ކުރީގެ ރައީސް މުހައްމަދު ނަޝީދު ޗައިނާއާ ދެކޮޅަށް ކުރެއްވި ޓުވީޓަކަށް ރާއްޖޭގައި ހުންނަ ޗައިނާ އެމްބަސީން ރައްދު ދީފި އެވެ.

މަޖިލީހުގެ ރައީސް ނަޝީދު އިއްޔެ ކުރެއްވި ޓުވީޓްގައި ވިދާޅުވެފައި ވަނީ ރާއްޖޭގެ މިނިވަން ދުވަސް ފާހަގަ ކުރާއިރު، އިނގިރޭސި ހަނގުރާމަ މަތީ މަނަވަރުތައް ސައުތު ޗައިނާ ކަނޑުގައި އޮންނަ ސްޕާޓްލީ އައިލެންޑް ވަށައިގެންވާ ކަނޑުގެ ސަރަހައްދުގެ ދަތުރުފަތުރުކުރުމުގެ ހައްގު ހިމާޔަތް ކުރުމަށް ސައުތު ޗައިނާ ކަނޑަށް އިނގިރޭސި މަނަވަރުތައް ދަތުރުކުރުމަކީ، ހިތްހަމަޖެހި ވަަޑައިގަންނަވާ ކަމެއް ކަމަށެވެ.

ރައީސް ނަޝީދުގެ އެ ޓުވީޓަށް ރައްދު ދެއްވާ ރާއްޖޭގައި ހުންނަ ޗައިނާ އެމްބަސީން އެމަނިކުފާނު ޓެގް ކުރައްވައި ކުރި ޓުވީޓެއްގައި ބުނެފައިވަނީ، ބައިނަލްއަގުވާމީ ގާނޫނުތަކާއި އެއްގޮތްވާގޮތުގެ މަތިން އެ ސަރަހައްދުގައި ހުރިހާ ގައުމެއްގެ އުޅަނދުތަކަށް ވެސް ހަރަކާތްތެރިވެ އުޅުމަށް ޗައިނާއިން މަރުހަބާ ކިޔާނެ ކަމަށެވެ.

ނަމަވެސް ޗައިނާގެ ސިޔާދަތާއި ސަލާމަތަށް އަދި ސަރަހައްދުގެ ހަމަޖެހުމާއި އަމަނަށް ގެއްލުންލިބޭ ގޮތަށް އަދި ބާރުވެރިކަން ދެއްކުމަށް ހިންގާ އަމަލުތައް ބަލައިނުގަންނާނެ ކަމަށް ޗައިނާ އެމްބަސީން ބުނެފައިވެ އެވެ.

ރައީސް ނަޝީދަކީ އަބަދުވެސް ޗައިނާ އާ ދެކޮޅަށް ވާހަކަ ދައްކަވާ ބޭފުޅެކެވެ.

ކުރީގެ ސަރުކާރުން ޗައިނާއާ އޮންނަ ގުޅުމާމެދު ރައީސް ނަޝީދު ވަނީ ފާޑުކިޔާފަ އެވެ. އަދި ކުރީގެ ރައީސް ޔާމީންގެ ވެރިކަމުގައި ޗައިނާއިން ކުރިއަށް ގެންދާ މަޝްރޫއުތަކާ މެދުގައި ފާޑުކިޔާފައިވާއިރު އެ ގައުމު ނެގި ލޯނުތަކުގެ ސަބަބުން ރާއްޖޭގެ ސަރަހައްދުން ބައެއް ޗައިނާއަށް ދޭން ޖެހޭނެ ކަމަށް ވެސް އޭރު ރައީސް ނަޝީދު ވަނީ ވިދާޅުވެފަ އެވެ.

ރައީސް އިބްރާހީމް މުހައްމަދު ސޯލިހްގެ ސަރުކާރުގައި އެންމެ ގާތް ގުޅުމެއް ބާއްވަނީ ރާއްޖެއާ އަވަށްޓެރި އަދި ޗައިނާއާ އެންމެ ވާދަވެރި އިންޑިއާއާ އެވެ. އިންޑިއާއިން ނަގާ ލޯނުތަކެއް ރައީސް ނަޝީދުއަކަށް އެއީ ދަރަނިވެރިވުމަކަށް ނުވާތީ ގިނަ ބަޔަކު އަންނަނީ އެމަނިކުފާނަށް ފާޑުކިޔަމުންނެވެ.