މަސްތުވާތަކެތި ޓްރެފިކް ކުރުމުގެ މައްސަލައިގެ ޝަރީއަތް ނިމެންދެން ބަންދުކޮށްފައިވާ ފިލްމީތަރި އަދި މަޝްހޫރު މޮޑެލް ހުނޭސާ އާދަމް ނަސީރު (ހުނޫ) ބަންދުން ދޫކޮށްލައިފި އެވެ.

އެނގިފައިވާ ގޮތުގައި ހުނޫ ބަންދުން ދޫކޮށްލީ ކްރިމިނަލް ކޯޓުން މިއަދު އެފަދައިން އަމުރު ކުރުމުންނެވެ.

ދައުލަތުން އޭނާގެ މައްޗަށް އުފުލާފައި ވަނީ ޑައިމޯފިން ޓްރެފިކް ކުރުމުގެ ދައުވާ އާއި ކެނަބިސް ޓްރެފިކް ކުރުމުގެ ދައުވާގެ އިތުރުން މަސްތުވާތަކެއްޗާ ބެހޭ ގާނޫނުގެ ޖަދުވަލު އެކެއްގައިވާ މަސްތުވާއެއްޗެއް ޓްރެފިކްކުރުމުގެ ދައުވާ އެވެ.

ހުނޫ ދޫކޮށްލުމުގެ އަމުރަކަށް އެދުނީ އޭނާގެ ގާނޫނީ ވަކީލެވެ. އަދި އެ ހުށަހެޅުމާ މެދު ކްރިމިނަލް ކޯޓުން ގޮތެއް ނިންމީ މިއަދު އެވެ.

ހުނޫ ބަންދުން ދޫކޮށްލީ އެ މައްސަލާގައި ފެނުނު މަސްތުވާތަކެތީގެ ޒިންމާ އެހެން މީހަކު ނަގާފައިވާތީ، އެ މަސްތުވާތަކެއްޗާއި އޭނައާ ގުޅުވޭނެ އެއްވެސް ހެއްކެއް ނެތުމުންނެވެ.

ހުނޫގެ މައްޗަށް އެ ދައުވާ އުފުލީ މިދިޔަ މާޗް މަހުގެ 28 ވަނަ ދުވަހު އޭނާ އާއި އޭނާގެ ލޯބިވެރިޔާ މާލޭގައި ތިބި ގެއަކުން މަސްތުވާތެކެތި ފެނުނު މައްސަލާގަ އެވެ.

އެ މައްސަލާގައި އޭނާގެ ލޯބިވެރިޔާގެ މައްޗަށް ވެސް ވަނީ ދައުވާ އުފުލާފަ އެވެ.

ހުނޫއަކީ އިންސްޓްގްރާމްގަ އާއި ޓިކްޓޮކްގައި ވެސް މަޝްހޫރުކަން ހޯދާފައިވާ މީހެކެވެ. އިންސްޓަގްރާމްގައި އެކަނި އޭނާގެ 25،000 އަށް ވުރެ ގިނަ ފޮލޯވަރުން ތިބެ އެވެ.

ޑާކްރެއިންގެ ގިނަ ފިލްމުތަކުން ފެނިފައިވާ ހުނޫ ހައްޔަރުކުރިއިރު ވެސް އޭނާ ދިޔައީ ބައެއް ފިލްމުތަކުގެ މަސައްކަތް ކުރަމުންނެވެ.

ހުނޫއަކީ ކުޑަދުވަސްކޮޅެއްގެ ތެރޭގައި ފިލްމީ ދާއިރާގައި ގިނަ ބައެއްގެ މަގުބޫލުކަން ހޯދަމުން އައި ފަންނާނެކެވެ.

ޓިކްޓޮކް އާއި ފިލްމީ ދާއިރާގައި މަޝްހޫރު ރާއްޖޭގެ ހަތަރު ވަރަކަށް ފަންނާނުންގެ މައްޗަށް މިހާރު ވެސް ކްރިމިނަލް ކޯޓުގައި މަސްތުވާތަކެތީގެ ދައުވާތައް ވަކިވަކިން އުފުލާފައިވެ އެވެ. އޭގެ ތެރެއިން ބައެއް ފަންނާނުންގެ ދައުވާތަކުގެ ޝަރީއަތް މިހާރު އޮތީ އެންމެ ފަހުގެ މަރުހަލާގަ އެވެ.