ފޭރަކީ އަހަރުމެންގެ ދިވެހި ރާއްޖޭގައި ވެސް ވަރަށް ގިނައިން ހައްދާ އުޅޭ އެ މޭވާއަކުން ގިނަ ފައިދާތަކެއް ވެސް ލިބޭ މޭވާ އެކެވެ. މި ލިޔުމުގައި މި ބަލާލަނީ އެގޮތުން އިސްތަށިގަނޑުގެ ދުޅަހެޔޮ ކަމަށް ފޭރުފަތުން ކުރެވޭ ކަމަކަށެވެ.

ފޭރުފަތުގައި ހިމެނޭ އެނަލްޖެސްޓިކް،އެންޓި އިންފްލެމެންޓަރީ، އެންޓި މައިކްރޯބިއަލް އަދި އެންޓި އޮކްސިޑެންޓް މި މާއްދާތަކުން ބޮލުގެ ތެރޭގައި ހެދޭ ފާރު އަދި ހަންފޮޅުމުގެ މައްސަލަތަކަށް ފަރުވާލިބެއެވެ. ފޭރު ފަތަކީ އޭގައި ވިޓަމިން “ބީ” އަދި “ސީ”އިން މުއްސަނދި ފަތެކެވެ. މި ފަތުގައި ހިމެނޭ މިދެމާއްދާ އިން އިސްތަށި ގަނޑު ދިގުވުމަށާއި ވަރުގަދަ ކޮށްދިނުމަށް އެހީވެދެއެވެ.

އިސްތަށިގަނޑު ވަރުގަދަ ކުރުމަށާއި ދިގު ކުރުމަށް ފޭރުފަތް ބޭނުން ކުރެވޭނެ ގޮތަކަށް ތިރީގައި ބަލާލާނަމެވެ.

ބޭނުންވާ ތަކެތި

  • 1 ޖޯޑު ފޭރުފަތް
  • 1 ލީޓަރު ފެން

ތައްޔާރު ކުރާނެގޮތް

ތެއްޔަށް ފެންއެޅުމަށްފަހު ކައްކަން އުނދުން މައްޗަށް އުދާލާށެވެ. ފެން ރަނގަޅަށް ކެކިގަތީމަ ފޭރުފަތް އެޅުމަށްފަހު ރަނގަޅަށް ކައްކާށެވެ. ކެކުމުން އުނދުން ނިއްވާލުމަށްފަހު ފެން ހިހޫވަންދެން ބެހެއްޓުމަށްފަހު ހިހޫ ވުމުން ފުރޭނުން ފުރާނާލާފައި އެފެން ، އެއްޗަކަށް އަޅާށެވެ.

ތައްޔާރު ކުރި ފެން ބޭނުންކުރާނެގޮތް

އެންމެ ފުރަތަމަ އިސްތަށިގަނޑު ރަނގަޅަށް ޝޭމްޕޫލައިގެން ދޮންނާށެވެ. ދޮވުމަށް ފަހު ކޮންޑިޝަން ކޮށްގެން ނުވާނެއެވެ. އިސްތަށިގަނޑު ދޮތުމަށްފަހު ރަނގަޅަށް ފެން ހިއްކުމަށްފަހު އިސްތަށިގަނޑު ބައި ކޮށްފައި ތައްޔާރު ކުރި ފޭރުފަތުގެ ފެނުން އިސްތަށިގަނޑުގެ ހުރިހާ ބައެއްގެ ބުޑާއެކު ތެންމާލާމުން، މަސާޖު ކުރުމަށްފަހު 10 މިނެޓްވަންދެން ބަހައްޓާށެވެ. ބޭނުންނަމަ މިފެން ދެ ގަޑިއިރު ނޫނީ އެއްރޭ ވަންދެން ވެސް އިސްތަށިގަނޑުގައި އުނގުޅާފައި ބެހެއްޓިދާނެ އެވެ. ގިނައިރު ހުންނަން ބޭނުން ނަމަ ތުވާއްޔަކުން އިސްތަށިގަނޑު ބަންދުކޮށްފައި ބެހެއްޓުން ރަނގަޅެވެ. އެއަށްފަހު ތާފަނާ ފެނުން ބޯ ދޮންނާށެވެ.

ބޭނުންކުރަންވީ މުއްދަތު

އިސްތަށިފައިބާތީ ބޭނުން ކުރާނަމަ ހަފްތާއަކު ތިން ދުވަހު މިފަރުވާ ދިނުން ރަނގަޅެވެ. އިސްތަށިގަނޑު އަވަހަށް ދިގުކުރުމަށާއި ރީތިކުރުމަށް ހަފްތާ އަކު ދެ ފަހަރު ބޭނުންކުރުން ރަނގަޅެވެ.

މި ތެރަޕީ ބޭނުންކުރާއިރު ސަމާލު ވާންޖެހޭ ކަންތައްތައް

  • ބޮލުގައި މިފެން އުނގުޅުމުގެ ކުރިން ރަގަޅަށް ފެން ހިހޫވެފައި ހުރިތޯ ބެލުން.
  • ބޯދޮންނަ އިރު ހޫނުފެނުން ބޯ ނުދޮވުން