ބޮލީވުޑްގެ އެންމެ މަޝްހޫރު ތަރިން ތެރޭގައި ހިމެނޭ ޝާހްރުކް ޚާންގެ ދަރިފުޅު އާރިޔަން ޚާން މިދިޔަ އަހަރު މަސްތުވާތަކެތީގެ މައްސަލައެއްގައި ހައްޔަރުކޮށް އޭނާގެ މައްޗަށް އުފުލި ދައުވާތަކުން ސަލާމަތްވެއްޖެ އެވެ.

އިންޑިއާގެ ނެޝަނަލް ނާކޮޓިކްސް ކިންޓްރޯލް ބިއުރޯ (އެންސީބީ) އިން ބުނީ އާރިޔަންގެ މައްޗަށް އުފުލި މަސްތުވާކެތި ބޭނުންކުރުމާއި އެ ޓްރެފިކްކުރުމާއި ވިއްކުމުގެ ދައުވާތައް ކުރިއަށް ނުގެންދަން ނިންމީ އޭނަގެ މައްޗަށް މިހާތަނަށް އެކަށީގެންވާ ވަރުގެ ހެއްކެއް ލިބިފައި ނުވާތީ ކަމަށެވެ. އަދި އާރިޔަންއާއެކު ދައުވާ އުފުލި 14 މީހުންގެ ތެރެއިން ފަސް މީހެއްގެ މައްޗަށް ވެސް ދައުވާ ނުކުރުމަށް ނިންމާފައިވާ ކަމަށްވެސް އެންސީބީއިން ބުނެ އެވެ.

އާރިޔަނާއި އޭނާގެ އެކުވެރިންތަކެއް މިދިޔަ އަހަރުގެ އޮކްޓޯބަރު މަހުގެ 2 ވަނަ ދުވަހުގެ ރޭ ހައްޔަރުކުރީ މުމްބާއީގެ ފަޅު ބޭރުގައި އޮތް ކްރޫޒް ލައިނާއެއްގައި މަސްތުވާތަކެއްޗާ އެކު ޕާޓީކުރާ ކަމަށް ލިބުނު ރިޕޯޓަކާ ގުޅިގެން ހިންގި އޮޕަރޭޝަނެއްގަ އެވެ. އެ މައްސަލާގައި އަރިއަން ޖަލުގައި ހައްޔަރުކޮށް 28 ދުވަސް ފަހުން ދޫކުރީ ކަފާލާތުގެ ދަށުން މިދިޔަ އަހަރުގެ ނޮބެމްބަރު މަހުގެ 30 ގަ އެވެ.

އަރިއަން ހައްޔަރުކުރުމާ ގުޅިގެން އެންސީބީ އަށް ވަރަށް ބޮޑަށް ފާޑުކިޔުންތައް އަމާޒުވި އެވެ. ގިނަ ބަޔަކު އޭރު ބުނަމުން ދިޔައީ އެއީ ވެރިކަން ކުރާ ބީޖޭޕީ އަށް ނިސްބަތްވާ ވެރިންތަކެއް އިސްކޮށް ތިބެގެން ޝާހްރުކްގެ ނަން ހުތުރުކުރަން ހިންގި އެއްވެސް އަސާސެއް ނެތް ކުޅިގަނޑެއް ކަމަށެވެ. އަދި އެ މައްސަލާގައި އޭރު އެންސީބީގެ ވެރިއަކަށް ހުންނެވި ސަމީރު ވަންކެޅެގެ މައްޗަށް ތުހުމަތުކުރެވުނު ކޮރަޕްޝަންގެ އެތައް ތުހުމަތުތަކަކާ ގުޅިގެން އޭނާ މަގާމުން ވެސް އެކަހެރިކުރި އެވެ.

އާރިޔަން، 24، އަކީ ޝާހްރުކްގެ ތިން ކުދިންގެ ތެރެއިން ދޮށީ ދަރިފުޅެވެ.