ޑިޒްނީ ޕްލަސް ހޮޓްސްޓާ އިން ޕްރީމިއާކުރަން ހަމަޖެހިފައިވާ ހޮރޯ-ކޮމެޑީ "ބޫތު ޕޮލިސް"ގެ ޓައިޓްލް ލަވަ ނެރެފި އެވެ.

މި މަހުގެ 17 ވަނަ ދުވަހު ޑިޒްނީ ޕްލަސް ހޮޓްސްޓާގައި "ބޫތު ޕޮލިސް" ނެރުމަށް ވަނީ ހަމަޖެހިފަ އެވެ.

ފޯރިގަދަ ނެށުންތަކެއް ހުރި މި ލަވައިގެ ކޮރިއޯ، ރެމޯ ޑި ސޫޒާ ހަދާފައިވާ އިރު، ލަވަ ކިޔާފައި ވަނީ ވިޝާލް ދަދުލާނީ އާއި ސުނީދީ ޗޯހަނެވެ. ލަވައިން ފެނިގެން ދަނީ "ބޫތު ޕޮލިސް"ގެ ކާސްޓުންގެ ތެރެއިން ސައިފް އަލީ ޚާނާއި ޖެކްލިން ފެނަންޑޭޒްގެ އިތުރުން އަރުޖުން ކަޕޫރެވެ. މި ފިލްމުގެ ޔާމީ ގޯތަމް ވެސް ހިމެނެ އެވެ. އެކަމަކު ޓައިޓްލް ލަވައިގައި އޭނައެއް ނެތެވެ.

https://www.youtube.com/watch?v=coZHJWeykrM

"ބޫތު ޕޮލިސް" އަކީ "ރޭސް" ފްރެންޗައިޒްގެ ޕްރޮޑިއުސަރު ރަމޭޝް ތައުރާނީ ޕްރޮޑިއުސްކޮށް، ޕަވަން ކިރްޕަލާނީ ޑައިރެކްޓްކޮށްފައިވާ ފިލްމެކެވެ.

މިދިޔަ ހަފްތާގައި ވަނީ ފިލްމުގައި ސައިފް އާއި އަރުޖުންގެ ކެރެކްޓާ ދައްކާލާފަ އެވެ. މި ފިލްމުގައި ސައިފް ކުޅޭނީ ވައިބޫތީ ކިޔާ މީހެއްގެ ރޯލެވެ. އަދި އަރުޖުން ފެނިގެންދާނީ ޗިރައުންޖީ ނަމަކަށް ކިޔާ ކެރެކްޓާއެކެވެ.