ދުނިޔޭގެ ތާރީޚުގައި ފުރަތަމަ ފަހަރަށް ގަނޑުފެނުން ހެދިފައިވާ އެންޓާޓިކާ ބައްރުގައި އެއާބަސް އޭ340 މަރުކާގެ މަތިންދާ ބޯޓެއް ޖައްސައިފި އެވެ.

މި މަހުގެ ދެވަނަ ދުވަހު ކުރި މި ތާރީޚީ ދަތުރަކީ ހައި ފްލައި ނަމަކަށް ކިޔާ އޭވިއޭޝަން ކުންފުންޏަކުން ކުރި ދަތުރެކެވެ. ހައި ފްލައި 801ގެ ނަން ދެވިފައިވާ މި ދަތުރު ފަށާފައިވަނީ ސައުތު އެފްރިކާގެ ކޭޕްޓައުން އިންނެވެ.

ދަތުރުގެ މައިގަނޑު މަގްސަދަކަށްވީ އެންޓާޓިކާ ބައްރުގައި ހިންގަމުން އަންނަ އެޑްވެންޗާ ކޭމްޕްއަކަށް ބޭނުންވާ މުދަލާއި ތަކެތި އުފުލުމެވެ. ދަތުރަށް ފަންޑް ކޮށްފައިވަނީ ވެސް އެ އެޑްވެންޗާ ކޭމްޕުންނެވެ.

ދަތުރުގެ ކޮންމެ ކޮޅަކަށް ފަސް ގަޑިއިރު ހޭދަވި އިރު އެންޓާޓިކާގައި ތިން ގަޑިއިރު ވަންދެން މަތިންދާ ބޯޓު ޖައްސާފައި އޮތެވެ. މި ދަތުރުގެ ކެޕްޓަންއެއްގެ ގޮތުގައި ހަރަކާތްތެރިވީ ހައި ފްލައިގެ ނާއިބު ރައީސް ކާލޮސް މިރްޕުރީ އެވެ.

ގަނޑުފެންގަނޑެއްގައި މަތިންދާ ބޯޓެއް ޖައްސަން ހުރި ގޮންޖެހުންތަކާއެކު ވެސް ކާލޮސް ވަނީ ކާމިޔާބުކަމާއެކު ގަނޑުފެނުގެ "ރަންވޭ"ގައި އޭނާގެ މަތިންދާ ބޯޓު ޖައްސައި ތާރީހުން ޖާގަ ހޯދާފަ އެވެ.

ކާލޮސް ބުނީ ގަނޑުފެނުން އަރާ ދަޅައިގެ ސަބަބުން މަތިންދާ ބޯޓު ޖެއްސުމުގައި ދަތިތަކެއް ހުރި ނަމަވެސް ލޮލުގައި އަޅާ ރަނގަޅު އާލާތްތަކާއެކު އެކަން ކުރެވުނު ކަމަށެވެ.

ތާރީހުގައި އެންމެ ފުރަތަމަ ދުނިޔޭގެ އެންމެ ފިނި ބައްރަށް މަތިންދާ ބޯޓެއް ޖެއްސި ކަމަށް ރެކޯޑް ކުރެވިފައިވަނީ 1928 ވަނަ އަހަރު އެންޓާޓިކާއަށް ޖެންސި އޮސްޓްރޭލިއާގެ އަސްކަރީ މޮނޮޕްލޭން އެކެވެ.