ނ. ހޮޅުދޫގެ ބައެއްގެގޮތުގައި އެރަށާ ޖެހިގެން އޮންނަ ފަޅުރަށެއް ކަމަށްވާ ހޮޅުމީދޫ ތަރައްގީކުރާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެ އެވެ.

ހޮޅުދޫ މޭނާ ސްކޫލަށް 75 އަހަރު ފުރުން ފާހަގަކުރުމުގެ ގޮތުން ބޭއްވި އަލިމަސް ޔޫބީލް ޖަލްސާ ޝަރަފުވެރިކޮށްދެއްވައި ދެއްކެވި ވާހަކަފުޅުގައި އެމަނިކުފާނު ވިދާޅުވީ ހޮޅުމީދޫއަށް ބޭނުންވާ އަސާސީ ހިދުމަތްތައް ވެސް ފޯރުކޮށްދެއްވާނެ ކަމަށެވެ.

ހޮޅުމީދޫގައި މީހުން އާބާދުކުރަނީ ހޮޅުދޫއަށް ދިމާވެފައިވާ ބޯހިޔާވަހިކަމުގެ މައްސަލައަށް ހަލެއް ގެނައުމަށެވެ. ހޮޅުދޫގައި ބިން ހިއްކޭނެ ޖާގައެއް ނެތެވެ.

ހޮޅުދޫ ރައްޔިތުން ބޭނުންވާގޮތަށް ހޮޅުމީދޫގައި 30 ހައުސިން ޔުނިޓް އަޅުއްވައިދެއްވާނެ ކަމަށް އެމަނިކުފާނު ވިދާޅުވި އެވެ.

"މިރަށުގެ ރައްޔިތުން ބޭނުންވީ މި ރަށުގައި އަޅަން ސަރުކާރުން ހަމަޖެއްސި 30 ހައުސިން ޔުނިޓް، މިރަށުގެ ބައެއްގެ ގޮތުގައި އަޅުގަނޑުމެން ހަމަޖެއްސި ހޮޅުމީދުއަށް ބަދަލުކޮށް، އެ ރަށް އާބާދުކުރަން. އިރާދަކުރެއްވިއްޔާ އެކަން އަޅުގަނޑުމެން އެގޮތަށް ކޮށްދޭނަން. އެރަށަށް ބޭނުންވާ އަސާސީ ޚިދުމަތްތައް ވެސް ޤާއިމުކޮށްދޭނަން،" ރައީސް ވިދާޅުވިއެވެ.

ރައީސް ވިދާޅުވީ އެރަށަށް ދިމާވެފައިވާ ރަށްގިރުމުގެ މައްސަލަ ހައްލުކުރުމުގެ މައްސަލަ ހައްލުކޮށްދެއްވާނީ ރައްޔިތުން ބޭނުންވާގޮތަށް ކަމަށާއި އެ މަޝްރޫއު އަންނަ ޖުލައި މަހުގެ ނިޔަލަށް ބީލަމަށް ހުޅުވާލެވޭނެކަމަށެވެ.

ހޮޅުދޫ ފެނުގެ ނިޒާމް ގާއިމްކުރުމުގެ މަސައްކަތް ވަނީ ފެށިފަ އެވެ. އެ މަސައްކަތް ނިމުމުން އެ ރަށުގެ މަގުހެދުމުގެ މަޝްރޫއު ވެސް ފަށާނެ ކަމަށް އެމަނިކުފާނު ވިދާޅުވި އެވެ.