އިނގިރޭސި ޝާހީ އާއިލާއާ އޮތް ގުޅުން ކަނޑާލުމަށްފަހު އެމެރިކާއަށް ދިރިއުޅުން ބަދަލުކުރި ޕްރިންސް ހެރީ އާއި މޭގަން މާކަލް، އަންނަ ޖުލައި މަހު މުޅި އާއިލާއާއެކު އިނގިރޭސިވިލާތަށް ދިއުމަށް ނިންމައިފި އެވެ.

މިއީ 2022 ވަނަ އަހަރު ކުއީން އެލިޒަބެތުގެ ޕްލެޓިނަމް ޖުބިލީއަށްފަހު އެމީހުންގެ ދެ ކުދިން ކަމަށްވާ ޕްރިންސް އާޗީ (7 އަހަރު) އާއި ޕްރިންސަސް ލިލިބެޓް (5 އަހަރު) އާއެކު އިނގިރޭސި ފަސްގަނޑަށް ކުރާ ފުރަތަމަ ދަތުރެވެ.

މި ދަތުރުގައި އެންމެ ފާހަގަކޮށްލެވޭ އެއް ކަމަކީ، ހެރީގެ ބައްޕާފުޅު ކިންގް ޗާލްސް III ޝާހީ ގަނޑުވަރެއްގައި ހުރުމަށް ދެއްވި ދައުވަތު ހެރީ އާއި މޭގަން ގަބޫލު ކޮށްފައި ވުމެވެ.

ބައެއް މަސްދަރުތަކުން ބުނާ ގޮތުގައި، މީގެ ކުރިންވެސް ބަކިންގްހަމް ޕެލެސްއިން ދައުވަތު ދީފައިވީ ނަމަވެސް، ސަލާމަތީ ކަންކަމާ މެދު ހުރި ކަންބޮޑުވުންތަކުގެ ސަބަބުން ހެރީ އެ ދައުވަތުތައް ގަބޫލެއް ނުކުރެ އެވެ.

ނަމަވެސް މިފަހަރު އާއިލާއާއެކު އެހެން ޝާހީ ގަނޑުވަރެއްގައި ހުރުމަށް ވަނީ ނިންމާފަ އެވެ. މިއީ ޝާހީ އާއިލާއާއި ހެރީގެ ހީނަރު ވެފައިވާ ގުޅުން ރަނގަޅުވުމުގެ ނިޝާނެއް ކަމަށް ގިނަ ބަޔަކު ދެކެ އެވެ.

މި ދަތުރަކީ 2027 ވަނަ އަހަރު އިނގިރޭސިވިލާތުގެ ބާމިންގްހަމްގައި ބޭއްވުމަށް ހަމަޖެހިފައިވާ ހެރީގެ "އިންވިކްޓަސް ގޭމްސް"ގެ އެއް އަހަރުގެ ކައުންޓްޑައުން ހަރަކާތްތަކުގައި ބައިވެރިވުމަށް ކުރާ ދަތުރެކެވެ.

ލަންޑަނާއި މިޑްލޭންޑްސްގައި ބޭއްވުމަށް ހަމަޖެހިފައިވާ ރަސްމީ ހަރަކާތްތަކުގައި ހެރީއާއެކު މޭގަންވެސް ބައިވެރިވާނެ އެވެ. ނަމަވެސް، އެމީހުންގެ ދެ ކުދިން އެއްވެސް ރަސްމީ ހަރަކާތަކުން ނުފެންނާނެ އެވެ.

ރަސްމީ ކަންކަމުގެ އިތުރުން، ހެރީގެ މަންމާފުޅު ޕްރިންސަސް ޑަޔާނާގެ އާއިލީ ފަސްގަނޑު ކަމަށްވާ "އެލްތޯޕް ހައުސް"އަށް އާއިލާއާއެކު އަމިއްލަ ޒިޔާރަތެއް ކުރުމަށްވެސް ވަނީ ރޭވިފަ އެވެ.

ޖުލައި 1 އަކީ ޑަޔާނާގެ އުފަންދުވަސް ކަމަށްވުމާއެކު، ހެރީ ބޭނުންވަނީ އޭނާގެ ދަރިން މަންމާފުޅުގެ މަގްބަރާ ހުންނަ ސަރަހައްދަށް ގެންދިއުމަށެވެ.

އިނގިރޭސިވިލާތަށް ދާން ނިންމި ނަމަވެސް، ސަލާމަތީ ކަންކަމާ މެދު ހެރީގެ ހިތުގައި އަދިވެސް ބޮޑެތި ކަންބޮޑުވުންތަކެއް އެބަހުއްޓެވެ. ޝާހީ އާއިލާ ދޫކޮށްލުމުން އިނގިރޭސި ސަރުކާރުން ދެމުންދިޔަ ހަތިޔާރު އެޅި ފުލުހުންގެ ސެކިއުރިޓީ ކަނޑާލާފައިވާތީ، ހެރީ ދަނީ އެކަމާ ދެކޮޅަށް ކޯޓުގައި ވަކާލާތު ކުރަމުންނެވެ. އެހެންކަމުން، މި ދަތުރުގައި އެމީހުން ބޭނުން ކުރާނީ އަމިއްލަ ޕްރައިވެޓް ސެކިއުރިޓީ ޓީމެކެވެ.

މި ދަތުރުގައި ކިންގް ޗާލްސްއަށް އޭނާގެ ހަގު ކާފަދަރިން ކަމަށްވާ އާޗީ އާއި ލިލިބެޓްއާއެކު ވަގުތު ހޭދަ ކޮށްލަން ފުރުސަތު ލިބިގެންދާނެ އެވެ. ކެންސަރު ބައްޔަށް ފަރުވާ ހޯއްދަވަމުންދާ ރަސްގެފާނަށް މިއީ އުފާވެރި ބައްދަލުވުމަކަށް ވާނެ އެވެ.