މިސަރުކާރުގެ އިސް ބޭފުޅަކަށް ވިޔަސް ދައުވާ ކުރާނެ ކަމަށާއި އެކަމުގައި ވަކި ބޭފުޅަކަށްވީމާ ތަފާތު ކުރުމެއް ނުގެން ގުޅޭނެ ކަމަށް ޕްރޮސެކިއުޓާ ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެ އެވެ.

ޕީޖީ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ޕީޖީ ހުސައިން ޝަމީމް ވިދާޅުވީ މިނިސްޓަރު މަހްލޫފުގެ މައްޗަށް ދައުވާ ކުރުމާމެދުގައި ގޮތެއް ނިމިފައި ނުވަނީ އިދާރީ ގޮތުން ކުރަންޖެހޭ ކަންކަން ނުނިމިގެން ކަމަށެވެ. ވަކި މީހަކަށް ވީމާ ދައުވާނުކޮށް ދޫނުކޮށްލާނެ ކަމަށާއި ސަރުކާރުގެ އިސް ކޮންމެ ބޭފުޅަކަށް ވިޔަސް ދައުވާކުރުމަކަށް ފަހަކަށް ނުޖެހޭނެ ކަމަށް ވެސް ޝަމީމް ވިދާޅުވި އެވެ.

"އެއް ގޮތަކަށް ވެސް ދައުވާ ނުކުރުމުގެ ނިޔަތެއް ބާއްވައިގެން ނޫޅެން. އަޅުގަނޑު ބިރު ގަންނަން ޖެހޭ މީހެއް ނުހުންނާނެ، މި ސަރުކާރުގެ މީހަކަށް ވިޔަސް އަޅުގަނޑު ފަސް ނުޖެހޭނަން،" އޭނާ ވިދާޅުވި އެވެ.

މީގެ އިތުރަށް ޝަމީމް ވިދާޅުވިގޮތުގައި ދައުވާކޮށް ޝަރީއަތަށް މައްސަލައަކާއެކު ދާއިރު ފުރިހަމައަށް ދައުލަތުން ތައްޔާރުވާން ޖެހޭނެ އެވެ. އެހެންކަމުން ޝަރީއަތުން އަމާޒު ކުރާނެ ސުވާލުތަކާއި ދިފާއުން ކުރާނެ ސުވާލުތަކަށް ތައްޔާރުވެ ތިބެން ޖެހޭނެ ކަމަށް އޭނާ ވިދާޅުވި އެވެ.

"އިންވެސްޓިގޭޓަރުގެ ވިސްނުމަކު ނޯވެދާނެ، ޝަރީއަތުން ކުރާނެ ސުވާލުތައް، ދިފާއުން ކޮށްފާނެ ސުވާލުތައް. އަޅުގަނޑުމެން އެ ކަމަށް ވެސް ތައްޔާރުވެގެން ދާން ޖެހޭނެތީ، އެ ކަމަށް ބޭނުންވާ މައުލޫމާތު ހޯދާފައި ހުންނަން އެބަ ޖެހޭ. އެ ވަރު ކަމެއް އުޅެނީ،" ޝަމީމް ވިދާޅުވި އެވެ.

މިނިސްޓަރު މަހްލޫފްގެ މައްޗަށް ޚިޔާނާތުގެ ދައުވާ ކުރުމަށާއި ދޮގު މައުލޫމާތު ދިން ކަމުގެ ދައުވާ ކުރުމަށް އެންޓި ކޮރަޕްޝަން ކޮމިޝަން (އޭސީސީ) އިން ފޮނުވީ އެމްއެމްޕީއާރުސީ ޚިޔާނާތުގެ ފައިސާ މަހްލޫފަށް ލިބުނު ކަމަށް ތުހުމަތު ކުރާ މައްސަލައިގަ އެވެ.

މިމައްސަލާގައި ދައުވާ ކުރުމަށް ފޮނުވުމާ ގުޅިގެން މަހްލޫފު ވަނީ މިނިސްޓަރު ކަމުން އެކަހެރި ކޮށްފަ އެވެ. އަދި ޔޫތު މިނިސްޓްރީ ވަގުތީ ގޮތުން ހިންގުން ޓޫރިޒަމް މިނިސްޓަރު އަބުދުﷲ މައުސޫމާ ވަނީ ހަވާލުކޮށްފަ އެވެ.

މަހްލޫފުގެ މައްޗަށް އޭސީސީއިން ދައުވާ ކުރުމަށް ޕީޖީ އޮފީހަށް ފޮނުވާފައިވާއިރު އެމައްސަލާގައި އިތުރު ލިޔެކިޔުން ހޯދުމަށް ޕީޖީ އޮފީހުން އޭސީސީ އޮފީހުގައި އެދުމުން މިނިސްޓަރު މަހްލޫފު ވަނީ އޭސީސީގެ ރައީސް ޝިއުނާގެ އިސްތިއުފާއަށް ގޮވާލައްވާފަ އެވެ.

މީގެ ކުރިން މަހްލޫފު ވިދާޅުވެފައިވަނީ އެމްއެމްޕީއާރުސީގެ މައްސަލާގައި ދައުވާ ކުރުމަށ ފޮނުވާއިރު މިނިސްޓަރުގެ މަގާމުން އިސްތިއުފާ ދެއްވާނެ ކަމަށެވެ. އަދި އޭނާގެ މައްޗަށް ދައުވާ ކުރަން ފޮނުވާފައިވަނީ ސިޔާސީ ގޮތުން ކަމަށްވެސް މިނިސްޓަރު މަހްލޫފު ވަނީ ވިދާޅުވެފަ އެވެ.