ބޮލީވުޑްގެ އެންމެ މަގުބޫލު ތަރިން ތެރޭގައި ހިމެނޭ ޝާހްރުކް ޚާން ފިލްމީ ދާއިރާގައި މަސައްކަތްކުރާތާ 30 އަހަރު ފާހަގަ ކޮށްފި އެވެ.

ބޮލީވުޑްގައި މަސައްކަތްކުރާތާ 30 އަހަރު ފާހަގަ ކުރުމުގެ ގޮތުން ޝާހްރުކް ވަނީ އަންނަ އަހަރުގެ ޖެނުއަރީ 25 ގައި ސިނަމާތަކަށް ގެނައުމަށް ހަމަޖެހިފައިވާ ފިލްމު "ޕަތާން"ގެ މޯޝަން ޕޯސްޓަރެއް ވެސް ދައްކާލައިފަ އެވެ. މި ފިލްމަކީ 2018 ގެ "ޒީރޯ" ނާކާމިޔާބީ އަށް ފަހު ޝާހްރުކް ކުޅުނު ފުރަތަމަ ފިލްމެވެ.

އުމުރުން 56 އަހަރުގެ އެކްޓަރު ޝާހްރުކް ޚާންގެ "ޕަތާން"ގެ އިތުރުން ދެ ފިލްމެއް އަންނަ އަހަރު ރިލީޒް ކުރާނެ އެވެ. އެއީ ތ"ޖަވާން" އާއި "ދުންކީ" އެވެ. އަދި މި އަހަރުގެ ސެޕްޓެމްބަރުގައި ރިލީޒްކުރާ ރަންބީރް ކަޕޫރާއި އާލިއާ ބަޓްގެ "ބުރައްމަސްތުރާ" ގެ ހާއްސަ ރޯލަކުން ވެސް ޝާހްރުކް ފެންނާނެ އެވެ.

https://www.instagram.com/p/CfN-J9NoE5t/

ޝާހްރުކް ޚާންގެ އެކްޓިން ދަތުރު ފެށީ ޓީވީ ޝޯ "ފައުޖީ" އާއި "ސާކަސް" އިންނެވެ. އޭނާ ބޮލީވުޑަށް ތައާރަފްވީ 1992 ވަނަ އަހަރު ރިލީޒްކުރި "ދީވާނާ" އިންނެވެ.

އެއަށް ފަހު ޝާހްރުކް ވަނީ "ބާޒީގަރް" އާއި "ޑަރް" އަދި "އަންޖަމް" ފިލްމުތައް ކުޅެ ބެލުންތެރިންގެ ލޯބި ހޯދާފަ އެވެ. މިފިލްމުތަކަކީ ޝާހްރުކް ޚާންގެ މަޝްހޫރު ވެގެންދިޔަ ފިލްމުތަކެވެ.

ސުޕަސްޓާގެ ގޮތުގައި ބެލެވޭ ޚާން ވަނީ "ދިލްވާލޭ ދުލްހަނިއާ ލެ ޖަޔަންގޭ" އާއި "ކަބީ ޚުޝީ ކަބީ ޣަމް" އާއި "ދޭވްދާސް" އާއި "ޗަކް ދޭ! އިންޑިއާ" އަދި "މައި ނޭމް އިޒް ޚާން" ފަދަ ހިޓް ފިލްމުތައް ގެނެސްދީފަ އެވެ.

"ކިންގް ޚާން" ގެ ނަމުން މަޝްހޫރު އަދި ބޮލީވުޑްގެ އެންމެ މުއްސަނދި ތަރިންގެ ތެރޭގައި ހިމެނޭ ޝާހްރުކަކީ މިހާރު ޕްރޮޑިއުސަރެއް ވެސް މެ އެވެ. އޭނަގެ އަމިއްލަ ފިލްމު ކުންފުންޏަކީ ރެޑް ޗިލީޒް އެންޓަޓައިންމަންޓެވެ. ކެރިއަރަށް 30 އަހަރުވީ އިރު، ޝާހްރުކްގެ އަންހެން ދަރިފުޅު ސުހާނާ ޚާން، 22، މިހާރު އަންނަނީ ބަތަލާއެއްގެ ގޮތުގައި ބޮލީވުޑަށް ނުކުންނަން ތައްޔާރުވަމުންނެވެ. އަދި ދޮށީ ފިރިހެން ދަރިފުޅު އަރިއަން ޚާން، 24، ވެސް ފިލްމު އުފެއްދުމުގެ މަސައްކަތަށް ވަރަށް އަވަހަށް ނުކުންނާނެ އެވެ.

ޝާހްރުކްގެ އަންހެނުން ގޯރީ ޚާނަކީ އިންޑިއާގެ ނުފޫޒު ފަދަ އިންޓީރިއާ ޑިޒައިނަރަކެވެ.