މަޝްހޫރު ބޮލީވުޑްގެ ބަތަލާ، ކަރީނާ ކަޕޫރްގެ ފުރަތަމަ ދަރިފުޅު ކަމަށްވާ ތައިމުރް އަލީ ޚާންގެ ފަސް ވަނަ އުފަންދުވަހާ ދިމާކޮށް، އޭނާގެ ނުފެންނަ ފޮޓޯއެއް އާންމުކޮށްފި އެވެ.

އެ ފޮޓޯ އާންމުކޮށްފައި ވަނީ ތައިމުރްގެ ދައްދަ ސޯހާ އަލީ ޚާން އެވެ. އަދި އެ ފޮޓޯގައި ސޯހާ، ތައިމުރް އުރާލައިގެން ހުންނަ މަންޒަރުން ފޭނުންގެ ހިތްތައް ވަނީ ފުރާލާފަ އެވެ.

ސޯހާ އަލީ ޚާން، ތައިމުރް އުރާލައިގެން. ފޮޓޯ:އީޓައިމްސް

ސޯހާ، އޭނާގެ ސޯޝަލްމީޑިޔާގައި ހިއްސާކޮށްފައިވަނީ ތައިމުރްގެ އެންމެ ތުއްތުއިރުގެ ފޮޓޯއެކެވެ. އަދި އެއާއެކު ސޯހާ ވަނީ ކުޑަ ނޯޓެއް ވެސް ލިޔެފަ އެވެ.

އެ ނޯޓުގައި، އޭނާ އެންމެ ފުރަތަމަ ތައިމުރް އުރާލި ވަގުތަކީ ހަނދާނުން ނުފިލާނެ ވަގުތެއް ކަމަށް އޭނާ ވަނީ ބުނެފަ އެވެ. އަދި ތައިމުރް އައުމުން އާއިލާއަށް އުފާވެރިކަން ގެނެސްދިން ކަމަށާއި، އެހާ އަވަހަށް ފަސް އަހަރު ފުރުނުކަން ގަބޫލު ވެސް ނުކުރެވޭ ކަމަށް ސޯހާ ވަނީ ބުނެފަ އެވެ.

ބޮލީވުޑްގައި ގިނަ ބައެއްގެ މަގުބޫލުކަން ހޯދާފައިވާ ކަރީނާ އާއި ސައިފްގެ ދަރިފުޅަށް ވުމުން ތައިމުރަށް ވަނީ އޭނާ ދުނިޔެއަށް އައުމުގެ ކުރިން ވެސް މަޝްހޫރުކަން ލިބިފަ އެވެ.