މާލެ މިސްކިތްތަކުގައި ސީސީޓީވީ ކެމެރާ ހަރުކޮށްދޭނެ ބަޔަކު ހޯދަން މާލެ ސިޓީ ކައުންސިލުން އިއުލާނުކޮށްފި އެވެ.

މާލެ ސިޓީ ކައުންސިލުން ކުރި އިއުލާނެއްގައި ވަނީ މިސްކިތްތައް މަރާމާތުކުރުމުގެ މަޝްރޫއުގެ ދަށުން މާލޭގެ މިސްކިތްތަކުގައި ސީސީޓީވީ ކެމެރާ ހަރުކުރުމަށް ހަމަޖެހިފައިވާ ކަމަށެވެ. އަދި އެ މަޝްރޫއުގެ ދަށުން އެ މަސައްކަތް ކުރުމަށް ބީލަން ހުށަހެޅުމަށް ހުޅުވާލާފައިވާ ކަމަށް އެ އިއުލާނުގައި ބުނެފައިވެ އެވެ.

ސިޓީ ކައުންސިލުން ބުނީ މި މަސައްކަތްކުރުމަށް ޝައުގުވެރިވާ މީހުން މިމަހުގެ 17 ވަނަ ދުވަހު ބީލަން ރަޖިސްޓްރީ ކުރުމަށް ހުށަހަޅަން ޖެހޭ ކަމަށެވެ. އަދި އަގު ހުށަހެޅުމުގެ ސުންގަޑިއަކީ މިމަހުގެ 23 ވަނަ ދުވަހު ކަމަށް އެ ކައުންސިލުން ބުނެފައިވެ އެވެ.

މާލޭގެ މިސްކިތްތަކުގައި ސީސީޓީވީ ހަރުކުރުމަށް ނިންމީ މިސްކިތްތަކުގެ ހުރުމަތް ކަނޑައި، އިހްތިރާމް ނުދޭކަމުގެ ގިނަ ޝަކުވާތަކެއް އާންމުން ކުރަން ފެށުމުންނެވެ.

މި މަސައްކަތަށްފަހު ހުރިހާ މިސްކިތްތަކެއް ވެސް ސީސީޓީވީ ކެމެރާ އެއް ވިއުގަކުން ގުޅާލުމަށްފަހު ކޮންޓްރޯލް ސިސްޓަމްތައް ކައުންސިލް އިދާރާތަކުގައި ބަހައްޓައި މޮނިޓާކުރުމަށް ހަމަޖެހިފައިވާ ކަމަށް ސިޓީ ކައުންސިލުން ބުންޏެވެ.