ވަކި ފަރާތެއްގެ ހަބަރު ގެނެސްދިނުމަށް ފައިސާގައި ހިފައި. އެ ފައިސާގައި ހިފިކަން ހާމަނުކޮށް ހަބަރު ގެނެސްދިނުމަކީ ވަރަށް ބޮޑު އޮޅުވާލުމެއް ކަމަށް ކުރީގެ ފޮރިން މިނިސްޓަރު އަދި އދ.ގެ ހާއްސަ ރެޕެޓުއާ ޑރ. އަހުމަދު ޝަހީދު ވިދާޅުވެއްޖެ އެވެ.

ޑރ. ޝަހީދު ކުރެއްވި ޓުވީޓެއްގައި މިހެން ވިދާޅުވެފައިވަނީ ދާދި ފަހުން ރައީސުލްޖުމްހޫރިއްޔާގެ އޮފީހުން ރާއްޖޭގެ ބައެއް މީޑިއާތަކަށް ރައީސްގެ ހަބަރު ގެނެސްދިނުމަށް ފައިސާ ދީފައިވާ ކަން ހާމަވެފައި ވަނިކޮށެވެ. މި މައުލޫމާތުތައް ރައީސް އޮފީހުން ހާމަކޮށްފައިވަނީ މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން ރާއްޖޭގެ އޮންލައިން ނޫހަކުން އެދުމުންނެވެ.

ޝަހީދު ވިދާޅުވެފައިވަނީ ވަކި ހަބަރެއް ގެނެސްދިނުމަށް ވަކި ފަރާތަކުން ފައިސާ ހިފާފައި، އެ ފައިސާ ހިފިކަން ހާމަނުކޮށް ހަބަރު ގެނެސްދިނުމަކީ ރައްޔިތުންނަށް ބޮޑުތަނުން އޮޅުވާލުން ކަމަށެވެ. މިކަމަކީ މިނެކިރުމުން އޮޅުވާލުންފަދަ ބޮޑު މަކަރާއި ހީލަތެއް ކަމަށް ވިދާޅުވެފައިވެ އެވެ.

މިކަމަކީ ބޮޑު ކަމެއް ކަމަށް މޯލްޑިވްސް މީޑިއާ ކައުންސިލާއި މޯލްޑިވްސް ޖާނަލިސްޓް އެސޯސިއޭޝަނަށް ނުވި ކަމަކީ ވަރަށް ދެރަ ކަމެއް ކަމަށެވެ.

މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން ރައީސް އޮފީހުން ހާމަކޮށްފައިވާ މައުލޫމާތުތަކަށް ބަލާއިރު ރައީސުލްޖުމްހޫރިއްޔާގެ އެކި ދަތުރުފުޅުތަކާއި އަދި އެމަނިކުފާނުގެ ބައެއް ވާހަކަފުޅުތައް ޕްރޮމޯޓްކުރުމަށް ރާއްޖޭގެ ބައެއް މީޑިއާތަކަށް ތިރީސް ހާސް ރުފިޔާއާއި ފަންސާސް ހާސް ރުފިޔާގެ އަދަދަކަށް ފައިސާ ދީފައިވެ އެވެ. އެގޮތުން މިއަހަރުގެ މިހާތަނަށް ރައީސް ސޯލިހު ޕްރޮމޯޓް ކުރުމަށް މީޑިއާތަކަށް 1،445،820 ރުފިޔާ ދީފައިވާ ކަމަށް ރައީސް އޮފީހުން ހާމަކޮށްފައިވާ ތަފާސް ހިސާބުން ދައްކަ އެވެ.