ހިންދީ ފިލްމުތަކާއި ޑްރާމާތައް ކުޅެފައިވާ އެކްޓަރު ވިކްރަމް ގޯކްލޭ މަރުވެއްޖެ އެވެ.

އުމުރުން 75 އަހަރުގެ ވިކްރަމް ގޯހާލޭ މަރުވެފައި ވަނީ އޭނާ ހާލު ދެރަވަގެން ޕޫނޭގެ ހޮސްޕިޓަލެއްގައި އެޑްމިޓްކޮށްގެން ފަރުވާދެމުން ދަނިކޮށެވެ. ވިކްރަމްއަށް ފަރުވާ ދެމުން އައީ ވެންޓިލޭޓަރުގައި ބާއްވައިގެންނެވެ.

އޭނާ މަރުވުމުގެ ކުރިން އޭނާ މަރުވި ކަމަށް ބުނެ މީގެ ދެ ދުވަސް ކުރިން މީޑިއާތަކުގައި އަޑު ފެތުރުމުން ގިނަ ބަޔަކު ތައުޒިޔާ ވެސް އޭރު ވެސް ކިޔެވެ. ނަމަވެސް އޭނާގެ އާއިލާއިން ވަނީ އޭރު އޭނާ މަރުނުވާ ކަމަށާއި، އޭނާ އޭރު އޮތީ ވެންޓިލޭޓަރުގެ އެހީގައި ކަމަށް ބުނެފަ އެވެ.

އޭނާ މަރުވިކަން ރޭ އާއިލާއިން އިއުލާނު ކުރުމުން ގިނަ ބަޔަކު އަންނަނީ އޭނާއާށް ތައުޒިޔާ ކިޔަމުންނެވެ.

ވިކްރަމް ބޮލީވުޑަށް ތައާރަފްވީ 1971 ގައި އަމީތާބު ބައްޗަން ބަތަލުގެ ބައި ކުޅުނު "ޕަރްވާނާ" އިންނެވެ. އޭރު އޭނާގެ އުމުރުން 27 އަހަރެވެ.

"ހަމް ދިލް ދޭ ޗުކޭ ސަނަމް"ގައި އައިޝްވަރިޔާ ރާއީގެ ކެރެކްޓާ ނަންދިނީގެ ބައްޕަގެ ރޯލު ކުޅެފައިވަނީ ވިކްރަމް އެވެ. މި ނޫނަސް ގިނަ އަދަދެއްގެ ފިލްމުތަކުގައި ވިކްރަމް ބައްޕަ ބަޔާއި ނުބައިބައި ކުޅެފައިވެ އެވެ. އަދި ޓީވީ ސީރީޒްތަކުގައި ވެސް ބައްޕަގެ ރޯލު ކުޅެފައި ވެއެވެ.

ފަހުގެ ފިލްމުތަކުގެ ތެރެއިން "ބޫލް ބުލައްޔާ"، "ދިލް ސޭ"، "ދޭ ދަނާ ދަން" އަދި "މިޝަން މަންގަލް" ގައި ވިކްރަމް ވަނީ މޮޅު ބައިތަކެއް ކުޅެފަ އެވެ.

ވިކްރަމް ފިލްމެއް ޑައިރެކްޓް ވެސް ކޮށްފައިވެ އެވެ. އެއީ އޭނަ މުހިއްމު ރޯލެއް ވެސް ކުޅުނު 2010 ގެ "އާގާތު" އެވެ.