއާ ސަރަހައްދުގައި މީހުންގެ ހަށިގަނޑު އުފެދިފައިވާ ގޮތާއި، އަހަރެމެންގެ ކެއުމުގެ ސަގާފަތުގެ ސަބަބުންނެވެ. ބަރުދަން ލުއި ނުވުމުގެ ފަހަތުގައިވާ މައިގަނޑު ސަބަބުތަކަށް ބަލާލަމާ ހިނގާށެވެ.

1. "ޓޯފީ" – ބޭރުފުށުން ހިކި، އެތެރެއިން ފަލަވުން

ދިވެހިންގެ ހަށިގަނޑު އުފެދިފައިވާ ގޮތުން، ބޭރުފުށުން މާ ފަލަކޮށް ނުފެނުނު ނަމަވެސް، ހަށިގަނޑުގެ އެތެރޭގެ ގުނަވަންތަކުގެ ވަށައިގެން ފެޓް ނުވަތަ ސަރުބީ ހަރުލުމުގެ ފުރުޞަތު ބޮޑެވެ. މިއަށް ސައިންސްގެ ބަހުން ކިޔަނީ TOFI (Thin Outside, Fat Inside) އެވެ. މީގެ ސަބަބުން ބަނޑު ލުމާއި، ފެޓީ ލިވާ އަދި އިންސިއުލިން ރެސިސްޓެންސް ކުރިމަތިވެ، ބަރުދަން ލުއިކުރަން އާދަޔާ ހިލާފަށް އުނދަގޫވެ އެވެ.

2. ކާބޯހައިޑްރޭޓްސް ގިނަވުން (ބަތާއި ހެދިކާ)

ދިވެހިންގެ މައިގަނޑު ކެއުމަކީ ބަތެވެ. މީގެ އިތުރުން ހަވީރު ގަޑީގައި ކާލާ ހެދިކާ އާއި، ރޮށްޓަކީ ކާބޯހައިޑްރޭޓްސް ގިނަ ކާނާ އެވެ. އަހަރެމެން ޑައެޓް ކުރަން ފަށާއިރު ވެސް، ކެއުމުން ކާބްސް މަދުކުރި ނަމަވެސް، ހަށިގަނޑަށް ބޭނުންވާ މިންވަރަށްވުރެ ގިނައިން އެ ހަށިގަނޑުގައި ހުރެ އެވެ. ކާބްސް ގިނަވުމުން ހަށިގަނޑުން ސަރުބީ ވިރުވައިދޭ ނިޒާމު ކަމަށްވާ މެޓަބޮލިޒަމް ލަސްކޮށްލަ އެވެ.

3. ޕްރޮޓީން މަދުވުން

ބަރުދަން ލުއި ކުރުމަށްޓަކައި ކެއުމުގައި ޕްރޮޓީން ހިމެނުމަކީ ކޮންމެހެން ބޭނުންތެރި ކަމެކެވެ. ދިވެހިން މަސް ކެއި ނަމަވެސް، ގިނަ ފަހަރަށް މަސް ކައްކަނީ ތެލުލައިގެން ނުވަތަ ކިރު ގަރުދިޔަ ފަދަ ތެޔޮ ގިނަ ގޮތް ގޮތަށެވެ. މީގެ އިތުރުން ކެއުމުގައި ތަރުކާރީ ހިމެނޭ މިންވަރު މަދެވެ. ޕްރޮޓީން މަދުވުމުން ބަނޑުހައިވުން އަވަސްވެ، ބޭނުންނުވާ ސަރުބީ ހަށިގަނޑަށް އެތެރެވެ އެވެ.

4. ގަޑިއަށް ނުކެއުމާއި ނިދި މަދުވުން

މިއީ ގިނަ ދިވެހިންގެ ކިބައިގައި ހުންނަ ވަރަށް ނުބައި އާދައެކެވެ. ރޭގަނޑު މާ ލަހުން ކެއުމާއި، ދަންވަރު ހޭލާ ހުރުމަކީ ހަށިގަނޑުގެ ހޯމޯންތަކަށް ބޮޑު ބަދަލެއް އަންނަ ކަމެކެވެ. ނިދި މަދުވުމުން ހަށިގަނޑުގައި "ކޯޓިސޯލް" (ސްޓްރެސް ހޯމޯން) އިތުރުވެ، ބަނޑުގައި ސަރުބީ ޖަމާ ވުމަށް މަގުފަހިވެ އެވެ.

"ގިނަ މީހުން ހީކުރަނީ ހަމައެކަނި ޖިމަށް ގޮސް ބުރަކޮށް ކަސްރަތު ކުރުމުން ބަރުދަން ލުއިވާނެ ކަމަށް. ނަމަވެސް ކެއުމުގެ ވައްޓަފާޅިއަށް 80 ޕަސެންޓް ބަދަލު ނުގެނެސް، ހަމައެކަނި 20 ޕަސެންޓް ކަސްރަތުން ނަތީޖާއެއް ނުފެންނާނެ،" ޑޮކްޓަރު ފާހަގަ ކުރެއްވި އެވެ

.ދިވެހިންނަށް އޮތް ހައްލަކީ ކޮބާ؟

  • ކާބްސް މަދު ކުރުން: ކެއުމުގައި ހިމެނޭ ހުދު ބަތާއި، ފުށުގެ ބަދަލުގައި މުށި ބަތް ނުވަތަ އޯޓްސް ފަދަ ހޯލް-ގްރެއިންސް ބޭނުންކުރުން.
  • ތެޔޮ މަދުކުރުން: ކެއްކުމުގައި ބޭނުންކުރާ ތެލާއި، ހަވީރުގެ ތެލުލި ހެދިކާ ކެއުން މުޅިން ހުއްޓާލުން ނުވަތަ ވަރަށް ބޮޑަށް މަދު ކުރުން.
  • ތާޒާ ކާނާ ބޭނުން ކުރުން: ދަޅުމަހާއި، ޕްރޮސެސްޑް ފުޑްސް (ސޮސެޖް، ނަގެޓްސް)ގެ ބަދަލުގައި ތާޒާ ކަނޑުމަހާއި ކުކުޅުގެ އިތުރުން ތަރުކާރީ ގިނަ ކުރުން.
  • ރޭގަނޑު އަވަހަށް ކެއުން: އިރުއޮއްސި 7 ޖަހާއިރު ރޭގަނޑުގެ ކެއުން ނިންމާލުން އަދި ރަނގަޅަށް ނިދުން.

ހަމައެކަނި ބޭރުފުށުން ހިކެން އުޅުމުގެ ބަދަލުގައި އެތެރެ ހަށީގެ ދުޅަހެޔޮ ކަމަށް ވިސްނައިގެން ކެއުމާއި ދިރިއުޅުމުގެ އާދަތައް ބަދަލު ކުރުމަކީ ބަރުދަން ލުއި ކުރުމަށް އޮތް އެންމެ ފަސޭހަ މަގެވެ.